ملتقى قبيلة حرب الرسمي - مجاراتي لقصيدة الشاعر الكبير عبد الله بن زويبن الحربي

قصيدة الشاعر العلم:

يـا مـل قلـبٍ هواجيسـه يسجنـه= سج النضا بالمطـارق والمشاعيبـي
هن ودهن كل روضٍ زيـن يرعنـه= وهم ودهم بالمسا عنـد المعازيبـي
يوم انتهى كل ما بالخـرج والشنـه= تواعـدوا بيـت نطـاح المواجيبـي
شيخٍ صدى صوت نجره كل ما دنـه= يقنب بروس النوازي قنبـة الذيبـي
يرخص خروفه ولا يبخل علـى بنـه= ويشكر ويذكر ليا عدوا هل الطيبـي
تريحـن وأمرحـن يومنهـن جنـه= وأنا الهواجيس تسرح بي وتسري بي
راحن بقلبي ولا أدري ويـن ودنـه= أخذت في جوهـن غفـوة وتغييبـي
سجيت معهن علـى فلـمٍ يعرضنـه= عن غيب بعض القرايب والأصاحيبي
ابليس لـولاه كـل النـاس بالجنـة = لاكــن يلعبـنـا راع التلاعيـبـي
يا شين بعض الأوادم لو ضحك سنه= يضحك بوجهي ويشذب في عراقيبي
واللي ليا غبت غوجه للطـرد عنـه= وجّرد سيوفه عطيبـات المضاريبـي
هجرت كـل الـدروب اللـي يمرنـه= أخير لي من مجيه ، عنـه تجنيبـي
ولو ما أقتدي في كتاب الله والسنـه= خليت كلٍ علـى دينـه يصلـي بـي

و هذي مجاراتي:

يا وجهي اللِّي احْرِقْتِه لفحَة الكَنَّه= و باقي الجسد كنّ يلعَبِّه مشاذيبي
كنّ التهامي كسا جسمي و يبرنِّه= ما باقي الا العصب و العظم والشيبي
و الا تحت رحمة اطيورن يلوعنِّه= ما بين عكف المناقر و المخاليبي
سِبّة هواجيسي اللِّي جت لها حَنَّه= تسري مساري و تِتْفنّن بتعذيبي
تتابعن كنّهن رِتلن من الرَّنَّه=لا ورّدت للعَلف من غير ترتيبي
جَنْ يعرضن لي معاناتي و اعادنِّه= مع بعض ربعي و مع بعض الاجانيبي
اللِّي تبَطِّن خلاف اللِّي يورِّنِّه= ناسن "سَلوليّتن"* في السِّر و الغيبي
طريقها مهّده و املاه ابو زنَّه= يومه فتن أمّنا و آدَمْ بتكذيبي
من عقب ماهم سوا في جنّتن غَنَّه=فرقهم ابليس تشريقن و تغريبي
و بعضن من اعيالهم ما خيّبوا ظنِّه= يمشون في خدمته مع كل ترحيبي
لا صِرت معهم يورّوا طِيبْ و امْحَنَّه= و لا غِبت عنهم كلوك ابسطوة النيبي
و مثلي ألاعيبهم ما و الله اغْرنِّه= أعْرِفْ طريقي بلا شكِّن و لا رَيبي
أمشي على سنِّة الله و انعَمِ ابمَنِّه= و لولا تعاليم ديني بان بي عيبي

* نسبة لعبد الله بن سلول