مشاعر الود كيف تهون=لاعبرت عن خفوق محب
يلعبها اللي عليها يمون=ويطشها في عظيم الكرب

لا واوجودي على الايام=ماباقي ألا تواليها
كثيرها لو حسبت أوهام=وقليله أرباح راجيها

كيف التقي للملايم درب=واجمع شمل قلبي وفكري
لاسار كلاً خياله خصب=وعنده من الحس مايغري

ياهاجسي ماكفاك سنين=وانا أسيرك وحاكمني
خصمي وقاضي بنفس الحين=وبكل الاحوال ظالمني

نشوة فرح ليلها بـراق=تسربت في حمى غلبي
اخذت معها إلى الإشراق=مع ثورة الشوق في قلبي

عاد الامل وانفتح له باب= وجانا معه من نسيم الود
لكن اسايه على مرقاب=من يوم شافه وقفله ضد

وش له سبب يالذيذ النوم=طاوعت غيري وتعصاني
في عيونهم بالهنا مرسوم= وعن عيني تغيب بالعاني