|
لي هاجس ٍ مايستثير الضعيفه = يبعد عن الي ماتصل منطق العرف يبعد عن الي لاوزنوها خفيفه = مثل الذهب يفرق على عملة الصرف ولاني مقدي للعيون الكفيفه = ولا حرَف الموضوع عن وجهته حرف وكل ٍ على ذوقه وفنه وكيفه = يسبح بحر وإلا يغرف البحر غرف الشعر ادب مثل الجبال المنيفه = ينفى الغشيم الي يبا يزرفه زرف من لاحمى شلفاه ماشال سيفه = ومن لاينوم طرف ماسهر لطرف تبقى البيوت الشامخات النظيفه= وتفنى البيوت الي تهايل كما الجرف ولي مع الشعار مثل السفيفه = لا محرك ٍ هاجس ولا مغير ٍ ظرف كل الفصول الاربعة ماتضيفه = مثل الارينب دايم اذانها شرف فايزموسى البشري= . |
الشعر هاجوس
الشعر هاجوس وثقافه وفكره = ترافق احساس ومشاعر مع ابداع ولا كل هاجوس ٍ اليا حل ذكره = له طربة انواع المشاعر والاسماع ولا كل من هو جاب له بيت حكره = من فكرة الواقع يصل حد الاقناع احد ٍ يصل في هاجسه حد سكره = سكرة فكر ماهي بسكرة تقرباع تسلسل الافكار حبل ٍ ب بكره = لفته بعد وقفه وهده ومشلاع وحد ٍ يصلفقها ولا يحل شكره = لا مسقين ضامي ولا مشبع اجياع للبوم يوجد عش والحر وكره= يفرق عن طيور ٍ بها اشكال وانواع فايز موسى البشري |
ماضاع للحربي ولا حق مسلوب
هم ٍ يرج القلب رج المدافع = الي ترج وكل مدفع على صوب بيدين حربي بالشدايد يدافع = الي عدوه دايم الدوم مغلوب ماقلتها مادح ولاهو ترافع = ماراح للحربي ولا حق مسلوب لابان من وجهه عن الحق سافع = حنا ندقه دق حتى انه يتوب ولاهو قصور بكل رجال نافع = اهل الشجاعه فعلهم دوم محسوب والي يتخفى تحت سود الملافع = لو بان راسه بأول عيار مضروب والله فلى يشفع اله السان شافع = ولا فعل فاعل ولا راس معصوب فايز موسى البشري |
يالآدمي
يا لآدمي ياكثر ما تحط ثم شلت = لا كثرت اقوالك تردت افعولك تركض بهالدنيا معنا ولازلت = مهما وصلت تعد ماحد ٍ بحولك لو كل ما تبغاه له نلت ثم طلت = على الكواكب تي تثبت نزولك العمر لك محدود لاكن اليا سلت = سل الكريم الي محدد وصولك الناس ماتنفعك مهما تجملت = لابسط خطاء يجيك شي ٍ يهولك ينسون ماقدمت والي لهم قلت = يأقل منهم بالوفاء وقفولك يبغون منك والا انتهم منك ثقلت = اسماعهم لو انهم صفقولك ابرك لحملك وانتهض لا تحملت = ماحد ٍ بشايل عنك صافي حمولك ثنتين لا تهمل ولو إنك اهملت = احفظ لدينك واحتمي دون قولك لا صرت متعافي وتشرب اليا اكلت = وتنام وعلاج المرض ما صرفولك ولا سعيت بظلم ولا تعجلت = في دينة ٍ وسط المحاكم سعولك تراك تملك كنز مهما تغافلت = مار احمد المولى بفعلك وقولك فايز موسى البشري |
يا رفيقي
ما عادني يارفيقي مثل مانت تخبر = افز واقوم ما يثر علي المقام داهمني الكبر والا حق ما من كبر = شيخوخة اليوم صارت مثل قولت سلام وفقدت ثنتين والدنيا دروس وعبر = من بعدهن تقل اشوف بوسط عيني ظلام من اول اعلم الغيري فنون الصبر = واليوم ادور صبر والوضع ماهو تمام وصار النظر به شجر واحيان جو ٍ غبر = كم مره اقف وسأل الناس هل به عسام الوقت هذا تغير صار باعه شبر = شبعوا به الناس لاكن المشاعر حيام نصبر لعوجاء الزمن نجبر لمن لاجبر = نكبّر صغيّر ونركض وراء الانقسام نسلى وندله وحنا مقتفين القبر = ونقول بكره نتوب ولا علينا ملام والموت برقابنا في كل يوم ٍ سبر = يقرا نهايتنا من قبل وقت الختام صادر قرارك لو انه ماكتب بالحبر = من عند خلاقنا محيي رميم العظام يالله بلطفك وعطفك لاصدر بي خبر = وغادرت بالرحله ولفوا على الجسم خام فايز موسى البشري |
الخلى الخالي
[IMG]https://6.top4top.net/p_1310bay1m1.png[/IMG]
|
خلوني اسج
|
|
الخوي
|
بعض الهرج
G]
|
الساعة الآن 06:25 AM |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir