بالهجوس الصاطية خضت البحور =وأنتقيت اللولو اللي من عميقه
مثل لولو مايحط ألا فصدور =الجوازي يذهلك فيهم بريقه
لولو المعنا نظمته في سطور =وأتفنن بالحروف اللي رشيقه
ليلة فيها المصافا والسرور =مع عيال العم والخطوة وثيقه
مرحبا مليون ويفوح البخور =عود كمبودي عطوره من حريقه
بالرجال الوافيه نسل الصقور =الكوامل من زبيد اللي عريقه
أقدمو بالطيب والشيخ الوقور=محمد اللي كل طاله في طريقه
التجارة فمعرفتهم ما تبور =سلعة الرجال طيبة فالحقيقة
في حلال رجال ما تعرف قصور = الجبل ورقان فالواجب نطيقه
مرحبا باسم المعزب والحضور =من زواهر في ذرا العزه مويقه
قدمنا شيخِ على الماقف جسور =بالوفا واجبكم الليله يشيقه
شيخنا معروف من طول الشبور =من رجال دون واجبها حذيقه
وجمل الله ذكر أبو سامي بزهور =زهرة من إثر دعوتكم عبيقه
الليالي بالوفا تغشى بنور =مجلس الأحساب شرواكم شريقه
الزويهر من ذرا عزر النمور = من زبيد اللي فعايلها عتيقه
حلف ابن مجنون ودمانا تفور =الزويهر من عبا محمد شقيقه
علم ثابت بالحقايق والمهور =المهور اللي على ذيك الوثيقه
الزبيدي لا تكلم مايزور =مايزور ألا الذي خاف الوهيقه
ربعي الشامات بانين القصور =السلاطين اللي من تخصم تعيقه
ساس ثابت فوق مصموم الصخور =بيرق الحربي خصومه به زهيقه
قالها فواز من نبع الشعور =وأذكرو خير البشر ذكرٍ يليقه

من زعيم الشعر في رتبة مشير=ردّة التقدير منّي تاصلك
مقصدي فواز ياجبر الكسير=صاحب الميقاف عالي منزلك
صاحبك ينبيك بالوضع الخطير=بعد لاهو بالمشوره خوّلك
شاعر ٍ سمّوه بالبحر الغزير =لنته بجاهله ماهو جاهلك
بالحشا حسّيت نيران السعير=ولو ظهر لك ربع همّي هولك
وامرنا لله والله المجير=يازمان العشق ذقنا حنّضلك
والهوى من قال شرّه مستطير=والله انّه لانطقها ماكلك
دايم ايامه عبوساً قمطرير=حضّ منهو في طريقه ماسلك
واسلم وصلّي على الهاد البشير=واطلب انّه بالشفاعه يشملك
صادق المنطوق ذو الوجه المنير= الذي موحيه جبريل الملك
عدّ مادوّج على الدنيا بصير=وعدّ مايضوي بدورات الفلك

من صليب الراس وحروف الأمير=مرحبا تقدير جاك فمحملك
ياعميل الخير يالصقر الذخير=ما بنادم من مقاديره ملك
عفتها الدنيا غرور(ن) تستدير=من بها دوار وابهم تحتلك
إن ترجينا فهلها كل خير =تختلف كل الهقاوي وتفتلك
والهوى فبدايته زهر وعبير=شهد نحل (ن) في لسانك يحلا لك
والهوى مثل البحر ماله عشير=المنايا وسط موجه تذهلك
يتعب الغطاس فالبحر الغرير=وإن تمادى في غياهب انهلك
يصبح فروضة ويمسي وسط بير=وهم ساعه يالهواوي ضللك
غير ود(ن) فالصفا يعقب بخير= دربه الواضح بطيبه جملك
ود منهاجه كتاب(ن) من قدير=والسواير يارفيقي منهلك
من سلك درب النبي ماله ضرير=وأختم بحمد العظيم فمرسلك

