|
ديوان الشاعر محمد عبدالمحسن البدراني
العام دمعي دم من فـوق الاوجـان=وبالصدر عبرات الحـزن خانقتنـي واليوم مثل العـام مافيـه نقصـان=الاهمـوم الـعـام زود اعلقتـنـي وصار الرصيد احزان والجفن سهران=وكن الجبال الشامخه فـوق متنـي بسبـاب دنيـآ روحتلـي بـجـدان=بفراقهـم بخـلال عـام اصفقتنـي جيت القبور اللي لنا بكـره اوطـان=وشفت النصايب والعبـار احرقتنـي ووقفت فوق القبر ضايق ووجـلان=ودنقت احبـه والدمـوع اغرقتنـي ولديت راسي عقب ماقفيت شفقـان=ماودي اطلـع والغبـون ارهقتنـي ذكرت جدي وجـد جـدي كحيـلان=اللي عليهـم نـار بقعـى كوتنـي راحو هل الطولات ذربيـن الايمـان=والعين من فرقى الجـدود اابتلتنـي ياعين يكفـي لاتزيديـن الاحـزان=زرق الدمـوع النازفـه مانفعتنـي اللي بقى منهم ولو طالـت ازمـان=بفراقهـم ان مابكيـتـي بكتـنـي هذا مصير الخلـق والمـوت ديـان=ودنيـآ توطتهـم تـرى واطيتـنـي |
لاعاد علمن شتت الفكـر تشتيـت=على الرفيق اللي من اطيب ربوعي صابنه اسهوم الليـال المباغيـت=في ليلة الجمعه بتـال السبوعـي عليه دمعن تنزف العيـن هليـت=وانا ادري انه ماتفيـد الدموعـي انا ادري اني لو لشوفـه تمنيـت=أصعب علي إيصير من حب كوعي لكن عبراتن عن إخفايها ازريـت=ولا تـراي بحكـم ربـي قنوعـي في جيرة الله يوم ياضافي اقفيـت=في رحلتن مامن بعدها رجوعـي خليتنا ياللي على الطيـب ربيـت=ياطيب الجيره شريـف الطبوعـي وخليت خيلا بالسبق جالهن صيـت=اللي لهن وقت المسابق طلوعـي وريهام عقبك لو تناديك مااوحيـت=خطفك منها الحادث اللي يروعـي مرحوم ياحـرآ شهـرت وتعليـت=مرحوم يالسيف الصقيل القطوعـي يالله عسى في جنة الخلد لك بيـت=ويرحمك من يحيي هشيم القشوعي وينجيك ربي من مصير الطواغيت=يوم الحساب ويوم حشر الجموعي |
البارحه يوم ارتخى الليل ياحزام= هزت هواجيس العنا كل معلوق قمت اتفكر بالليالي والايام=والصدر من همن سطا فيه مخنوق احدن من الهاجوس والضيق مانام= وحدن على نغم الطرب ريح الموق ويومن جفني عن لذيذ الكرى شام=اخذتلي مع سجة البال طاروق وعلى الورق ياحزام دارن الاقلام=لمصافح القيفان يدفعني الشوق ياحزام يمنى الطيب ماتمد لخمام= محدن يعامل بالوفا راعي البوق اهل الردى كثـروا لهـم عـدة اعـوام=واللي مثل شرواك قلو يابن روق ياليت في وجه الردي رمز وأوسام=متبينه للي يشوح النظر فوق حتى نطق شعيل في قيد وخطام=من قبل عوجآ عقبها مقاضب حلوق ماني برجلي واطيآ روس الألغام=لاصار لي حدود مع كل مخلوق ون زلت الشيمه ورفن الاعلام=سليت سيفآ للمهمات مذلوق ماهو قريبلي من عيال الاعمام=حتى اني ادمح زلة إضعيف منطوق ولاهو رفيقن كاسبآ بالوفا وسام=يوفي لي حقوقي وانا اوفيله حقوق الحر مايرضى المهونه ولا يضام=يسطي بمخلابن مضاريبه تعوق يسبح بلجات الهوا فوق لاحام=وليانزل وكره على راس شاهوق من مامشى ممشى عواريفن كرام=مايستره ثوبن على الجسم مشقوق الرفقه اللي مابنوا ساسها كرام=لازم مع الايام يبديبها فتوق الرس مايروي ضمى ورودن حيام=والسلعه الهزله معي مالها سوق مااخاوي اللي بين الاجواد نمام=بالمجتمع ماهو على الخبث مسبوق هرجه