اسألك وابقى اجابة ذوق = مابقى اجابه سياسيه
الود دايم مقامه فوق = ولا مثل شمس مع فيّه

الود بين البشر له سوق = وله على الكون محميه
ومع كل مخلوق له صندوق = وله مفاتيح ورديه

الشاكر أبو سامي =
سلام مرسول ومسطر = بالطيب منصاه أبو عساف
اللي على الذاكرة سطر = تاريخ ماضي علينا طاف
العويـــــــــــدة =
يامرحبا والسلام أكبر = ياسيد البدو والاشراف
يامنهل العرف والمصدر =لليوم حماية الميقاف
الشاكر =
تبقى وفي ماقفك تشكر = وفي المندى فاح عطر القاف
ولعلنا باللقاء نظفر = حتى تحقق لنا الاهداف
العويدة =
ياستادنا الحق ماينكر = وأنا معك ماعلي خلاف
العذر لله وأنت أخبر = موجود بين الثقال خفاف
الشاكر=
ماحد على الطيبة يجبر = ياللي توايقت بالمشراف
لكن أقول أنت ماتعذر = عشم ومجلسك ماينعاف
العويدة =
مثلك على الطيبة يشكر = ومثلي على الطيبات يشاف
لعل من عافكم للشر =لا ضيّف ولا نهار يضاف
الشاكر =
أحلى من الشهد والسكر = تزاحمن الورود قطاف
طيب نبا بالنبا عبر =ولا له مع أهل الكلام أوصاف
العويدة =
يابحر يازاخر الجوهر = صاف الثمر كامل الاوصاف
والعلم يبغى الذي يسهر = والجهل يبغى الذي مايخاف

ياربع لاثار بركاني = وجتني هواجيس مجنونه
مدري غني لخلاني =والاّ على طعون مدفونه

مابه جريمه بلا جاني =والنفس بالحكم مرهونه
استفت قلبك والاعياني = والرجل يقدنه عيونه

بحـر الهـوى خضت في أعماقه = ابحث عن اللؤلؤ المفقود
لكن ماسد لي فاقـه = اللي جنيته من الموجود

بعرض قضيه على الشعـار=اللي لهم بالهـوى ماضـي
وش حيلة اللي يعيش اضرار=وطرفه عن النوم متغاضـي
كيف العمل حـارة الافكـار=لاصار خصمه هو القاضـي
ابغى حلول ٍ عليهـا اقـرار=والعقل في رايكم راضـي

اعرض قضايـاك لاتحتـار=لو هي طويلات واعراضـي
دامك شقي ذايـق الامـرار=وتراعي البـرق لاناضـي
وما دام خصمك شديد وجار=وقاضي وفي نفسه اغراضي
عليك بالذكر في الاسحـار=وعن ماتجد فيك تعتاضـي

يرزم رعد غيث فى نوه=اخيل فالمزن براقه
شفت الحيا فى سنا علوه=لعله الخير فسياقه

برق الحيا شاقني ضوه = وكل المخاليق مشتاقه
والبارق اللي بدا توه = من فيض مولاي وأرزاقه

يامعاتبي لاتبكيني = ادرى عليه وبيه روف
ماتدري البعد مضنيني = وجمر الغضى شب وسط الجوف
باستأصل الشوف من عيني = وأعطيه عينك عشان تشوف
تشوف مابينك وبيني = بعد المسافة ومسرى الخوف

كل يراجع حساباته = مادام في حسابكم غلطات
وأنا اللي الليل ماباته = يوم ان غيري هني ويبات
واللي قطار الزمن فاته = لايلتفت في زمان فات
يضيع ويضيع أوقاته = ويشكك الخلق في الهقوات

صباح فوح الزهر والورد = وصباح بسمة طفل مسرور
يامن لكم جوف قلبي ود = ويامن لكم في سروري دور

ننسى ونقسى ولا نحتاط = كله أمل حسب نيتنا
لكن سبب لنا الاحباط = من لايقدر سياستنا

يامن لجل المآسي نال = وتلاحقت واتلفت حاله
لو ردها ينحصر بالمال = حطيت مالي على ماله
جتني رسالة على الجوال = فال الله أبرك ولافاله
صاحبك غازي نزيل الجال = دور العوض عنه بعياله
يسقي قبره المطر همال = من مزن ماكف هماله
وعساه ينجي من الاهوال = ومن ضمة القبر وأهواله
وفي جنة الخلد له مدخال = برحمة الله وأفضاله

