لاتعذلون اللي شكى الود محروق =محروق قلبه يوم جافوه الأريام
يا جاهل بالود من كاسهم ذوق =من بعدها تصبح بالاشواق هيَام
كاس المحبه ياعذيلي من عذوق= من ذاقه اقسم تالي الليل مانام
يجر ونات الأسى حرة الشوق =من ذكرهم يبكي ولوكان ضرغام
ولد الهوى مثل الخلوج الشفوق =يموت من كثر التوجد والأسقام
ياجاهل بالود...بالك... تجي.. السوق =الا معك قلب يجمل ليا سام
سوم الأصايل دايم الدوم مطبوق =واللي يريد الزين بالسعر روَام
ياجاهل بالود ذا الود مرفوق= بالشهد والعلقم به العدل وضيام
لاتتهم سيد المزايين بالبوق= ما مرك وده يوم شوقك به ازيام
عندي دواك إن كان ما للهوى طوق=خذها من اللي يفصح القول باحكام
غض البصر تسلم من الود بصدوق =لجل اول التهيام نظرات فرسام
لو يذكر المزيون ماحرك اخفوق= لكن شوفه يكوي القلب باجرام
هذا كلام الصدق بالقلب مطروق= عاقل مجرب كيف لذات الأيام

أبنشد أهل الود كيف الموده= وامر الجفا سايد على الود مفروض
حبل الوفى عجزت يديني تمده =واللي وصل حبله من الود محضوض
وانا عطيب الجرح والمر بده= لولا الدوا يالمر لمسيت مرفوض
مثل الذي ظامي وعد يحده= لكن فالعد الوبا للفنى قروض
ولا كما طير(ن) بعيد مخده =عند الرحيل احدى الجناحين منقوض
ولا كما طفل(ن) يتيم(ن) ووجده= شوفت حنون(ن) بين الاحاد محفوض
لاباس يا قلب(ن) على الوصل وده= ود الرضيع الديد والنبت للنوض
لاقيت من سيد المزايين جهده =مثل الجمال الهيم لموارد الحوض
سر ياديبي ووصل الطيب حده= حد الذي من زينه الزين مغضوض
ثم بلغه علمي وسلامي ترده =حتى على الجيران بالود معروض

جريت صوت تالي الليل معناه= من جوف قلبي للفطين الفهيمي
أخوك يا نواف يوصيك بوصاه= أحذر تبات ألا بالاسم الكريمي
وأحذر تقول أبوي والطيب يبراه= وأنته كثير النوم عظمك هشيمي
لكنَ خلك ذيب يشقى لمبداه= جمع العدا ولاَ على أهلك رحيمي
وافخر بطيَب فعلك الطيب منقاه=وأحذر تجاهر بالزلل يالقريمي
في وقتنا للشين ياخوي مزهاه=أحذر يغرك ليلٍ أسود بهيمي
وأنته سلالة حيد بالعز مرساه= كم واحد فالحيد هذا مقيمي
جدك ربا بونا وحنا على ارباه= رباه ماريكن لزين الحطيمي
صقر( ن ) على الماجوب للوقت جافاه= وقلبه بعذب العفو دايم سليمي
ياخوي منهو يتبع الشين يلقاه=ومن رام صيد الريم يظفر بريمي
وخالف هواك إن كان ماطاب مجراه =واجعل لنفسك من هواها خصيمي
واتبع نبيك واجعل اخطاك بخطاه=ايسرك اكتاب (ن) بفعلك رقيمي
وختامها صلي على اللي رضيناه= على أحمد الهادي الشفيع الحليمي