لامن بغيت اعز حرفي ومعناه=وأختار من يزهاه دور البطوله
رجلٍ بذكره يطرب القاف بغناه=وتستعذبه حتى القلوب الملوله
وإليا مدحته قالوا العالم الله=صح الله لسانك على ماتقوله
في طيبه الأبيات تاتي متالاه=والقافيه تنساب له في سهوله
عز الله إني عارفه قبل ماابداه=وما يجهله ياكود ناسٍ جهوله
إن جيت ابشبهه وإلا أتحلاه=ساق الجوا حلياه والناس حوله
له مرقبٍ بالطيب يومه تعلاه=فخر به المرقب ودقت طبوله
وإن قيل منهو قلت من فيه حلياه=النادر اللي كل طيبٍ يطوله
الشامخ اللي لا ذكر قالت عداه=والنعم لو كبد العدو مغلوله
الواضح اللي ماعطا الغير علباه=يشوش للفزعه وفعل الرجوله
الفارق اللي ينعرف من سجاياه=قليل من ياصل و يفعل فعوله
الصامل اللي لا نوا الصعب يقواه=تطرب لصعبات المراقي ذلوله
الطيب اللي ماتسوا سواياه=قلته انا والناس قبلي تقوله
لو الكرم له حد إن ياصل أقصاه=ويجيب مقياسه بعرضه وطوله
يخشى عليه الفقر من مد يمناه=ويكفيك قبل تشوف فعله قبوله
أنشهد إن الله على فعله أعطاه=إسم ٍ خذا بالطيب صوله وجوله
إليا إنذكر شاشت على ذكره جباه=وإليا إنقرا صعب العقود محلوله
خصيت ماعميت كامل مزاياه=وابذكره وإليا طرا صفقوا له
الشيخ وابن الشيخ ياطيب مجناه=مقدم هل العرفا على كل صوله
رباح من يجهله!!ياحي طرياه=وانتم على تصفيقكم نعموا له
يستاهل التمجيد والمدح يزهاه=غيري مناعير الرجال شهدوا له
مع كل علم غانم تحل ذكراه=وإليا تطاروا بالفعول أنعتوا له
والنعم لو هي تحتكر ماتعداه=إن تنكتب بسمه بتال الحموله
سعى لها ووالله ماخاب مسعاه=أتعب على كسب الجزايل خيوله
قالوا لي اللي يعرفونه من صباه=إنه رجل يومه بسن الطفوله
ومحدٍ يلوم المرجله يوم تهواه=حيثه عطاها حقها في أصوله
كم خايفٍ عن لاهب الخوف ذراه=جاره عن صدوف الزمان وميوله
وكم من سجينٍ في كلبشه تمناه=يسمع بذكره والرجال أوصفوا له
قالوا له اندب عنك لك شخص ينخاه=وارقد وزل عن ضيق صدرك حموله
إن صعبت القاله وحاروا هل الجاه=وتعقدت والمخطر أرسل رسوله
ثم جاه في دعواه لا وا رباحاه=تكفى وتكفى ماتكودك قفوله
انت الذرا والملتجا بعد الإله=وانت الذي مايخيب اللي عنوا له
يشوش مع صوت العزاوي من أقصاه=وإليا انتهض ثم إنتخا وسعوا له
لو كان فنجاله بيمناه وطاه=والموت بس الموت عنها يحوله
شمر لها كمه وموضوعها انهاه=وابهج نفوسٍ من زمان معلوله
كفو كفو راع الحميا المغذاه=من طيب ساسٍ يجذبه من اصوله
ابن مريخان الفخر ساس مبناه=إسم ملك في عالم المجد دوله
هذا وانا والله والله والله=إن البيوت تسوقني له عجوله
ومالي ورا ماقلت غير المباهاه=بالشيخ وامجاده بطيبٍ ينوله
أشوش لفعوله وأغني بطرياه=وافخر بذكره لاطرت لي بطوله
وابختم ابياتي بصعبات الأشباه=وعذري: لأن إسمه على كل طوله
وابسأل ومابي أجابات تتلاه=واستسمح اللي يعترضني بقوله
اناأحسب إن الطيب واحد من ابناه=هو صح وإلا من ضمن من يعوله؟