ترحيب يروي ضمأ الضامي = ينعش مراوي مودينه
يذكر على مر الاعوامي = في قسوة الوقت وفي لينه

يامجربين الهوى فتنه = ونار لظى تحرق الأجساد
بلوى كما شجرة الكتنه = تبلى الشجر والعروق جداد

أبو ذياب=
مـن واقـع اليـوم متأثـر=ممـا أشوفـه وأنـا شفقـان
((أطفال)) في مرحله أخطر=حوله البكت يشرب الدخان !!
الشاكر أبو سامى=
ياكم شفتـم وشفنـا أكثـر=من شيء ماكان في الحسبان
نتائـج الـواقـع الاغـبـر=أعلام مـن سايـر البلـدان
أبو ذياب=
لِـلأن متِخيـل المنـظـر=ولاَزلت من واقعي ؟ حيران
وقـدام للأمـر يتـطـوّر=نعالج الموقـف الخسـران
الشاكر أبو سامي =
اعمل على حسب ماتقدر = بالنصح واللطف بالشبان
ومع فارق الصح والمنكر = يظهر أمل يبهر الاذهان

اللي بوجهين مانبغيـه = مثله خبيثين الاطباعي
ولا نبيعـه ولانشريـه = يقعد لحاله على القاعي

ياشوق نجد الف لك مبروك = مبروك من داخل أعماقي
في اشراف الاسرة بعد حطوك = نتيجة انتاجك الراقي

ياغصن مايل ورياني = وردك بلون السبايك ذيك
تمايل الغصن وأشجاني = وقال أبعد الشوك لايؤذيك
وقال أخذ وردي ورماني= واحضن قطاف الثمر بيديك
وقلت ماعاد يمداني = الفجــر سهّم وصاح الديك

الــــشــــاكــــر=
لو يعلم النـاس باوضاعـي = من حال يصعب على الكافـر
قلبي مـن الصـد ملتاعـي = واصبح من اعضاي متنافـر
الـــعــــويــــده =
عسـاه ينعينـي النـاعـي = لاصـار ماقسمـك الـوافـر
زايد على المـد والصاعـي = ياطا علـى الخـف والحافـر
الــــشــــاكــــر =
عن حقنـا ماقصـر باعـي = واشكرك يالصاحـب الظافـر
ومابيـن حاكـي وسماعـي = مـاودي حجابهـا سـافـر
الـــعــــويــــده =
حالي خطأ زيـن الأطباعـي = لامن لقـي صاحبـه غافـر
ولا ضاع طبـك فالاوجاعـي = ولا آخيل من يمـك الصافـر
الــــشــــاكــــر =
ظني بكـم صـح ماضاعـي = وخلـق الله مقيـم ومسافـر
حييـت يازيـن الاسناعـي = بعـد أيتـدم زادهـا القافـر
الـــعــــويــــده=
حنا علـى ديـن الاوزاعـي = شيـخٍ معـه علـم ويعافـر
وزين الرعيه مـن الراعـي = مير إسنع الـدرب يانـا فـر
الــــشــــاكــــر =
الدين لـه نـور وشعاعـي = والحـق لاصـاب مايـافـر
للصقـر مأكـر وميقـاعـي = والدرب واقـف بـه الخافـر
الـــعــــويــــده =
لابـد للديـن مـن داعــي = يا دافن الشـرك يـا حافـر
والصقـر للطلـع نـزاعـي = ما كافـر البيـد مـا كافـر
الــــشــــاكــــر =
كـم داعيـة مالـه أتباعـي = واصابعـه مالهـا أظـافـر
ويضرب بها أخماس وارباعي = ومنيحتـه درهــا جـافـر
العويده =
ما وحد الله بإصباعـي=امام حاكـم ومتضافـر
وماصار صارم وزراعي=لو اخضر الفن متصافـر
وما باع تاجر وما ابتاعي=وما قآيل الرجز والوافـر
هاديه ويصير مطواعـي=يبقى فسماكم قمر سافر.

