|
ألا ياهل ا لمروة والحميه = ألا ياحفاد قادات السرايا ألا وين الحقوق الادميه = ألا وين الرعاة من الرعايا نبا نعزم على حل القضيه = نقدمها على كل القضايا بعزم وحزم دام النفس حيه= ولا تسلم حياة بلا رزايا بحيث تكون تدرك المنيه = ولاتقدر تفر من المنايا لكنك حدث النفس الخفيه = جهادا قبل ا ن تلقى الخفايا اما شاهدتم الدرة ضحيه = وكم قبله وبعده من ضحايا |
وين أنت ياللي تحدى قول وش ظنك=خل التحدي دخيلـك مالـك ومالـه أنت تحدى رجال كبار فـي سنـك=وبعضهم تعتبر في حسبـة عيالـه كلمة كبيرة ولو فكّرت واليـا انـك=ورطت نفسك وصارت حالتك حالـه لا لا تحدى وكـب الفايتـه عنّـك=جعلك موفق وعلم الخير تسعى لـه |
نويت للطرقة وقمت اتحزّم = بحزام يفرق عن جميع المحازم يوم ان ابو ناصر على القنص لزم= وانا رفيقه خوتي معه لازم ومن يذكر الشاكر ذكر معه زمزم = اخوان في الطرقة علي الملازم والمشعل ابو صالح ان كان عزم = خوينا ماهو رفيق المهازم حتى لو ان الحال معنا تأزم = الكل في دربه على الخير عازم ننصى الديار اللي بها العشب حزم = ومدهال ريم في اول الصيف كازم وجبال وعرات ماغير انتلزم = فيها الخطروالكل بالموت جازم ومن فوقنا صوت السحاب يتهزم = يرعد على طاشا وضلع الحوازم وعلى جبال ادقس وضلع مقزم = ووادي به الحمر القوادي ترازم ونرجع بصيد وافر ونتعزم= وما فيه مهزوم ولا فيه هازم |
قصيدة ترحيبية في /13/1/1429هـ
مرحبا ترحيب بالضيفان والاصحابي = في حلال نورها يزداد من رايدها الفرح بوجودكم زايد وخير أوجابي = وجبة تجمع هل التكميل مانفقدها كانها عيد ارمضان وملتقى الاحبابي = ليتها في كل شهر تعود ونجددها واثني الترحيب بالحضار والغيابي = بالنيابه عن جميع اللي دعوا نوردها والشباب يقولها ويقولها الشيابي = مرحبا في مرحبا في مرحبا ويزدها بالرجال اهل الوفاء واللي تسد البابي = الرجال اللي تكمل لاعطت موعدها والختم صلوا عدد مادرهمن اركابي = وعد همال المزون اللي زهم راعدها تاصل المختار والهادي بخير كتابي = النبي المصطفى اللي سنته وحدها |
قصيدة بمناسبة شفاء أخونا صالح الروقي= من الحادث الشنيع الذي تعرض له : = أسوق المعاني في القوافي من الشوق = بلقيا الاصاحيب الكرام الفطاني ومافات شي وكل مطرود ملحوق= ولكن يبقى الصبر للمودماني سلامات ياصالح وتسلم من العوق= ويسلمك ربي من حدوث الزماني فرحت بسلامتكم ويفرح بكم روق= وما كن قلبي يظهره لك لساني وهذي مقادير على العبد من فوق = من الواحد اللي مامعه رب ثاني ومافيه ياصالح على الارض مخلوق = يقضّي حيات العمر كله في اماني حقيقة وحق وصدق صادق ومنطوق = يصدق بها في الكون قاصي وداني وتسلم ياابو بندر وياعالي الذوق = قناة النشاما لك تبث التهاني |
توجه ونصيحة = ألا يالله تغفر زلتي يارب ياغفار = وأنا ذنبي عظيم ولا تحيط به التواصيفي أنا نفسي شقية متعبتني والله الستار = أسير بطوعها وبنوعها ماهو على كيفي وأنا أعرف النهاية جنة الفردوس وألاّ نار = ومن ربه كتب له جنة الفردوس ماخيفي ترى الدنيا دنيه والحلا فيها كما الامرار = قطع قطر السماء واسبابه أفعال الملاقيفي ومن قوم الحسد يالله تحمانا وقوم العار = حسدهم يرسلونه للعرب وسط المضاريفي وأنا عندي نصيحة لاتجالس بايح الاسرار = ليا حصل خبر ذاعه على روس المشاريفي كذلك لاتخير صحبة المنان والثرثار= ومن ينسى المروة والجميلة والمعاريفي رفيقك من نصحك وجنبك عن موطن الاخطار = ومن ياقف بجنبك حين تصدفك الصواديفي وبر الوالدين اكبر ربح من تجرة التجار = يبر بك العيال اليا وصلوا سن التكاليفي وجارك قدره واعطه حقوق الجار لو هو جار= وتنجد عن خوي الجنب والجيران والضيفي وتنحى عن مصاحبة البخيل وهافي المقدار = ترى صحبة بخيل الناس مثل النار في الليفي عليك بصحبة الابرار وأهل الشور والاخيار = تراها ماتزيدك في حياتك غير تشريفي |