لمن سمعه مثل قرصة الهام= يونس عطبها اللي به السم مدفوق يمشي على وجهين من بين الانام=جسمه رقاق وسمه براسه يسوق انا رفيقي مثل شرواك ياحزام=يامحزم اللي من عنا الوقت مرهوق ياللي ليمنى ابوك وعتيبه حسام=يابن الحرار اللي حموا شمخ النوق في نجد قبل يروضه سيف الامام=عبدالعزيز اللي عليه احكم الطوق صقرآ حكم كل الجزيره بالاسلام=وخلا الجهل في حبل الايمان مشنوق ياهل سيوفن تودع القاسي اقسام=وسرد الخيول اللي لها بالوغى لحوق ذباحة الحايل وللعايل كعام=المدح للي مثل شرواكم يلوق وقبل سلامن جاك لبياتي ختام=بعداد رعادن قفى صوته بروق وصلاة ربي عد من كبر وصام=على النبي اللي من النار معتوق اللي عسف بالسيف عباد الاصنام=بامر اللذي بامره غدا اليم مفلوق |
يوم القوافي جالها بصـدري زحـام = عديـت روس النايفـات الطـوايـل في مرقبن فيه ابرق الريش ماحـام = يطرقبـه النسنـاس والظـل مايـل عبرت من جاشي وولمـت الاقـلام = للسيـف سيـف وللمثايـل مثايـل صرفت قيفانن على خافقـي ركـام = من مصنعـن ماينتـج الا الجزايـل ويم العواجي صدرن ماهـن حيـام = هـداج صدرهـن لريـف الهزايـل اخاطـب العقـال ببيوتـن حـشـام = ولا عـن الجهـال مانـي بسايـل من قدم اليمنى لـه الجزلـه يـدام = ومن قدم اليسـرى يـذوق الملايـل كم من غشيمن طاح في حقل الالغام = يمشـي ورجلـه طشتـه بالحبايـل واللي على نفسه رضى حكم الاعدام = لاطـاح راسـه ماتفيـد العـذايـل يالوايلي كلآ على الواجـب حسـام = سيفن مصقل في نحـر كـل عايـل من دون ربعه ينطح رماح وسهـام = مثل الجمـل يبـرك لشيـل الثقايـل وحنا على الزلات صاحيـن ونيـام == في حـال ولا حـال اشـب الفتايـل قلبي على دوس المعاسيـر مريـام = ماهو جفولن فـي نهـار الصمايـل حربي وربعي حـرب لطامةخصـام = اهل السيوف المرهفـات الصقايـل بالحرب ماقد نكسوا روس الاعـلام = يوم القبايـل بيـن صايـل وجايـل واليـوم مـن الله علينـا بالاسـلام = راح الزمان اللي بـه الـدم سايـل جتني بيوتـك يـاذرى كـل منظـام = وميزت طيبك يوم شفـت الرسايـل مرد عاقل عن قشاش الوطى شـام = جواهرن من نظـم واف الخصايـل ومن طيبها الهاجوس في بحرها عام = (ومشيتلك ممشاك يابـن الحمايـل) للمعرفه شرطـن وللخـوه احكـام = ولاحكامها مانـي لشـرواك قايـل اللـي يقدرنـي ترانيـلـه حــزام = بالضيق لونه مـن اقصـى القبايـل ولا الردي لوهو من عيال الاعمـام = مالـه معـزه عندنـا يابـن وايـل الحـر حـر ولايصاحبلـه خـمـام = وبين النشامـا قالـو الشـك زايـل |
لا ياقليل العرف لاتقرب النار=وانته جنوبك يالضعيف صخيفه لوكان عندك سيفآ ابلج وبتار=ماظن تسطي فيه يمنن ضعيفه ياذا الكديش اللي له اخبار واذكار=في سكة اصحاب العقول الخفيفه مانت المعزب يوم حليت بالدار=حتى نقول فلان قصر بضيفه عليك قد حطوا هل العرف رادار=لاتحسب ان العين عنكم كفيفه مالك ببنك الطيب درهم ودينار=ولو تحتزم بسلاح مامنك خيفه ياللي عن اعدود الروى حبالك قصار=حشرت نفسك بالثياب القضيفه البوم مايذكر قنص فيه صقار=ولو صف ريشه ماينومس رفيفه له حومتن تقصر عن صقور سنجار=اللي مواكرها