لقاء مع الشاعر الكبير جزا بن صالح الحربي بـ(موقع قبيلة حرب الكويت)

بسم الله الرحمن الرحيم

الحمدلله رب العالمين والصلاة والسلام علي

اشرف المرسلين سيدنا محمد وعلي آله واصحابه الطيبين



يسرنا في موقع قبيلة حرب في الكويت ان تستضيف شاعر كبير ومخضرم

وقد امتع عشاق الشعر بأجمل الابيات الشعريه

وكان ولا زال له من السمعة الشعرية في منطقة الخليج العربي

نتعرف على شاعرنا الكبير




الاسم : جزاء بن صالح بن سند الحربي من قبيلة مزينة
هوايتك : الشعر والمقناص وعزف الربابة
المؤهلات : ثانوية عامة
عدد الاولاد 8 اولاد

::
::


س1/ متى بدأت كتابة الشعر؟


كتب الشعر في سن الخامسة عشرة, انحدر من عائلة شعرية عريقة وعلى راسهم جدي وابي صالح سند رحمهم الله وقد تأثرت بمجالستهم وحرصي على حضور تجمعاتهم سواء من قبيلتنا او من قبائل اخرى لثقتي بان هذه المجالس تعتبر مدارس في ذالك الوقت ,

::


س2 / متى كانت بدايتك مع شعر النظم وهل تذكر اول قصيدة كتبتها ؟


الحقيقة ماقدر احددلك متى بدات الشعر لاني كتبته في سن مبكرة ولا يحضرني اول قصيدة وكانت في سن الشباب والخجل الاجتماعي يمنعني بان افصح عن مابداخلي .ولوظهرت القصيدة سوف تنقد من قبل من هم اشعر مني وسبقوني في هذا المجال.

::


س3 / ماذا تعني لك القصيدة يابو صالح؟

تعني لي الشي الكثير والشعر هو مجالس العرب وأعلامه وبعض الدول تاخذ حكمتها حالياً من الشعر. وكان الشعراء في ذالك الوقت هم اعلام للقبيلة او للبيئة الموجود فيها ولكن كان فيه انحياز للقبيلة او اللبيئة فتجد انه يذكر أفعال قبيلة من طيب وكرم ومعارك وصولات وجولات, ورفقة وحسن الجوار وصدق ونبل المعاني في ذالك الوقت ولا احد يقدر يغطي فعل شخص اخر اواجحافه بهضم حقة فيكون الشعر صادق إلى درجة ان يقول الواقعة لوكانت ضدة او ضد قبيلة . فكان اعلام صادق بحق.

::

س4/ القصيدة التي اجزمت ان هذه القصيدة من الممكن ان تكون جاهزة للنشر او ان ترى النور؟متى وماهي القصيدة ؟



انا اخذت فترة اكتب الشعر دون علم احد من حولي. حتى بديت عن طريق الاعلام ومن بديت مع الاعلام خدمت الشعر والثراث والساحة الشعبية خدمتها باشياء كثيرة .


::


س5/ ماالذي يعجبك بالشاعر هل هو شعره او انك تنظر لسوكياته وهل الشعر يعكس توجيه السلوكي والاخلاقي؟


هذا سوالك جيد جدا فيه من هو يعكس سلوكيات الشاعر وفيه ناس تمنا تسمع لك قصيدة او قصيدتين تتمنا انك تقابل شاعرها واذا قابلت شاعرها لقيت موهبته اقل من عقلة وهذه وهايب من رب العالمين ماكل شاعر يعكس شعره او موهبته وهي حظوظ ومواهب من الله سبحانة وتعالى .

::

ونجورهم للضيف ترسل تصاويت=وضيانهم بالليل مثل البروقي
رجال عليهم من قديم تربيت=وفارقتهم والقلب مني يتوقي

س6 / ماهي مناسبة القصيدة وهل تذكرها ومن المقصود في هذه القصيدة ؟

لكل وقت عصر ورجال والناس يختلفون من جيل الى جيل. ذكريات العمر التي تمر في مرحلة الانسان تكون مؤثرة في نفس الشخص. وقد عشت في وقت تغير بفرق شاسع للجيل الحالي وتغيروا عن نهج من سبقوهم قبل فيه عادات من صدق وكرم وتواضع ولا عندهم حسد او كبرياء او غطرسة وشوفة النفس. ناس بسطاء مرنين في حياتهم وسولكياتهم وانا عشت في البادية الحاظرة وكل الاشياء جربتها ومرت علي فان مريت على الاطلال التي عشت وترعرعت فيها ومر بالذكرة الرجال الذين فقدتهم وحبيت احيي ذكره واتوجد على وقت مضى كنت معهم. فهاذي مناسبة القصيدة.




س7/ اين كانت مواطنكم في ذالك الوقت .. ؟؟

كانت مواطننا في الجزيزة العربية من القصيم الى حائل الى المدينة الى نجد. كانا بدو رحل نتبع المطر والربيع.

::

س8/ بيت شعر مشهور ومعروف وتداول كثيرا واصبح مضرب مثل

(( ياما على الجاهل يفوتن الافوات..... وياما على العاقل تصير البلاوي))

من قائل هذا البيت واذكر لنا القصيدة كاملة ؟؟


هذه القصيدة لوالدي صالح رحمة الله.

تنبهو ياهل ا لقلوب الفهيمات=متعرضين للخطر والأهاوي
ياما على الجاهل يفوتاً الافوات=ويما على العاقل تصير البلاوي
لياصار ما تاخذ امورك سياسات=يصير عقلك والهبال متساوي

والقصيدة اطول من ذلك واحتفظ فيها.


::

س9/ نبي من شعر الحكمة لك يابو صالح ..؟؟

من لا يعرفك مايقدر مقامك =ومن لا يميز بالبشر ما عرفها
ولايحترمت الناس زاد احترامك=والناس عز نفوسها من شرفها
وشكواك للي مايثمن كلامك=دمعة يتيماً من عيونه ذرفها
وان قلت لي مشروه يمك علامك=عليك غلطات الموالي حرفها
لكن تبعد لا يتهمز عظامك=وينسف عليك السالفة من طرفها
ترى ندمك وعضتك في بهامك=اخير من حب الخشوم ورعفها
واللي مقامه مايوالم مقامك=يزيد بالنفس العزيزه سرفها

وهذا من قصيدة طويله




س10/نسمع منك قصائد تاتي بشكل غريب من بلاغتها في الغزل ؟ ونبي نسمع قصيدة غزلية ؟


انا قلبي خضر وقلب مافيه حب يتعبر اسود .. والغزل فن من فنون البادية واللي مايحكم الغزل مايحكم الشعر... والغزل سعلة صعبة من وصف ومن دقة وذكر

ياصاحبي فجيت نطح النحر فج=كن اللويصق من عيونك يخجه
سيف الشجاع الصاطي الشيخ الابلج=سيفن عقيد القوم راسه يخجه
سيف الذويبي يوم بالخيل يرعج=ارعاج برقن من عواصيف عجه
اليا صار وسط الخيل والملح يزعج=الدم الاحمر من سنانه يبجه
وعند المهار الصمع قدمه تمارج=وفرسانهن كلن يضيع مهجه
وانته سهومك مثل وصفه تساهج=وترسل سهومن يم قلبي ترجه
ونظرات سودك بالضماير تواهج=وحدث وهجهن بين الاضلاع لجه
لجات خلجن بالمظامي تناشج=وظاع الحوير منهن عقب هجه
وحوارهن توه صغيرن تدرج=عقب اروحن ريحه حفاهن مسجه
يابوجديلن فوق متنه تدلج=كن الذهب بين الجدايل تسجه
ولولا العناج اللي يلم المدملج=قلنا شعاع الصبح منهن وهجه
واليا ابتسمت ابيهظ غرن تلاهج=اقول برقن من شفاتك تمجه
عندي وكلن له بالاذواق منهج=ذوقي ولالي من ورا الناس حجه
هذا وانا يمك شفوقن ومحرج=ومن يمكم ماصار لرجل سجه
وانا مراسيلي عليكم تزاعج=لاعلم كان ولاعلي التوجه
وبي كلاما من شفاياك يبهج=وما غنات الذيب ولامدجه
قبل الفراق اللي يرج الفتى رج=مر الفراق يمنا لاتزجه
لاقادر اشكيكم ولاقادر احتج=ولو اشتكي معلوم قلبي تحجه

::

س11/وهل كل من يكتب الغزل عاشق؟


ماكل من يكتب الغزل عاشق ولكن يتعبر فن من فنون الشاعر هو يبين نجاحة ويبين فشله في صياغة الشعر والشعر الغزلي هو ترفيه عن النفس والغزل والحمكة والقصيد بالصقور والمقناص هو ترفيه للنفس ومن انس المجالس.

::

س12/ هل لك تواصل مع شعراء معينين ؟

الشعراء اللي تواصل معهم كثيرون واكثر ما اتواصل مع الشاعرالكبير / بدر الحويفي.

::

وهل صارت بينك وبينه مساجلات ؟


اكيد كثير بيني بين الشاعر الكبير بدر الحويفي منها
وصف كبر سن الشاعر بدر الحويفي

يابدرما انته والعذارى ولايف=عنهن تراك ابعد من الجدي لسهيل
وفارقت لاما مترفاتٍ عفايف=بيض العواتق لا بسات المفاتيل
نجل العيون معسلات الشفايف=وخدرات الأعين والحواجب مكاحيل
اللي عبثهن بالقلوب الصخايف=وكلٍ شكى منهن عذاب وغرابيل
ولو القلوب اجبال صارت خفايف=وياما غدن بقلوب ربعٍ حلاحيل
والا بليد القلب عنهن مسايف=ولا شوّقه دعج العيون المظاليل
وانته على ماقيل شايف وعايف=وعن الركاب منزلالشيل تنزيل
ليا صار متنك صاير له سنايف=وتدبح بمشيك واللأحجة مشاهيل
والزول مهدف والتراكي نحايف=ونظارتك سودا مثل حالك الليل
وجسمك مثل عظم تضبّه كتايف=ولا باقي الا هيكلك والعصاقيل
ومن كبرك سنك ماتبيك الوظايف=والواسطه مالك عليها مداخيل
وعليك من سرحان بعض الوصايف=الذيب الأشهب فيك منه تماثيل
ولو شافن الخفرات ماكنت شايف=مايقبلنك لو قضن عمرهن حيل
ماهو ردا بك ياذرى كل خايف=عند اللوازم نعرفك بالتفاصيل
من روس ربعٍ ياخذون العطايف=وياما اتعبوا من سبّق الهجن والخيل
وفعولهم بمصقلات الرهايف=ليا طوحن سمر العذارى الهلاهيل
وليا اعتلوا فوق المهار الزغايف=يردون ساحات الوغى بالمصاويل
وسوالفك عند النشاما طرايف=طرايفٍ مابين شرابة الهيل
مافيك ماينقال وابيض صحايف=صحايفك بيضا بياض الفناجيل
لاراجيً منك ولاني بخايف=انا اشهد انك من خيار الرجاجيل
سبعٍ تعشى وان هبا كل خايف=لاشك كبر السن مافيه تجميل
ويوم الصبا وانته رقيت المهايف=ومعاك في كشف المسافات دربيل
يوم الفزوز اللي ترب الحتايف=تسري وتصبح قدمهن بالمداهيل
واليوم عصرك يافتى الجود طايف=واسمح لغيرك قبل يوم المراحيل
واحذر تعدي بالرجوم النوايف=يمكن علينا تجفّل الصيد تجفيل
ورزقك على اللي مايدينه قظايف=اللي حمى ركن الحرم من هل الفيل
واسلم وسامح بالمزوح الخفايف=نبي سوالفنا طرايف تعاليل
ترى على مثلك تجوز العجايف=والا الردي يابدر مابه محاصيل

رد الشاعر بدر بن عواد الحويفي

جزاء غزاني شاف غزوي نكايف=عنده خبر معرض عن القول والقيل
ساقه علينا من هواء النود طايف=نوٍ ثقيل وفيه برق ومخاييل
وساسي حجر ماهو عشاش وصرايف=يهزها دفّاع الامواج وتميل
ياللي بحال العود مانته برايف=علي ينخونك بعض ناس بالتيل
يبي على راسي يلف اللفايف=طاوع صديقه والتمس منه تفصيل
بمكبرات الصوت يرسل قذايف=وركز مواقعها على غبة النيل
صارت صوايبهن بجنبي خفايف=مرن ولا ضرن سلامه وتسهيل
يارجل بالشيبان ويش انت شايف=زمل الحمول ليا رغن المخاليل
من لايعوه بشلفهم راح عايف=ليا دبرت خيلٍ وخيلٍ مقابيل
قطاعة الصحراء وجرد الحتايف=اللي بها حرش الأفاعي مشاويل
وعندك خبر يوم المعوشه خطايف=ايام غارات العرب والمصاويل
ومن شب شاب وذاق عجز وكسايف=ذي سنة الدنيا وجيلٍ بأثر جيل
وعندك خبر للجيل الاول خلايف=ارجال ماتوا والخلايف رجاجيل
ياللي على اسلوبكم به جحايف=يبحل به اللي مايعرف التحاليل
هوم لو هو من قلوبٍ نظايف=ابعد عن الشكه من الجدي لسهيل
محدود مايلمس حقوق الطوايف=مضمونه الواقع امزوح وتعاليل
موضوع ماله يم غيري هدايف=تعليق من صاحب لصاحب بتسجيل
يقول شايب واحترمت الوظايف=والرزق عند اللي تكفل اسماعيل
وان كان عندك غير هذي لغايف=ياصاحبي لا تكرب الحبل بالحيل
مافيه داعي للأمور العنايف=العنف يثر بالصاقه عراقيل
خل الهدف بيني وبينك مسايف=ترا الجمال عيونها للجماميل
والعرف قدوه للرجال العرايف=وانتم عوارف ماعليكم مداخيل
انتم رجال العرف مانتم عذايف=اهل وفا وسلوم قول ومفاعيل
وصوغاتكم دايم تجيني غلايف=واليوم صوغتكم بها نوع تشكيل
مهما على تدورون الحوايف=ماني معاتبكم برد التماثيل
وانا من الموضوع ماني بخايف=اخاف يجهل وضعنا ساري الليل
وتصير قصتنا مقيض ومصايف=نزهة فراغ مجمعين الدهاويل
ناسٍ تذوق من بحرنا غرايف=جهال تفتح للسوالف سرابيل
السالفة لو هي مزوح وطرايف=لازايده وزنه ولا ناقصه كيل
تفسيرها عند العقول الصخايف=كبر الجبل لو هي كبر حبة الهيل
لاكن عليّه لاتحد الرهايف=انا محملني شقا الحظ تحميل
وموسرٍ عود القنا بالكتايف=ومسلّم امري رب موسى وجبريل
حقي من البيض الحسان العفايف=دور انتهى ماهو مغازل مهابيل
ماهو غرام بالهواتف خرايف=واحلام بسلوك الهواتف مراسيل
اخص رادين العقول الخفايف=اللي محبتهم سماجه وتضليل
والا الرجال اللي سيّرهم شرايف=تمنعهم الشيمه وسلم الرجاجيل
وحكمك بوضعي يارفيقي سرايف=اول هجوم وتالي الدور تجميل
خطة نشاما مابها زيف زايف=تشاورو واومو لنا بالمناديل
وارسلت روس اقلام مامن كلايف=وارجي السموحه يارفيقي عن الميل
ماعامل الطيب بسود الصحايف=اهدي له الصوغه تحيات وكليل
لو كان حر ولا عليّه حتايف=ارتّل المعنى عن النقد ترتيل
وارضي بميزان النصف والنصايف=ماني عوج يحتاج نظره وتعديل
وان جنبت ماني عليها مهايف=ماحمّل العاقل شمات العواذيل
غيبي بعيد ولا بنودي قظايف=مع احترامي للنشاما المشاكيل
والطيب ادمح زلته والعجايف=والا الردي شوفي بعينه سماليل
في حاله الين من نسيج القطايف=وفي حاله اقسى من جبال البرازيل
وتمت وصلوا عد وبل القنايف=على نبيٍ نفل الدين تنفيل

::

س13/ ابوصالح ماريك بشعر اللغة العربية الفصحي وهل لك قصايد باللغة العربية ؟؟

والله انا ما اقصد باللغة العربية ولاكن ارتاح له كثيرا وعندي مجموعة كثيرة من الشعراء الدولة الأوموية وشعار الدولة العباسية واتذوق لشعرهم حتى شعراء الجاهلية اقرى القصيدة وتكشف لي وقت العيش فيها وظروفهم




س14/هل البداوة اثرت فيك ؟

نعم تعلمت منها الرجولة والصبر الكرم ومكارم الاخلاق


::

س15/ ابو صالح بيت شعر تعتز فيه عند ترديده ؟

والله حسب الحاجة والمقتضيات اذا كان الواحد في حاجة للصبر او حاجة الى تجاوز بعض الأمور الشعر يريحك وعندما تنظر في حكمة هذا الشاعر... هذا الشي طبيعي يعني الأنسان يمر بعض الأحيان في امور صعيبة
لم يجيب الشاعر ( اجابة دبلوماسية)

::

س16/ ماسبب انقطاع عن النشر في الصحف اليومية والمجلات الشعبية ؟

والله ماهو شبه انقطاع لكن احيانا ينزلون لنا قصائد دون علمي ولكن ايام السبعينات كنا نزل قصائد عدة في الصحف والمجلات الشعبية بناء على طلب محررين الصحيفة او المجلة . لكن بالوقت الاخير تركنا المجال للشباب الذين يحبون الظهور والناشئين او الباحثين عن الفرصة للظهور. واتجهنا للاعلام

س17/مارايك في القنوات الشعرية؟ وهل خدمة الشعر ام تبحث عن مصحلتها الشخصية .. ؟؟

الفضائيات مادية وتجارية اكثر من انها تخدم الشعر الى القليل 2 % من قصص وشعر قديم تجارية ربيحة للتصويت والتجارة

::

س18/رايك في الشعر العصر الحالي؟

والله انا مو معجب فيه انا شخصياَ .. وهذا رأي وماشوفه ان يخدم التراث اتابع وابي شي يخدم التراث وينبه اشياء ويعالج امور في المجتمع لان الشاعر اليوم ملك الجميع ماهو ملك نفسة .. ولذلك ماتشوف من النصح والارشاد او النقد البناء الى يوجه الناس اذا كان الشاعر متمكن من هذه الاشياء ماشوف انا اشوف اشياء الحقيقة احسبها مؤقت في نظري وفي راي لانك لاتستفيد منها

::

س19/الشعر هل هو وراثه او موهب ؟

ليس بالضروري لكن الوراثه لها تاثير

::

س20/هل من عيالك تعلموا الشعر؟

عندي من عيالي ثلاثة اقوم بتوجياتهم

::


س21/ موصفات الشاعر الناجح؟

وجود الموهب لم يكن شاعر لوما تعلم والممارسة تعطيه من الاسلوب

::



س22/ هل مارست المحاورة ( القلطة ) ..؟؟

كنت شاعر محاورات بالسبعيانات وكان لم يقف امامي احد ... مريخان العمري و ثلاب حبيتر الحربي عاتبوني عندما توقفت عن القلطة ... وانا اشوف فيها ظلم وفيها مهاترات انا ارتقي عنها وانعرفت بالنظم .. شعراء القلطة مادم الشاعر حي ابياته حيه وذا مات ماتت شاعريته

::

س23/ ابو صالح ماذا ينقص الساحة الشعبية في الوقت الحالي ..؟؟

والله ينقصها الضبطية لاكن الاعلام الى تبع الحكومة هي معتدلة وعليها مسؤلين ولاتطلع القصائد الى ناس محتكمه في مسيرة الادبب والشعر .. لاكن الفضائيات الى مايحكمها شي غير معتدله حقيقه وينقصها اشياء كثيرة وفيها شللية ... في قنوات استضافة شعار اسم لغيرهم


::

س24/ مانصيحتك لشاعر مبتداء في الشعر؟

ينمي موهبته مع الشعراء المخضرمين والقدامة ويشاورهم لكي يقومون له بالتوجية ويقراء الشعرء الذين سبقوه ويقرأء الشعر الفصيح

::

س25/ ماذا اسدفت في مشاركتك بقناة رواسي؟

انا اشتركت ليس طمع بل ضغوط من ناس عزيزين على قلبي ؟ لولا الضغوط اللي جتني لم اشارك في المسابقة



س26/ رايك في شاعر المليون ؟

كلها تجارة والشي للي فيه تجارة محدود على ناس معيينين


::

س27/من المعروف يابو صالح او التدوال لدى الناس؟ انك غامض شخصيا ويتهمونك بالعصبية؟

هذا شي صحيح ولكن انا بعكس ذالك واستغرب من رجل ما قعد معى ولا خويته يحكم على بهذه الصفات ويتهموني غيابيان بهذه الاشياء

::


س28/ من المعروف عنك انك عازف ربابة من الدرجة الاولى ؟ ولكن لم يكون لك ظهور بهذا اللون بالاعلام؟

اولا هذا فن من فنون البادية ولا احب اني اطلع بهذا اللون عن طريق وسائل الاعلام ولكن استانس فيها اوقاتي الخاصة والمقناص وربعي الخاصين


::



س29/ ابو صالح هل لديك ديوان صوتي


انا رجل ابو عائلة ولي ارتباطاتي ولا عندي الوقت اني اسجل ولا سجلة ديوان صوتي من قبل ومع ذلك ما الحق حتي لو اعطي فرصه لنفسي في هذا المجال وانا اقول افضل يتمتعون بالاستماع عبر الاثير لو احط الشريط في مكتبه يعتبر حكرت الناس عليهو يشترونه وتصير مكسب مادي لى انا وهذا الشي مابيه انا مابي استغل شعري في الماده انا اقول شعري عشان اسعد الناس هذا هو هدفي الرئيسي وهذا السبب الى امتنعت عنه

::

س30/ رايك في المزايين ؟

تشجيع .. والنفط لن يدوم فمن الضوروي ان تكون تشجع المزايين واقنتائها مرجلة ولا لنا غنا عنها


::



س31/موقف استثارك في قصة ؟


كنا معزومين عند اخ كريم وفيه اثنين صار بينهم جدل وقال واحد لثاني حكمة من الشعر والحكمة من قصائدي؟ وواحد من الاخوان كان عندي قال اليت هذه منو له قال والله مدري اسمع مع الناس وانا ماعرف راعيها ... قال شرايك لو اعلمك براعيه وجالس معنا .. قال الله جزاك خير .. قال هالرجال راعي القصيده واسئله عنها كلها .. وقام وسلم علي وجلس واقول فيها :

انا لياشفت الخطاء من رفيقي=ادمح له الزلة ولاقوله شي
مواخده لو يعترض فى طريقي=ويابد عنه فيه الايام تجفي
ولاني على زلة رفيقي شفيقي=اشيل زلاته ولو كان يخطي
وجامله لو انه من اقصي الفريجي=ويابد حي بالغلي يذكر الحي

::


س 32/ نبي نسمع منك قصيدة يابو صالح ..؟؟

لولا القلم والطرس والثالث الكار=صارت ليالي كلها خرمسيه
والكار كارن للنشامه وتعبار=والهيل والمسمار والشاذليه
ليا اخذت معهن في دجي الليل مسهار=أنسى الهموم اللي تراكم عليه
وأجلس واصاليهن علي صالي النار=وأشرب مباكير الدلال العذيه
بدلال رسلانن كبيرات وصغار=وأفهق وأقلط بين هذى وذيه
ليا خذت من فنجالهن حامين حار=يبرد لهيبن بالظماير لظيمه
وأنسى الهموم اللي عواصفهن أزوار=أهموم تاخذني على كل نيه
أهمومن كثافتهن مثل وبل الأمطار=والا البرد من مزنتن عقربيه
وريح قلبن بين الأضلاع محتار=يدقبه من كل وادى شغيبه
والرأس أريحه عن كثيرات الأفكار=وهدى المكنون لوبه شكيه
وأقصر برجلي وأتسمع الأخبار=وأشفق على كسب الأعلوم الطريه
وأن كان لي في قصرت الرجل معيار=قصرتها عن شفها مكرهيه
نبي الكفاف وراحت القلب بالدار=وسلامتن بالذمه العامريه
عن بعض جلساتن بها كشف الأسرار=وكلن على الثاني شعب له مطيه
ناس على الأكتاف تشتال سنجار=وباكر تحطه يم وادى طميه
وتلحقوا بأفكارهم سبعة الغار=السبعة اللي عند رب البريه
وسوالفن تلقي بها اقرار وانكار=ولامن وراها غير كسب الأذيه
ولو أنت غايب يلحقونك بالأشرار=بومور عوج ولا لها قابليه
وعروض خلق الله رخيصه بالأسعار=عند العقول اللي بها عنجهيه
وأنا ماعم الناس في كل مظمار=أدخل على الله ماتحمل خطيه
يامأ من الأشراف صلبين الأشوار=أهل المكارم والنفوس الأديبه
لاكن تبلوا وابتلو سر واجهار=ويطمع بهم راع العصى والرديه
لاشك أنا مرضى على ذم الأخيار=وفيه عليهم با الوفى غايريه
يفور دمي عند تهزيل الأحرار=لو مابهم ليه قرابت دنيه
ويأبو علي وشرايكم يا ابن الأخيار=في مانقوله والأبيوت أبرحيه
شفنا غياراتن بها الفكر يحتار=وأنت على شرواك حسم القظيه
با الحل والمعقول وبداى الأشوار=وأنا أكتفي رايكم والوصيه
ورايك سديد ولك معزه ومقدار=وأختم كلامي بالسلام وتحيه

::

س33/ هل مدحت شخص في قصيدة وهو شخص لا يستحق ؟

لا واتحدى وارهن على ذلك المدح بعد الفعل وانا امدح بعد الفعل قبل الفعل لا امدح


::

س34/ كلمة اخيرة من ابوصالح ؟

انا اشكركم على هذا اللقاء واشكر الإدارة وموقع قبيلة حرب في الكويت ولا يستغرب منهم ولكل مجتهد نصيب وهذا من واجباتكم اتجاه القبيلة واتمني ان شاء الله المواصله والتكاتف علي تراث قبيلتنا وعلى الشيء المفيد وابراز الطيب حتي لو ان ماهو من القبيلة للي يستحق


::
::
http://www.hrb-kw.net/vb/showthread.php?t=8676

لاهنت على هذا النقل لهذا اللقاء مع شاعرنا العلم جزاء بن صالح الحربي هذا الشاعر العملاق الكفو يستاهل ابو صالح وهومكسب لكل ملتقى يستضيفه ومثل هذا اللقاء هو المطلوب وهو مايثري الملتقى والمتلقي سلمت وسلم شاعرنا العلم ابو صالح وصح لسانه ولاعدمناه

شكرا لهذا انقل


وصح السان ابو صالح


وطال الله في عمره

لقاء اكثر من رائع مع شاعر يعتبر مدرسة الشعر

لقاء مليئ بالحكم والكلام المفيد لمن اراد الغوص في بحور الشعر

ليا صار متنك صاير لـه سنايـف =
=وتدبح بمشيك واللأحجـة مشاهيـل
والزول مهدف والتراكـي نحايـف=
=ونظارتك سودا مثـل حالـك الليـل
وجسمك مثل عظم تضبّـه كتايـف=
=ولا باقـي الا هيكلـك والعصاقيـل
ومن كبرك سنك ماتبيك الوظايـف=
=والواسطه مالـك عليهـا مداخيـل
وعليك من سرحان بعض الوصايف=
=الذيب الأشهب فيـك منـه تماثيـل

الله على جزالة الشعر والمعنى

بيض الله وجهك ياكلاشنكوف الحربي على النقل المميز

تقبل التحيه


\
/
\
الحربي سعود

لقاء شيق و ممتع مع شاعر من فطاحلة شعراء الخليج

جزاء بن صالح الحربي

مشكور على النقل و بيض الله وجهك

لقاء شيق و ممتع مع هرم شعري

جزاء بن صالح الحربي

شكرا لك ياكلاشنكوف

لقاء لا تمل من قرائته اكثر من مرتين
شاعر جزل شاعر حكمه له باع طويل في الشعر امده الله بالصحه والعافيه

اتمنى له التوفيق ولأبنائه

لاعدمناك يالغلا على النقل الجميل

شكرا لهذا انقل


وصح السان ابو صالح


وطال الله في عمره

كلاش بيض الله وجهك ماقصرت موضوع رائع

شآآآآآآآكر لكم جميعآآآآآ مروركم المشرف يآآآربعي ...
وصراحه حنا مقصرين مع شعرائنا الكبار ويجب علينآآ ان نبرز سيرتهم ...