ياحروف الشعر في ليل جميل مبتهج=جمليني في حضور أهل المعزة والمقام
فرحة فيها الهواجس فالضمايرتختلج=أبداع الفكرة وألبسها مع التاج الزمام
بنت يرغب كل شاعر مع مفاتنها يسج=جدها المعنى وأبوها يالعريبين الكلام
جيت أبارك يابن محسن بالضياء اللي سرج=تاج من تحته مقص وتستحقه من وسام
والقبيلة تفتخر باللي من أبناها عرج= في بروج المجد بالهمة رقا فوق الغمام
جاك تكليف وشرف جندي وطن فيها درج=كل رتبه كنت فيها ظفر ياطير القطام
ورجل يخدم فالوطن في بحرها ولا في فج=يكتسي بالبيض ويفرض له من الناس احترام
ديرة فيها المقام وزمزم ومنها خرج=خير خلق الله وفيها طيبة اللي به ترام
نفتديها بكل حال ومال وما عنها ندج=تحت حكم عيال ذاك الصقر بل ذاك الإمام
حكم قايم بالعقيدة وينفي الفكر العوج=دولة فيها المواطن مايخاف ولا يضام
آمنين وراغدين وشربنا عذب هدج=نعمة نشكر عليها ربنا رب الأنام
ما نزايد في وطنا كل معتوه هرج=ولا ندس السم وسط الشهد ونسقيه العوام
شرق داري مثل غرب الدار مافيها فرج=ومن شمال المملكة حتى الجنوب إلنا حزام
حضرها مع بدوها بالطيب والدين اندمج=كلنا واحد ولا نرضى يجي فينا انقسام
هاجس من خاطري مثل الصباح اللي بلج= يابن محسن عن جميع الحاضرين اهدي سلام
والصلاة الكاملة عداد من صلى وحج=لأحمد المحمود سيد الخلق والنور التمام

بدع الشّاعر/ خالد عبيد الاحمدي=
مفروض تكتب فعتقال السّنوسـي=اللـي بغـا يغتـال قايـد بلدنـا
من بعد غرّر به غريب الطّقوسي=لنّه على طيـب القيـاده حسدنـا
ولنّ المكر والخبث فيه امغروسي=يمكر لنا واحنـا عنـه مانشدنـا
ويزيد خبثه خبث خبث المجوسـي=واحنا له بطيـب الفعايـل جهدنـا
وبعد اعتمد بالغير شرّ النفوسـي=حنّا علـى ربّ السّمـا معتمدنـا
حتى بـلاه بوقعتـه بالطعوسـي=بنهايـةٍ بشعـه لهـا مـاوددنـا
يوم ٍ نهاره قمطريـر ٍ عبوسـي=في صدقها كلمـة ملكنـا شهدنـا
وماهي شماته في نصيب امعكوسي=عـن دربهـا ياربّنـا تبتعـدنـا
واللي يدسّ الحقّ رجل ٍ نحوسـي=والحقّ اقول انّه شجـاع وسعدنـا
لنّه ثبت وقت القتال الضروسـي=ماساب داره حسب فيـه اعتقدنـا
وياشاعر ٍ هاجسه طابق هجوسي=لـولا جزالـة قافكـم مانشـدنـا
مفروض تكتب فعتقال السنوسـي=وسجّل لنا فيـه انتصـار لبلدنـا
ردّ الشّاعر /فوّاز الزّويهري=
حي الجواب اللي سوات الفلوسـي=يابن عبيد الصّرف جـاك بسندنـا
ولاكمـا بـن الـدلال امحموسـي=كيـف النّشاما والبهـار فرددنـا
ماني بكاتب في كليبٍ ركوسـي=من بعد عمّه مات لـه مـا وجدنـا
من دار في ديرة فـدار ٍ دسوسـي=يشرب شراب الذّلّ لـه ماقصدنـا
ياكيف لـو لـجله جلسنـا نسوسـي=مايمسي ألا مكبـّل ٍ تحـت يدنـا
لكننا نرقـا عـن اللـي نجوسـي=شلّة هذاك الهيـس باغـي سندنـا
ذاق المرار وشاف طحن الضروسي=اعقاب ربّ البيت لـه مـا عمدنـا
ومن دون والدنـا لهبنـا قبوسـي=نفـداه بـالأرواح نحمـي مهدنـا
قول أكتب فذاك اللعيـن الخنوسـي=النّعجه اللـي فالبرايـا ضهدنـا
نعل الإيراني ذيل صيني وروسي=ناره على شعبـه نتيجـة رمدنـا
هـذي حقيقـة للليالـي دروسـي=والمشكلة من درسها مـا استفدنـا