الشوق زوّد معاناتي = والوقت صاير معي فعناد
واللي انغرس حيل في ذاتي = كيف اتركه والجروح اشداد

يا عزة النفس خليني= أشكي لهم لوعة المشتاق
يمكن بنظره يراعيني = ويخفف الهجر والأشواق

مهما الصواديف تلويني= وربعي يقولون لي جافيه
ماحد من الناس يشقيني= يكفيه قلبي وجودك فيه

صدق الأحاسيس خلتني = أبحر معه ناسيَ الأخطار
وعيون فلهود طشّتني= ما خِلتها توهّق البحّار

مديت يدّي لك وسلّمت = والقلب تملاه اوجاعك
وعجزت اكسر جدار الصمت= اللي انفرض لحظة اوداعك

غالي عليّ حقق المأمول = كاد العدا وبدد اظنوني
لون الشفق في شفاه يقول= أنا عطيْت الشفق لوني

شكى القلم من كثر بوحي = ذابت وسط حبره الآهات
بكى على كثرة جروحي= وما صابني في صميم الذات

حاد الزمن ليه عن مبداه= ولهـوده الـيـوم توجعـنـي
وبير كنت ارتوي من ماه = من دونه اخطـار تمنعنـي

ياكم به الود ينخمّي= ما يحسب حساب للمُبهم
يفقد حياته من الغمّي= وماحد على ميتته يندم

اللي شغلني غرامه بحر= يحتاج غوصه عنا وفنون
ماشفت قبل رموشه سحر = ولا شفت مثل العيون عيون