يابو طلق غبت عنا ليه=ماهي عوايدك تنسانا
غيبتك طالت بلا تنبيه=وحضوركم عكس ماكانا
هذا سلامي ولك مهديه=مني ومن كل اعضانا
وحشتنا وقلنا ويش فيه=عساك طيب وفسقانا

خلاص طابت معي فالارض= بآشد لك يالقمر بكرة
من وين ماجيتها تعرض = واعرض ليا جاتني مـُـكره

ياليت عندي بساط الريح = ولاّ مصابيح سحرية
وآطير وانزل لهم تجنيح = ولاّ يجيبوونهم ليـّـه

ابو طلق=
قضى الشهر والتهاني جات=كلن يعايدك برساله
أحدن بدع من صميم الذات=وأحدن من الوارد إرساله
والشاعر اللي في هاللحظات=ماجاد من صافي أقواله
لساع مابين شيل وهات=نشبان للحين فأشغاله
ماهاض ماحس باللذات=اللي تراقص مع هلاله
وآبو طلق شايل الأبيات=فالخبت ما غير مواله
هايض مع مداعب النسمات=كن السعد حازه لحاله
يرسل للأصحاب تبريكات=ما عمم اليوم مرساله
فال السعد شاف له آيات=يالله عسى فالهم فاله
ولعلها عالي الجنات=منزال صحبه ومنزاله
.=
بخيتان البشري=
قضى الشهر وابتدت دفعات=فيها المراسيل شغاله
احدن نقلها من الصفحات=واحدن كتب ماطرأ باله
وابو طلق راعي الجزلات=زود على حالتي حاله
ارسل عليه انا بالذات=حروف غنيتها لاله
مايوم خابت به الهقوات=والهم من داخلي شاله
اخوك يابو طلق مابات=غايب لبكرة عن عياله
هذا السنة حلت النوبات=ياصاحبي مالها وماله
تاجيه في اجمل الاوقات=وتبدل احوال بحواله
متى تعدل لنا هيهات=الكل منا على جاله
دام الفلك تحكمه دورات=عسى البخت حظنا ناله
وإن كان وإنه علينا فات=فالمقبلة قول لي قاله
ولك التهاني بمليارات=ولك السعد يفتح اقفاله