بروس المنيفه للخيل خيالآ صميدع ومغوار=إتنومس فعوله ليا سل سيفه وإن اعتلاها واحدآ هافي اشبار=ماذاق من مركاضها الا الكليفه لا كاسبن كسبن ولا ضادآ اخطار=مايحتزمبه للأمور العنيفه تعرف هل الوقفات لاصار ماصار=ولا الرخا كلآ فراشه قطيفه واللي غزا في بندقن مالها عيار=النصر ماهو بالنهايه حليفه ليا ارتكاله بالبلاجيك بيطار=خلا دموعه من ندبها ذريفه وعن الصحيح ان كان طاشن الانظار=ماينفع القراي ما بالصحيفه الطايره مايقودها غير طيار=ليا اقلعت مايطشها بالحتيفه خبير بااجهزة التحكم لياطار=وكلآ حسب عرفه يحط بوظيفه يارجم ياللي لك معزه ومقدار=بقلوب راعين الطبوع الشريفه عسى المزون اللي بها البرق سمار=اللي رعدها غادينله وحيفه تنثر على ترابك غزيرات الامطار=وتقش عشبن يابسن تقل ليفه عشبن مهشم كاسي اوراقه غبار=محدن رعاه وكل نفسن تعيفه وعقب المحل تنبت بختري ونوار=واللي رحل يعلن لدارك نكيفه دنيآ بها شفنا غريبين الاطوار=قامت تداحم بالمتون النحيفه ولا انت ياكحيلان يامكرم الجار=ياوافي الاشبار ياريف ضيفه يكرم جنابك يالوفي يابن الاحرار=عن واحدآ حطوه عقبك خليفه اللي ركب ريمه علي أمس واغار=عندي له سيوفآ حدادن رهيفه لاشك من ربعن حشيمين واخيار=ليته يفارقني ويذلف بكيفه ماودي المدفع ينوشه ليا ثار=ولا ودي تطبح عليه القذيفه لكن حداني ثم غنيت الاشعار=من عقب فنجال الدلال النظيفه |
وثقت عرفي ببعض الاشخاص توثيق= ووفيت معهم في حقـوق الصداقـه وحملت نفسي لجلهم فوق ماطيـق= ابيهـم ليومـن قـويـآ طـراقـه ويوم التفت وصحت مع يبسة الريق= متخالطن فـي الزعـل والحماقـه راحو كما جولـن رمـوه التفافيـق= مامنهم اللي ساق للضيـق ساقـه ولا الرجـال الطيبيـن المطالـيـق= تكرم لحاهم عـن خطـاة الهقاقـه وقمـت اتمعـن يابـدر بالمخاليـق= في كل منلـي يابـدر بـه علاقـه واثر الرفيق يبين في ساعة الضيق= (ولا الرخا ياطيـب كـل الرفاقـه) |
اذوب مع الشفايف والرموش العكش واللبه=واضيع مع الجديل اللي على الاكتاف جا منساق ألا ياعنق ظبيآ حطه الرامي على الحبه=رماه ببندقآ سردا ولاصابه بها التفاق تذير من ندبها وفز واقفى مع هكا الخبه=عقب مازمه العبرود وأذراه الله الخلاق ورى حدب الضلوع العوج كن النار مشتبه=ليا ارخى رمش عينن فوق خدآ كنه البراق درقني لين جود خافقي ثم قام يلعبه=وذبحني في عيونن كن فيها من النعاس إرهاق افز من المنام ليا حضر طيفه وأرحبه=شبكنا بالهوا وصرنا سوات الطير والمسباق ليابرقت في وصفي لاوالله اني أسبه=تعالا الخالق اللي توجه بالزين والأخلاق توادعنا وكلآ راح فيما قدره ربه=وعلى عهد الوفا كلآ حلف ماينقض الميثاق عسى ذاك السحاب اللي نشا دفاقه يصبه=على دار الهنوف اللي خفق قلبي لها مشتاق |
انا لاضاق صدري قلت اسج الرجل مع هـلال = رفيقن خوته تجلي عن القلـب الشقـي همـه مادام انه على يمناي مـاوالله يضيـق البـال = مثل نواف اعـده ياعـرب فـي ذمتـي ذمـه سقـاك الله يايومـن لـداره يرسـي التمثـال = احط الشرق عني شرق واصلب موتري يمـه نبا نسج القدم في صحصحن عله صدوق خيال = قطاعين الدبـش ماقيـل فـي مفـلاه ملتمـه شقوق السيل واسمتن شعيبه يوم قاعه سـال = لياجيـت الشعيـب لياجروفـه منـه مندمـه وبطرافه بشب النار وابا احكـر لنـا الفنجـال = بعيدن عن هل الوجهين واهل الحسـد والنمـه ونبى نقنص لصيدن بالوعر دايم لهن مدهـال = محنيات القرون اللي مثـل تقويسـة الضمـه ليامد الموالـي بندقـه طشـه بقـاع الجـال = الا واعزتيلـه مـن لهيـب الملـح لاخـمـه بساعتها لون الجيب مابه غيـر نـص ريـال = حرم اني ماغبط اللـي يحـب المـال ويلمـه ولا يالسيف الابلج يالنداوي ياعريـب الخـال = الا ياعد هداج اللـذي يـروى العطـش جمـه لعسرات الليالي قـو بـاس وللثقـال جمـال = مثل شرواك ياللـي للجـزال مشمـرن كمـه انا لك سيف ياهلال لامـن الدهـر بـك مـال = ترى كاس الضنك من دون مثلك شاربن سمه انااعرف الحرار اللي لهـا بالشاهقـه منـزال = واعرف اللي ترفرف بالحظيـره ماتجىالقمـه طويلين الشبور ارخص لهم روحي وكيس المال = مدام ان اللي بصـدري يـدق ولاوقـف دمـه وعدو الطيب ماني له خوي لو قال كيف الحال =لونه من بني عمي وابويـه صايـرن عمـه |
من عقب ماقدرك على الراس والعيـن = اليوم عندي صـرت حسبـة ربايعـك مانـي ونـا محمـد اخـاوا الردييـن = لابـوك لابـو مـن تقفـاك يتبـعـك انــا وفـيـآ للـرجـال الوفيـيـن = ولا انت تلقى مـن طبوعـه طبايعـك العام سيفن لك على العسـر والليـن = امدلـك يمنـاي لاطحـت ورفـعـك وعوجاك لو جتني بكبـر الضلاعيـن = اصد عنها تقـل مااسمـع ونااسمعـك لي بندقن ماهـي بتخطـى النياشيـن = سابـق ندبهـا لـو بغينـاك يجدعـك عن نهج منهـاج الرجـال الحشيمـن = قلي وش اللي يااسود الوجـه يمنعـك الحر للعليا يرف الجناحين = وانته طمان القـاع غايـة مطامعـك النفس شامت عنك يابـن الشجيعيـن = وخـذ ماجنيتـه خلـه اليـوم ينفعـك يوم استوى الطـاروق غنيـت بيتيـن = بغيت فيهـن يابـن الاجـواد اودعـك وياحلوووو قطع الوصل من بين الاثنين = لاصار قلبك من حدى الخلق موجعـك |
هلابك هلابك يوم لك يالوفي مقدار=على ضو موضوعك بيوتي بسويها ترى مابنا صمله على جيزة المسيار=ولالي بها شف(ن) ولاني بباغيها انا شفي بشقرآ كحيله وبنت احرار=هنوفن شمال طويق تذكر مرابيها لها شفتن حمرا وخد(ن) كما الجمار=هنوفن تزين كل قاعن مشت فيها تصادفت معها يوم رادت لنا الاقدار=سقى الله يومآ فيه جينا لأراضيها تدرج لها مع (جو ريمان) شقح بكار=على جيبن اشهب والدداسن تباريها شعاها غلا نياقن غوالي لهن اذكار=لهن تقصر الممشى وتمشي مماشيها وقفنا وسولفنا وكل الهروج خيار=تكفيني البسمه لياجيت احاكيها وتال العهد فيها عقب طيحة الامطار=مع نياق ابوها يوم جينا مفاليها عسى البرق فوق ديار غض النهد سمار=وينثر عليها المزن وبله ويرويها على شان لاقام يتصافق بها النوار=وشيف الخزامى نابتن في مراعيها ابى آخذك ياظافر معي يم هاكا الدار =على شان تنظر في عيونك وتوحيها ولاشفت غروآ فوق وجهه يحط خمار=وشفت الرموش اللي على الخد يرخيها هكا الساع انا ابنشدك عن جيزة المسيار=ولا ظن ياظافر تبى تقتنع فيها |
الساعة الآن 04:15 PM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir