قالوا عن مورخ حرب نثرا وشعرا

ـــــــــــــــــــــــــــــــــــــــــــــــــ ـــــــــــــــــــــــــــــــــــــــــ
مختارات مما قاله الشعراء:
1 ـ قصيدة للشاعر الكبير صالح بن دخيل الله الهذلي:
ألا ياهـل العيـرات كيرانهـن والـدرب
علـى نجـد سجـو فوقهنـه مـن القبلـه
على ضمر حم المناكـب بنـات العـرب
وابوهـن قمـران المسمـى وتسـب لـه
حراير هذيل أهل النضاء والقضاء والحرب
إلـى مـن دخـان المعـارك نثـر وبلـه
قطام الفخوذ منسعـات الـوروك وسـرب
عجار الكراسـع طلـق الايـدي ومسبلـه
من العشب كارب شامخ الني فيهن كـرب
رعت في صفار عقيربانـه وفـي ربلـه
زهتها السفايف والميارك وشغـل ذرب ,
وعصبان غـزلان الأشـدة تعصـب لـه
دماث القطي هكب المرادف خفـاف ودرب
تهوجل على صوت المحدي وتطـرب لـه
عطوا شرق نخله والمحاني ومروا ثـرب
وداورد والصفـراء وحسيـان والعبـلـه
وردوا على ديار المعزة بهن مـن قـرب
علـى دار رجـل زاد مـع طيبتـه نبلـه
على فايز الموسى القطامي مورخ حـرب
هجوس المعالق من ضميري تقانـب لـه
أهل ماقـف بيـن القبايـل عزيـز وذرب
بيوت الصخاء لطمـة عـدو تزهـب لـه
وعسى صاحبي تفداه قوم الحلوق الجـرب
هل الماكر اللي كـل بـوم يتجـاذب لـه
هواهم تجاميع الحكـي والأكـل والشـرب
والأنظـار منتكسـه والافكـار منعبـلـه
ليا جيت تجمع جاب قسمة وراحت ضرب
خسارة خزايز مجد الابطـال يكتـب لـه
ونبا منك راي في حلوله يقـص الـدرب
يرد النكيـف مـن اليمامـة إلـى القبلـه

2 ـ قصيدة للشاعر الكبير/ عبدالله بن زويبن المعمري الحربي:
البيـض يالـلـي تلبـسـن البـلايـز ـــ أزياء نظـاف ومبـدع اللـي طرزهـا
يالمترفات الزاكيات الغزايز ـــ اللي عليهن غالي اللبس يزهى
جــذر المـهـار محقـقـات الجـوايـز ـــ اللـي يحضـرون الشيـوخ إلـززهـا
خرس العيون مجدعات الجنايز ــــ رماحهن صم القلوب اتخرزها
مضرابهـن بالقلـب ماهـو مشـايـز ــــ ومن وين ماخيطـت تفتـق غرزهـا
كان الطمع بالطيب شومن لفايز ــــ اللي اليا شاف الطوال ايعنزها
له هيبةٍ ما هازها كل هايز ــــ عنها هل الهقوات تعلن عجزها
ترضخ له العدوان بعد المكايز ــــ ما هو شجرةٍ كل من جاء نقزها
على الصعيبات التعيبات حايز ـــ حقق هواه وروس ربعه ركزها
عز الله انه بالرياجيل عايز ـــــ لم الوثايق والحقايق فرزها
اهتم باللي ما تسبب حزايز ـــ واللي تجرح بالمشاعر قفزها
ويقوم بالواجب ويقضي عوايز ــــ ما لم من دينا الفنا ما كنزها
ملجمٍ راع الحكى والطنايز ــــ اللي يدور فرصةٍ ينتهزها
من لابةٍ للطيب فيهم غرايز ــــ وسلم عن السلم الهزيل يحجزها
وان قالوا البل يا عيال العجايز ـــــ جاها من المفلى عقيد نبزها
لحقوا على قب المهار الخزايز ـــ صقور جوٍ ما يروغ خززها
يركز لهم في عمر ساس وركايز ــــ والميم والحا يفتخر من رمزها
ما هم من اللي في نسبهم لفايز ــــ السبحة اللي كل لون بخرزها

3 ـ وقال الشاعر غزاي بن مطر الطريسي:
يافايز الموسى علومك جزيله ـــــ عليت راس المجد من مستواك
ترفع لك البيضا براس الطويلة ــــ يا ابن الرجال اللي يذري ذراكم
ياللي كتبت امجاد فخر القبيلة ــــ كتبت فعل جدودكم من وفاكم
عديت فعل أهل السيوف الصقيلة ـــ وعديت فعل شيوخكم وومراكم
أتعبت نفسك من سنين طويلة ــــ واسهرت عينك والحقيقة مناكم
تاخذ من التاريخ شاهد دليله ــــ وتاخذ من الراوي حسب ما عطاكم
تاخذ صحيح القول ما هو هزيله ــــ وعن الرذيل واقفات خطاكم
الصد والاخلاص عندك نفيله ــــ والوجه الابيض والرجال تحماكم

4 ـ من قصيدة طويلة للشاعر محمد العسيلي رحمه الله:
شاعر واديب وبالمهمات لولاب ــ يلوي ولا تلوى عليه الملاوي
حيه عدد من شب سنه ومن شاب ـــ وما رددوا فوق الأصايل حداوي
فايز يشاورني على ذبحة الداب ــــ وكحل العيون اللي عليها غشاوي
وصقل القديم اللي عن الناس كد ذاب ـــــ وذابت رسومه ما بقي له شلاوي
متحمس لقومه عريبين الأنساب ــــ ويخاف من رمية خطاة العماوي
خطو الخبيث اللي تعرقب تعرقاب ـــ لا تمنعه شيمه ولا هو بياوي
لا شك هذا ماحسبنا له حساب ــــ لا جالب حسنة ولا هو مداوي
5
ـ من قصيدة طويلة للشاعر مرزوق بن مبشر الحثل المزيني:
صعد سلم الماضي على جسر الاجيالي ـــــ عز كِفَّة القسطاس كفة تساويها
قريت وعلمت ومن مزاياه يروى لي ـــــ يقص القصص لإثباتها قبل يرويها
نقل سيرة الأول براهين للتالي ـــــ ما هي حجة اللي شاهد القوم تاليها
أديب على البرهان يصدح ولا يبالي ــــ بعض ناس يزعلها وبعض ناس يرضيها
جوابه على من يسأله مثل الأرتالي ــــ تحس الثقة بعبارته يوم يلقيها


6 ـ من قصيدة طويلة للشاعر الكبير بدر الحويفي الحربي:
اخص ابو تركي نزيه الاساليب ــــ ساعات وصله من ليالي عيادي
ممنون للطيب وانا مع هل الطيب ـــ ما حب يحصل بالنفوس انعقادي
وفايز نعده من خيار الاصاحيب ـــ حر ينومس صاحب بالهدادي
محشوم ما هو من طيور الزواريب ـــ اللي توصف بالرخم والحنادي
طلعه ورى الهقوة عطيب المضاريب ـــ فعله يشجعني وطلعه ركادي
رجل فتح لأمجاد ربعه دواليب ــــ وأحيا الفعول الدارسة والجدادي
ينفي عن الواقع اسلوب الأكاذيب ـــــ من مصدرٍ ماكود ماهو دوادي
والعرف والحنكة حظوظ ومواهيب ــ وفايز على الحنكة تسيطر وكادي
حامل شهادة بعد دوره وتدريب ــــ وأنا دروسي من طبيعة بلادي

7 ـ من قصيدة للشاعر غصين بن محمد القحطاني:
معرفة رجال العلم والطيب والوفاء ــ رصيد الرجال اللي يبون رصيد
كالحثل مرزوق المبشر وفايز ـــ نموذج مثل، ما قصدي التحديد
نموذج مثل من حرب كسابة الثنا ــــ قبيلة لها في المجد باع مديد
لهم ماضي يشهد بسابق فعولهم ـــ ولهم حاضر بامجادهم يشيد


8ـ قصيدة للشاعر الكبير/ حماد بن مريزيق البشري الحربي:
من هاجس هيف الذعاذيع ساقه ــــ فز الخفوق وصار لي بالمثل شوق
سلام من ميزان عقل وصداقه ــــ سلامِ أحلى من العسل طيب الذوق
أرفق معه من زهرة الورد باقه ــ أشرف تحياتي لفايز بطاروق
راع التواضع والوفاء واللباقة ــــ عساه من صدفات الايام معتوق
أقولها من جد ما هي زراقه ــــ قدرٍ لبو تركي تسامى بمنطوق
اللي ليا جا بالرياح اصطفاقه ـــ وقامت تلوف شعوفها كل زملوق
عنها بمثله للرفيق ادراقه ـــ منصا السعد لمجوهر العرف صندوق
برج العلا ساق النضا لين واقه ـــــ بالعزم والهمة رقا واعتلا فوق
اللي مع حموله يشيل الوساقة ـــــ إلا ومع ذلك عن العُوج ما ثوق
عسى فداه من الملا كل عاقه ــــ اللي فوارق وزدته بطن وشدوق
هذاك عن لاماه ساعة فراقه ــــ مكسب لو اقضيها على راس شاهوق
رجمٍ خلا للشوف فيه انطلاقه ـــ يعوضني باللاش ومحالف البوق
أنا مسرة خاطري واشيتاقه ـــــ رفقة هل الطولات دامٍ لها سوق
بيض السلوم اجناب وإلا رفاقه ـــ عندي برفقتهم ترى السوم مفروق
وأزكى سلامي والتحية غلاقه ـــ معها شذا الريحان والعُود مرفوق


9ـ من قصيدة طويلة للشاعر الحميدي بن كمي المويعزي الحربي:
سلام يانسل الرجال الكريمة ــــ يا باعث مجد قديم وغاير
من فضل ربي حرب ما هي عقيمه ــــ ما دام فيها مثل فايز ذخاير
نرفع له البيضا وربي يديمه ـــــ قبله طمع فينا خسيس وباير
جدد فعول اهل الوفا والعزيمه ـــ لأهل القلم ميدان وأهل البصاير
وللمجتهد يامعرب الساس قيمه ــــ وإلا ترى المعصوم راع البشاير
ولو حال دون الشمس بالقرم غيمه ــــ تظهر ومثلك عارفٍ بالسواير
ولا أنته ظلوم ولا تحب الظليمة ــــ العلم عنكم يا ابيض الوجه ناير

10 ـ من قصيدة طويلة للشاعر المعروف فحيمان الحجور الجهني:
فعل ابو تركي مشرف وله ماقف حكيم ـــ مع جهينة يوم دار الرشا فوق المحال
ضفنا من فوق صدره على رحب ونعيم ـــ واحتضنا وسخر الموهبة في كل حال
وذلل الأصعاب لو موجها يلطم لطيم ـــ مع بني عمه عضوده كريمين السبال
بالبداية قابلونا الحشيم مع الحشيم ـــ الأديب مع الأديب أكرمونا بالقبال
رحبوا فايز ومرزوق ترحيب وسيم ـــ فاز ابو تركي، وهل الوفا لأبو هلال


11 ـ رسالة وقصيدة من الشاعر نازل بن عبدالله الخضراني الحربي:
(مع التحية ولاحترام للأخ الأستاذ/ فايز بن موسى الحربي
لقد اطلعت على كتاب الأستاذ فايز بن موسى "فصول من تاريخ قبيلة حرب في الحجاز ونجد" وقد دون المؤلف في كتابه الكثير من أمجاد قبيلته مع تحديد المكان والزمان، وذلك عن رواة كبار بالسن، منهم من عايش بعض تلك الأحداث، وبذل جهوده وأعطى من وقته الكثير للبحث والتحري عن أدق المعلومات وزيارة الرواة أين ما كانوا، حتى طلع بهذا الكتاب الرائع المتميز عن غيره من الكتب في هذا لامجال، ولا نقلل من قيمة المؤلفات الأخرى التي ألفها أبناء القبيلة ولكل مجتهد نصيب، ولكن نقول كتاب الأستاذ فايز هو الأفضل:
يافايز الموسى كتابك قريناه ـــ بعد صدر من مكتبتكم وجانا
يا اديب يا شاعر جهودك مسماه ــــ تبقى من التاريخ طول الزمانا
خدمت في جيل العرب كل من تاه ـــــ وعلمت الدرب الصحيح البيانا
عن حرب، عن ساس الوفاء والمثاراة أيام صولات الزمن مع عدانا
بأفضل اسلوب، وكامل فيه معناه ــــ عن الرواة اللي تعرف المكانا
يفرق عن اللي جاب علمه من أدناه ـــــ علم يجي به كان عند اقصرانا
وامجادنا بايام وقت المعاناه ـــــ تبقى تراث اشعوبنا واحفدانا
...........ألخ).


12ـ من قصيدة طويلة للشاعر علي بن زيد الفريدي الحربي:
المعرفة برايي من جميع النوايع ـــــ الادب من جميعه والنسب والشريعة
ماضيات العصور وما مضى من وقايع ــــ والتراث المنوع محتواه وجميعه
عند رجل المروة عند زاكي الطبايع ـــ عقب بحث وتقصي حافظه ما يضيعه
ابو تركي بامانه حافظ للودايع ـــــ عند راع الأمانة ما تضيع الوديعة
أبن موسى بأمانه حمل الحمل طايع ـــ إن بحث ما يزور والصراحة ربيعه
يابن حرب القبيلة كل ما جبت رايع ــــ ياكثير المواهب موقعك بالطليعة
والعلم من نجح به سد باب الذرايع ــــ ما يعارض نجاحه غير ناس وضيعه


13 ـ من قصيدة للشاعر حسن بن صنت البدراني الحربي:
سلام يارجل لزوم افتخر به ـــ انا وربعي مع عموم القبيلة
رجل سلك درب الفخر واشتهر به ـــــ واتعب ركابه في نهاره وليله
ينشد الماضي عن افعال حربه ــــ ذيك القبيلة والفعول المهيلة
تاريخ يبغى من يغوص البحر به ــــ ويطلع اللي غالي من حصيله
هذاك فايز عاش كفٍ سطر به ـــ مجد القبيلة عاش راع الطويلة
سافر لكل بلاد شرقة وغربه ــــ جاب الوثايق مع شواهد دليله
يقنع بها العاقل ليا من نظر به ــــ ويرفض لها الجاهل ومنهو مثيله
جعله موفق من هذا الدرب دربه ـــ مشكور سعيه والثناء يستوي له


14 ـــ من قصيدة طويلة للشاعر الكبير معيوف بن عقيل الوهبي الحربي:
كل الهدف فايز عسى الله يعافيه ـــــ اللي بشانه وابل الشعر هلي
واقول بأعلى الصوت وأعلى عواليه ــــ ياليت كم فايز لنا بالسجلي
ليته، وليت الطيب اللي يحاليه ـــ بكل الدواير له محل وتعلي
حتى المراجع يفقد اللي يعانيه ـــ والحب من بعد الكراهة يحلي
ما اقولها لأجله علشاني اغليه ــــ مير الحقيقة كشفها شاهدٍ لي
والصدق أمانه مخطي اللي يخفيه ـــ وأنا صريح، ولا الجحود اهدفٍ لي
ما اقدر أقول إلا عسى الله يجازيه ــــ بأحسن جزا وأجزل ثواب من اللي
يقدر يميت العبد ثم عقب يحييه ــــ وليا عطى يغني عطاه المقلي



15 ــــ قصيدة للشاعر سعيد بن صالح المزيني الحربي:
مشكور ياللي كل جهد لنا ابداه ـــــ باسم القبيلة وثقه واعتنى به
كشف عن اللي غامضات مزاياه ــــ ما احدٍ سبق فايز، ولا له مشابه
سنين من عمره للأمجاد مهداه ــــ تاريخ من وقت النبي والصحابة
مشروع فيه انساب وأخبار وقضاه ــــ وثق مصادر منهجه في كتابه
ياقل مثله بالجزيرة وحلياه ــــــ وضح عن اللي بالجزيره تشابه
تاريخ مرجع من بغى العلم يقراه ـــــ واختار في صدق الوثايق صوابه
أرجي له المعبود بالخير يجزاه ــــــ ويوفقه في كل مجدٍ سعى به


16 ـ قصيدة للشاعر غانم بن ثاري السليمي الحربي:
منا تحية لأبو تركي هلا فيه ـــ والحمدلله يوم حنا عرفناه
كنت أتمنى لو اشوفه وأخاويه ــــ واخذ معه واعطي على ما اتمناه
اللي جمع شتات حاضر بماضيه ـــ يا علها تسلم على الطيب يمناه
معجم قبيلة حرب نقدر نسميه ــــ المرجع اللي لا اختلفنا نصيناه
قولوا معي: يالله ياربي تحييه ــــ يا اعز من جانا بينبع وشفناه


17 ـ من قصيدة طويلة للشاعر سعد بن هذيل الفريدي الحربي:
مثل ابن موسى بالعلوم الجليلة ـــ نجم لمع للي مع الدرب سارين
فايز ابن موسى عريب السليلة ـــ يستاهل البيضا صبي البدارين
الله يكثر بالنشاما مثيله ـــ ومن القبيلة عل شكله كثيرين
راعي هلا يمناه ماهي بخيله ــــ في مجلسه تلقى الرجال الثقيلين
سخر جهوده بالوفا للقبيلة ـــ أعيانها وفرسانها والكريمين
وثق فعايل محتمين الدبيلة ـــ تاريخهم وأمجادهم والعناوين
بالبحث والتوثيق نال الطويلة ــــ خادم قبيلة حرب وسط الدوادين...


18 ـ رسالة وقصيدة للشاعر ضيف الله بن مناور البدراني الحربي:
(الأخ الأستاذ فايز بن موسى البدراني سلمه الله.
السلام عليكم ورحمة الله وبركاته وبعد،،،
بداية أتمنى من الله العلي القدير أن تكون أنت وجميع العائلة الكريمة بصحة وعافية. كما أخبركم بأنني من المتابعين لكل كتاباتكم ومنشوراتكم الأدبية التي تدل على فكر وعلم وثقافه وأطلاع مع أدب، واحترام وتواضع، ويالها من خصال كريمة في رجل كريم، اسمه فخر لك بدراني بل لكل حربي، بل لا أبالغ لو قلت لكل سعودي يحب هذا الوطن وتراثه ويحترم ويقدر من يعملون في كفاح وتضحية وتفاني أمثال فائز بن موسى البدراني.
استاذي القدير؛ أخيراً أسأل الله أن يعينك ويكتب لك الأجر في مشوارك الذي اخترته لنفسك وهو وبالذات في الأنساب والذي فيه من المشقة والتعب الشيء الكثير، ولكن للأسف الكثير يجهل هذا الشيء ويظنه عملاً سهلاً وبسيطاً يستطيع أي شخص القيام به!!
كما أنه يسعدني ويشرفني أن أهديك هذه القصيدة المتواضعة بعنوان مصدر خفر.. هذا والله يحفظكم ويرعاكم،،،
سلام ياللي لك مكانه وتقدير ـــ مكانكم فوق الثريا مداره
مصدر خفر كل الرجال المغاوير ــ ياللي على الامجاد حزت بجداره
يا كاتب النساب القبايل بتدبير ـــ يا من سعى في خدمته وازدهاره
مثل الصقور العالية تسبق الطير ـــ يا حر ما ترضى بذل وحقارة
واصل على دربك ولا يهمك الغير ـــ راع الحسد يكفيه هم ومرارة
وحنا معك لا يمكن ظهورنا ندير ـــ نفداك يافايز ولا هي خسارة
وان كان في قافي طلع أي تقصير ـــ طالب .. يقدم للأديب اعتذراه.).


20 ـ قال الشاعر: زيد بن مبشر الحثل المزيني الحربي:

بيض الله وجه فايز عسى عمره طويل ــــ فايز الموسى ابو تركي سلام الله عليه
قلتها وأقولها كل يوم وكل ليل ـــــ وإن نشدتوني على ويش يوم أثني عليه
قلت أنا ما أثني على الرجل يا غير بدليل ـــــ أسمعوا موجز عن اللي قريت وما يليه
مقتنع فيما قريته ولا أبغى له بديل ــــ والحقايق والوثايق هي اللي تحتميه
في فصل وأشعار حرب الأصايل للأصيل ــ كل ما أكشف منه صفحة دعيت لوالديه
جَمَّل الله حال فايز على فعل الجميل ــــ أبو تركي تبت أعداه، لا تبت يديه

21 ـ قال الشاعر: الأمير زياد بن عبدالرحمن الأحمد السديري:

مرحبا يا هلا بك يا عريب الجدود ــــ عد رمل العروق، و رِقْ همس العبير
من فؤادٍ يودك يابوتركي بزود ــــ سعد من هو لمثلك يالسنافي عشير
والمراجل تراها مثل ورد العدود ــــ وأنت شرواك يارد جم عدٍ غزير

22 - قال الشاعر: سعد بن هذيل الفريدي، معلقاً على خبر إنشاء جمعية النسابين:

مبروك يالباحث النساب ـــ بجمعية أنساب وإنسابة
عبر الجزيرة قريت كتاب ــــ وزود على قلبي إعجابه
الله يعينك على الأعراب ــــ اللي ليا غبت لسَّابة

23 - قال الشاعر/ ضيف الله بن مناور السهكر البدراني:

ياليت فايز عندنا مثله اثنين ـــ مثل ابو تركي مالقينا مثيله
حاز المراجل كلها دون تخمين ـــ وقت اللوازم كل حمل يشيله
عز الله إنك من صقور البدارين ـــ راع العلوم الطيبة والأصيلة
يافارس كل الصعايب له اتلين ــــ مهما كتبنا فيك والله قليلة

24 - قال الشاعر/ عبدالله بن سرحان المعمري:

يافايز الموسى عرفناك بالطيب ـــــ طيبك شمل ربعك وزوده على الناس
نرفع لك البيضا بروس المراقيب ـــــ ياللي جمعت أنساب حربٍ على ساس
لا تستمع طرادة الحكي بالغيب ــــ يافخرنا بين القبايل والأجناس

25 - قال الشاعر/ رشيد بن محمد الفريدي:

يا بو تركي عادتك شيل الثقيلة ــــ واشهد إنك يالوفي راعي جمالة
نظرتك قدام ودروبك طويلة ـــ لا تلفت للردي لو ضاق باله
الحمل لا جار ما يقدر يشيله ــــ لا يهمك لو حكى راع النذالة
ولو تشب النار في راس الفتيلة ــــ الردي ياصاحبي تقصر حباله

26 - قال الشاعر/ سعود بن صليبان البدراني:

أنت جزل ولا تحوش إلا الجزيلة ـــــ عالي قدرك وكاسب للجمالة
متعب ركابك على درب الفضيلة ـــــ عارف ومعروف عند أهل الشكالة
والحسود اللي قضى يومه وليله ــــ بالحسد والحقد وأغراض النذالة
نظرته تقصر ولا تاصل شليله ــــ وصاغر عقله وزايد في هباله

27 - قال الشاعر: عبدالله بن مقعد العتيبي:
الرجل قالوا ترى قلبه دليله ـــ وأنت قلبك حاوي كل الشكالة
يا وسيع المعرفة حملك تشيله ــــ وأهبك ربي مع القوة صمالة
ما تهيبك المشاوير الطويلة ـــ والا توحى للحثال من الحثالة


المصدر
http://www.albeedhan.com/vb/showthre...=8850#post8850