من هجوسٍ كنها البنك التجاري=لاطراى محرافها ماتستعيره
لو هدفها منطقٍ ماهو حضاري=ماتخليني ليا شاء الله بحيره
يالهاب الوضع مهو بختياري=الرقابي زلهته عندي كبيره
ريف من جابنهم قطم السماري=كل واحد محفيٍٍ عقبه بعيره
لنشاما والعشاء عنده محاري=ماهو اللي دوم في ربعة قصيره
دون لنقص بالنظير وبالمباري=عن حسبهم ازبن الله واستجيره
يوم صار العلم له كاتب وقاري=تحت نور الشمس في عز الظهيره
الحقيقه جاك يامفلح قراري=بعد ساعه تسمعونه بالجزيره
يعتبر تعميد تعميمٍ وزاري=وغير ربي ماعبدت ايلاه غيره
فرق ممشانا مثل مرمى السواري=لاغطى راس الهدف نصف الشعيره
خص في عرقين وعرات ومذاري=حولهن مايهد راع الطير طيره
شفت شئ واقعه بين جهاري=السفاري كشخت الناس الفقيره
بالنفود تسحبه خجم اللواري=ان عرفله مصنعه حطه صغيره
ان زعل راعيه من حقه يجاري=وان تركنا لا ملام ولامعيره
ان وقف من فوقه التيار عاري= ونجلس وافلح بها ماهي كثيره
الفخر للي على الجوده يماري=وارد مشهور يفخر به خبيره
وارد الفكس آر مامون البراري=مركب اللي جايب بشته وزيره
ماشيٍ بمهمةٍ فيها اضطراري=كنه اللي هد من ماكر وعيره
وامتناني لنشاما واعتذاري=للامور مداعبه وإلها سريره