معاناة معلم = طلبت النقل تسهيلا لحالي = وتخفيف المهمات الثقالي وقد بارك لنا الاصحاب جمعا = مراسلة وناس بالمجالي وقالوا جئت بالنور ونورا= يشع في دياجير الليالي وقلت أشوف موقعها أمهلوني = ولا تستعجلوا في كل حالي وقالوا أنت ذو حظ عظيم = وواسطة ولا فيها جدالي فقلت نعم توسطنا وسطْنا = بمدرسة على قمم الجبالي يوصلها طريق غير سهل = به درج كما عدد الرمالي وقد وقفت مذهولا حزينا = ومكسور الفؤاد ولا أبالي وعمري جاوز الخمسين عاما = ثلاثا بين حل وارتحالي فهل قدّر لعمر الكهل قدرا= ولا تكميل لله الكمالي طلبت العدل وابقائي مكاني = فقال الشيخ بن حمد محالي فان أقلامنا رفعت وجفت = صحائفكم فذا صعب المنالي قرار منزل من غير رجعة = تنفذه على مر وحالي فقلت كبرت عن هذا وهذا = وهذا يقال لاصحاب الدلالي وذا الدماس دمسها علينا = كليل دامس طمس الهلالي بعشرين من الحصص توالا = ثلاث أيام نأخذها توالي فأين الرفق بالشيبان أين = وقد أفل الشباب الى الزوالي وقالوا انه تكريم منهم = وذا تكريم أشبه بالخيالي فيا سعد الذي قد نال منه =يعيش مرفها صاحب معالي وهذا مما يجعلني أقرر = بأن أرتاح عند أم العيالي |
هذه قصيدة تحدي على وزنين متقاربين = أبتدي عذب اللحون من المشاعر والقريحه = من هواجيس بها نار القضى تشتبي في بيوت بنيها قايم على قومه وطيحه = أول الميقاف بيحه وآخره فيه أبي الشريحه تحترق والرقم في وسط الشريحه = وأنت رقمك خازنه لك في شريحة قلبي لك وداعة وسط قلبي سر خافي مايبيحه = بس ياراع العيون السود لاتلعبي كيف اسوي بعد نزع الرقم بيديك الجريحه = نزع عرق السدره الخضراء بريح هبي واصبحت بعد الروى مع باقي الاشجار شيحه = شيحة فيها اليباس وراسها منكبي كم نصحتك من نصايح وأنت ماتبقى النصيحه =ياعديم الرأي حسنك لا نصحت تلبي أنت مغرور وتايه بالعبارات الصريحه = لايفيدك لاعلاج ولا يفيدك طبي الله أكبر كنت أسولف بالسواليف المليحه = عنك يوم انك بوسط قلوبنا متربي بالبيوت اللي عجيبة واللسان اللي فصيحه = أول الابيات مدح وتاليتها سبي الحياء والدين يمنع عنك من نشر الفضيحه = تركها أولى والسبب خوفا من الله ربي والختام اقطع علاقتنا كما راس الذبيحه = ذبها الذباح بالموس الحديده ذبي |
وهذه قصيدة بمناسبة دعوة الشيخ= حمدان بن عبد الحميد الحمراني لبعض مشايخ عوف = وعلى رأسهم الشيخ حميد بن منصور البنيان= أبتدي باسم الله اللي يدبر مايريد = من بدا باسمه توكل عليه ولا يضام عن ضيوف الشيخ حمدان بن عبد الحميد = بالاصاله والنيابه لكم منا سلام والتحية واجبه للقريب وللبعيد = والضيوف تقولها للمعازيب الكرام في حضور الشيخ عابد راع الراي السديد = زاد في تشريفنا زود حشمة واحترام شيخ له ذكره ومنصى عسى عمره مديد = يعرفه قاصي وداني من اسمه له وسام لو ابا أمدح مايسع مدحي أبيات القصيد = وان تركت المدح لاهله على مثلي حرام بارك الله في ابو ناصر في هالليل السعيد = ليل فيه النور غطى دياجير الظلام جمع الاصحاب ماهو على مثله جديد = ناس من غرب وقبله ومن شرق وشام بالمحبه والوفاء كن هذا اليوم عيد = والله انه عيد يالله تعيده كل عام كل واحد واله مطلب وهذا شي أكيد = مطلبه تشريفكم له وما فيها كلام عززوا هذا التواصل وحنا به نشيد = لاجل تزداد المحبه وهي قصد ومرام أجعلوها بالسرى وابتدوها بالعويد = والشباب يصف بعد العواده في النظام والشيوخ الهم قدر عنه والله مانحيد = كل واحد له معزه وله قدر ومقام يفصلون العلم في القول والزايد يزيد = فصلوا واللبس ملبوس في مسك الختام وعد ماصلى المصلين في بر ومسيد = للرسول المصطفى أزكى الصلاة والسلام |
خلاص انا بطلت مابغى منه شي = صادفت مجمول على البير يروي= يسقي من الاذواد تسعين ناقه وقلت اسقني شربه عذيه من المي = وقال مايزداد حملي وساقه وقلت العفو روح أنت عن شفة الطي = قدام لاتأثر عليك الحماقه مابغاك تزعل والزعل شين ياخي = بالخص يوم يصير بين الرفاقه قال ابتعد واجلس يابو زيد في الفي = ولف الرشا والدلو من فوق ساقه جلست ساعة ماعرف ويش ينوي = وبعد انتهى روح يباري نياقه وناديت باعلى الصوت ماكن يوحي = قفا وهف وعفت والله لحاقه خلاص أنا بطلت ماابغى منه شي = مادام مابيني وبينه علاقه |
الساعة الآن 10:19 AM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir