صاحب معي صافي النية=مايغيب في حزة الميقاف
لاله عليه ولا ليه=غير الصفا والقلوب نظاف

مادامت تقول مازيّه=وحاز الشهاده من العراف
ماظن بيدوّر الفيّه=لابد وقت الطلب ينشاف

رغم انها حروف شكلية=مكتوبكم جاوز الأوصاف
حاوي على رموز نوعية=سناه عدى حدود القاف

بديت بحروف مقريه=ولا فيه عمله بلا صرَّاف
ودام العرب نارهم حية=من بينهم مايصير خلاف

سجل براهين فرضية=ترصد لنا الخط والميقاف
والا دلالات فرعية=تمشي على حكمها الأعراف

من خاطري جات مبنية=بالود ماهي على محراف
ونص المثل جات حرفية=مثل العلم والردود أصناف

ما تُعْبُرحروف عادية=ممن تعلَّى على المشراف
تاتي مع ظروف نوعيَّة=مضمون ما للحلول أنصاف

ردود الأفعال شخصية=ومن لامشى في الخطر مايخاف
ومن خاف هجمات عكسية=أكيد يلعب على الأطراف

في القول نسمات بحرية=وتقدير عمق البحر إنصاف
نلمح إشارات ضوئية=تعطي الحقيقة بدون اجحاف

من لاحسب ذيك مع ذيه=وقت السعة الحمول خفاف
يطلق تصاريح ناريه=وأكبر مثل عندنا الصحاف

ما تدوم الأخبار مخفية=ويبقى جدار الخفا شفاف
لأهل البُصُرعين علوية=وانا لعالي الثمر خَرَّاف