ياويش رجلٍ شب ضوّه من الخام = وبهر دلاله واكرم الرجل ضيفه
حطّم بدستور الكرم كل الارقام = في بطن واسعة القرار المريفة
في ديرةٍ لو قصّر الرجل مايلام = خالي وطنها من الشجر والحتيفة

أنشدك عن شيخٍ فرق حي عن حي = شيخٍ نزل في منزلٍ واستحلّه
وقف لقومٍ دونها العلم مطويّ = إلا الثلاث اللي عليها الأدلة
من دون حقّه للمهمّات يرسي = لوكان سيفه باللقاء ما يسلّه

ياويش عذراء شام الأبطال عنها = ما روضوها ناقلين الرهيفي
ساقت لرواّد الوسيعة ظعنها = على طريقٍ بالمخاطر أمخيفي
تزوجت رجلٍ يقوده رسنها = رجلٍ على بعض المواقف ضعيفي

ياويش ورعٍ كل ماينقص ايزيد = واليا ثبت نقصه على ربعته زاد
ما هو الثمين اللي يهم الأجاويد = لوكان بعض الناس سبب له اجهاد
لا يظهر الشوكة ولا يطوي البيد = ولا يشرب الماء ولا أيتغذى من الزاد

يا ويش ثلاث اسباع جيلا بعد جيل = يمكن كثير الناس فيهن يضيعي
سبعٍ تعشى له رجالٍ حلاحيل = يطيعه اللي للوطى ما يطيعي
وسبعٍ يحوّل بالجمال المحاميل = يسوقهن سوق العرب للقطيعي
وسبعٍ حكم شم الجبال المطاليل = حكمه غلب حكم المنيف ألرفيعي

يا ويش رجلٍ يوم بغى المرجلة قام = وفزع بمطروق الحديد العطيبي
عقب الشجاعة والعزاوي ولإقدام = عوّد ذليل وذل الأبطال عيبي
عليه من علم المثايل ولاحكام = علم لتوثيق الحقيقة امصيبي

ياوش بنتٍ في وطنا مقيمة = بنتٍ لها بالبدوا عهدٍ وتذكار
في حضن ملمومٍ عذيٍّ نسيمه = شبّوا به الأبطال يوم الوغى نار
في عهد شيخٍ بالمعارك صتيمة = ماينطحه خمسين فارس اليا ثار

ياويش عذراء ما تفارق وطنها = سعابها ميّت وكفّل بها حي
المشتري يدفع ضرايب ثمنها = مدام عقد البيع مبرم ومثني
الميّت بكبود المواري ركنها = على صخيف اللمس ما دونها شي