سبب لي جروح مخفيه = في الصدر ماغير أداريها
مقرود يادافع السيه = الروح بالحيل مشقيها

بمناسبة واحد الميزان = المملكة في أوج نهضتها
في عهد عبد الله وسلطان = حقق لها الله بهجتها

http://t0.gstatic.com/images?q=tbn:j.../showImage.jpg

حبيت أبارك لكم بالعيد = والعيد بوجودكم عيدين
عسى الفرح بالقبول يزيد = ولعلنا الكل مقبولين

ياربع لاثار بركاني = وجتني هواجيس مجنونه
مدري أغني لخلاني =والاّ على طعون مدفونه

مابه جريمه بلا جاني =والنفس بالحكم مرهونه
استفت قلبك والاعياني = والرجل يقدنه عيونه

فكرت واليا العمر فاني = والقلب يشكي على غبونه
وان كان تكفل لنا فلاني = مطلوب معدال من دونه

نسير في عذب الالحاني= لاجات بالعلم مقرونه
وندخل الى العالم الثاني= والحكم يصدر وتوحونه

مادام بينت برهاني = ومديت والمد يرضونه
وش قولك في الجار لشقاني = ولا قدّر اللي يحدونه

الجار لو جار بالعاني = استلطفه لاتشانونه
ولا بد له سر دخلاني= دور على اللي يعرفونه

الجار سيفه على اخواني = وفي ناس بالشر يمدونه
ومد الدعاوي على اوطاني = ياللي لقافي تبارونه

لاصار طاغي وخواني= يلقن الدرس بفنونه
ولا عوى الذيب سرحاني = عشّه منه لاتكبونه

عشيته لكن عشاني = وفي الغار مزبن يخشونه
وكل السبب ضلع دخاني = باحجاره اللي يفكونه

ماعاد له فيه مزباني = جوله بواسل يدكونه
جوله طويلين الايماني = وحبة السوس مطحونه

الراصد =
سلام لاهل الوفاء والدان = وأسأل عن أسباب غيبتكم
في الموقع اللي لنا عنوان = زرنا ولا شفت مرتكم
الشاكر أبو سامي=
ترحيب من مكمل الاقنان = واللي تهمه سعادتكم
ماتعمر الدار والأوطان =إلاّ ليا شفت حضرتكم
الراصد =
تبقى لنا يارفيع الشان = أسعد ليا شفت طلتكم
وافي ولك بالوفاء عنوان =من سابق الوقت عادتكم
الشاكر =
من فيض الافكار والالحان = مشاعري بالوفاء جتكم
بين لنا الشرح في اللي كان = من شان نسعى لرغبتكم
الراصد =
كله أمل فيك والاخوان = في الملتقى أشوف همتكم
واليوم جيتم وتوه زان = والعز دايم في جمعتكم
الشاكر=
في منتدانا طوال أيمان =دايم على قد هقوتكم
مثل الذهب غالي الاثمان = كله على شان خدمتكم

اشرب سحابة غضب صدك = واروي عطش فكرك المشتوت
ياللي تجاوزت عن حدك = وخليت نبض الفؤاد يموت

ونّه ولااعرف مصدرها = القلب وألاّ خفايا الروح
هلّت من عيوني اعبرها = وقلبي من اسبابها مجروح

الشاكر أبو سامي =
سلام من داخل الأعمـاق=يضفي على البحر والبر
من غير دعوة نحث الساق=ولداعي الطيـب متحـري
قابل البشري=
ترحيب نوره على الافاق = يشعل كما الكوكب الدري
من قلب ياشاعر الاخلاق = يغليك فالجهـر والسـري
والشاعر الواثق العمـلاق = مثلك من الكبـر متبـري
من عادته للوفـا سبـاق = ماهو على الصد متضري

تبقون والجو معكم راق = والآن ميزانها قري
ترحيبكم عطر الاوراق = أحلى من الشهد والبري

عضو وفعال وبلا حد = في منتدى الشوق والاشجان
بمساهمة في سجل الود = من داخل الخافق الولهان

الكسرة من الشاعر / أحمد الفارسي :عبر الجوال =
الصاحب اللي عديل الحال = انت تحسبه وهو يحسب
تعطيه من عز راس المال = وألاّ تخصه من المكسب
الرد من الشاكر أبو سامي =
حسب الدلايل من الاقوال = وحسب القوانين والمذهب
الطيب بالطيب في الافعال= من شان الاصحاب ماتتعب

آنا اعرف إنك رجل صادق = وفي قولت الحق ماتجاحد
من كان يعدي مع السارق = فالمحكمه ينقبل شاهد؟

أنت رجل تعرف الفارق = للمفتي العام والناقد
والشرع مايترك الغارق = ولا يعفي المجرم الشارد

بحروف واشواق قلبيه = من قلب فيه الوفاء والشوق
تعم كل اللفاويه = بترحيب مثل المطر من فوق

سلام من خاطري منحوت = الريح ما تمحي نحوته
وآنا فبحر المعاني حوت = من يقربه يقرب لموته

ترحيبنا أغلى من الياقوت = نباه يسبق صدى صوته
لو كان بحر المعاني موت = الحوت به مالقي قوته

اقول لحروبنا زانت=زانت ليالي الهناء والانس
وان كان مالذاكره خانت=مابيننا ماتبقي حنس

بقدومكم زانت وبانت = أنوار ماكنّها ألاّ شمس
وحروب تبقى كما كانت = عاداتها بالوفاء مثل أمس

تعذرت معي صفحة ويب = واسبابها ضعف في الارسال
كنكتي أول سوات الذيب = واليوم يالربع حاله حال

أبو ذياب=
جـرح المحبيـن ذابحنـي=من أقرب الناس يالشاكر ؟؟
زادو أسى خيبوا ظنـي !!=والله الجفى .. يكسر الخاطر
الشاكر أبو سامي=
ماهم محبيـن سامحنـي=كيف اصبح الدم متنافـر
عليك ارى قوسهم محني=وانا أعرفك بالهدف ماهر
أبو ذياب=
ياكيف ؟؟ له حق يظلمني=وليا ظلمته انا خاسر !!
عندي له شهـود لكنـي=مرضى له القيل فالاِخـر
الشاكر أبو سامي=
عن سير الاحـداث فهمنـي=ونشاهد الوضـع ونناظـر
وفي القرب والبعد وش يعني=حتى أصدر الحكم واجاهـر
أبو ذياب=
عليه غلطات تجرحني =أزعل ولا يحس ويناظر
أعاتبه مايطوعني = يعيده مرار ويكابر
والله لولا الحي أني = أحاربه بس وأشامر
الشاكر أبو سامي=
الحكم ماهـو بمبلشنـي=لكن في وضعكم حايـر
بادر وسامـح وكلمنـي=أحسن من الحكم بالظاهر

الطواف=
ياصحاب حتى مانظلمها = نبغى من أهل المثل تفسير
لاقنعت النفس نرغمها = والاّ حسب ماتريد نسير
الشاكر أبو سامي=
كان القناعة تنظمها =عن موطن الزود والتقصير
الواجب انا مانحرمها = من فايض النصح والتقدير

اللماح=
ســلام لـهـل الـمـثـل والـعــرف=والـلــي لـهــم بالمـعـانـي ذوق
لجل ايش ماينقذون الحرف=اللـي هبـط بـعـد مـاهـو فــوق
الشاكر أبو سامي=
ترحيب مثل الذهب في الصرف = للصاحب المعتبر . مسموق
لاجل المثمن يغض الطرف = حسن البضاعة بحسن السوق

سلام يامشرفين القيل = ياللي لكم فالمعاني دور
أشوفه القيل قام يميل = والمسأله وضعها مخطور

ترحيب مثل البدر في الليل =ليلة صفا منه شع النور
نتيجة القيل بالتحليل = ووصف العلاج بيد الدكتور

الشاكر أبو سامي=
سلام واصحابنا يدرون = يدرون بالمعرفة والقن
وانا على فعلهم ممنون = إن كان ماهن وصى هن
الرد من الشاعر / عبدالله جابر المعبدي=
يامرحبا والصعاب تهون = من شانكم يازعيم الفن
على شرف والوفاء مضمون = مايقبل الشك وألا الظن