ديوان الشاعر سعود الغيداني

بعض العرب ودك تشيله على الراس=من حسن فعله تفتخر به قبيله
وبعض العرب فعله ردي ماله قياس=نفسه مليه بالحسد والرذيله
صديقك اللي من صدق معك الإحساس=وفيه السمات الطيبة والأصيله
اللي ليا منك نخيته قوي بأس=ماتنمعه عن فعلة الطيب حيله
أصيل وإبن أصيل بداية الساس=وعمادها لاصار بأعلى الطويله
أخوٍ لك إمك ما احملت به بعد يأس=ولا إنولد بالكون أحدٍ مثيله
يرفعك صيته مثل مايرفع الكأس=اللي لتحقيق البطولة حصيله
وهاذي حصيلة كلمتين بقرطاس=كتبتها بأبيات شعرٍ قليله

عقب السعادة والفـرح والمسـرَات=والعيشة اللي معـك كانـت هنيـه
يصيـر تنسانـي وتبعـد مسافـات=وتخلي سعود بسببـك الضحيـه ؟
والله ماكان العشـم فيـك بالـذات=إنك تسـوي فـي حياتـك خطيـه
ولامرَ في بالي مع الوقت ساعـات=إنـه يصيـر اللـي تسويـه فيـه
لو أن فيـه أسبـاب للبعـد مـرات=ماجيتك أسأل وش سبـب هالبيلـه
لكن تركت القلب وأبعـدت بسكـات=وشبيت وسط الصـدر نـارٍ لظيـه
إن جيتك لك عاني لقيـت التحيـات=وإن رحت مادري وش ورى هالتحيه
اول تسوق الرجـل يمـي زيـارات=يوم الخوي هـو العضيـد لخويـه
واليوم صارت سابـع المستحيـلات=والضربـة اللـي بالحنايـا قويـه
سويت معك الطيب والطيب عـادات=واليوم تمشي معي من غيـر نيـه
ان كان نفسك تجبـرك بالقديمـات=مابيـه مـن رد الجمايـل علـيـه
تركتنـي مـن دون اي اعتبـارات=ماجبتهـا بالعـفـو والمقـدريـه
كنك تبي تقطـع جميـع العلاقـات=حتـى ولـو بمكالـمـه هاتفـيـه
هذا السؤال الصعب مالـه إجابـات=يدور فـي عقلـي والأفكـار حيَـه
لابـد فـي يـومٍ تبيـن الروايـات=ونشوف من تصفي عليـه القضيـه
اقولها فـي عقـل وإدراك وإثبـات=نفسي عـن اللـي مايبيهـا غنيـه

كم تحملت كم عانيت لأجلك كثير=كم صبرت وبدونك علَتي ماتطيب
أنتي دواء جروحي والعذاب المرير=وأنتي بكل الأحوال المرض والطبيب
ماقويت الهجر لك صرت مثل الأسير=ماقويت البعاد وقلت حظ ونصيب
أنطوى الحب فيني صار مثل الأثير=ساطعٍ مثل شمسٍ بالسماء ماتغيب
في عيونك جمال وسهم رمشك طرير=نظرتك تجذب الأقصى لحدٍ قريب
تسحر العاشق الولهان مثل الحرير=لا هواها مليل ولا فضاها كئيب
وردةٍ بين كل الورد فاحت عبير=واعذابي هوى قلبي وصرت الصويب
قلبي اصبح بحبك ياحياتي جدير=افهمي وضعه ولو عاش لأجلك غريب
دللَيني وخليني على الشوق أمير=بادليني أفراحي والله الله حسيب
أن تحقق وصالك لي بكون الشهير=وإن رفضتي بأعود أقول حظ ونصيب

سعـودي وحبيـت الخليجيـة بـدون شعـور=حلاها ساحـرٍ قلبـي ولا افكـر سـوى فيهـا
غزالٍ تسحر العاشق وانا في حبهـا المسحـور=جمال وحسن مظهـر بالحـلا ماحـدٍ يساويهـا
خليجية ومن حـب الخليجيـة تـرى معـذور=لها أسلوبهـا فـي جـذب عاشقهـا ومغليهـا
فتاةٍ صرت أنا في حبها مـن داخلـي مجبـور=ولو ودي أهون مـا قـدرت بحكمـي أغليهـا
عجبني كل ما فيهـا حتـى شعرهـا المنثـور=عجبني كل حرف من اسمها يومنـي أطريهـا
خليجيـة إذا حبـت وفيـة ماتجـي بقصـور=أصيلة ماتخون وطبعهـا مـن طبـع أهاليهـا
هي اللي علمتني أحب وكيـف أطيـع الحـور=هي اللي علمتني كيف مـن عذالهـا احميهـا
هي أحلى وردةٍ بأرض الخليج تفوح منها عطور=وهي اللـي غيرهـا للـروح ماظنـي يهنيهـا
تأثرت بغلاها مـن تواضعهـا بـدون غـرور=وزاد إعجابي أكثـر بالجمـال اللـي مغطيهـا
من أعلاها إلى أسفلها إلى الظاهر إلى المستور=بكل أوصافهـا حسيـت نفسـي ذايـبٍ فيهـا
مثل ذاك الشعيب اللي من الغيم غدى ممطـور=وسيَل واديٍ منـه الفيـاض العشـب كاسيهـا
مثل ريح الخزامى والنفـل دستورهـا دستـور=تحب بذوق ماتقسى على مـن هـو يراعيهـا
خليجية هي الجرح وهي الداء وأيضاً الدكتـور=عـيـادة كامـلـة متنقـلـة والله حاميـهـا

والله أني من اللي صار ماني خلي=عفت دنياي عقب اللي يعزونهـا
الثنين اللي بقلبي غلاهـم ملـي=والصعايب اليـا جتنـي يكفونهـا
خوة أمثالهم ماهـي بعـارٍ علـي=اتشرف بهـا وأكـون مرهونهـا
طيبة أخلاقهم والنخوة اللي تلـي=لو هي الروح ماتغلـى يبيعونهـا
الرجال اللي من الساس طيبٍ علي=منبع الجـود بأفعـالٍ يسوونهـا
من الأخيار في هذا الزمان الخلي=وأهل الخير كل الناس يطرونهـا
يعلم الله بقلبي صوبهـم ياعلـي=عشرةٍ ما اتناسهـا ولا أخونهـا
مثل الأخوان كنَا تحت سقف الولي=يوم جاء الأمر قالـوا مايخلونهـا
والسبب من بزود الحقد يغلي غلي=راسمٍ خطته والنـاس يقروونهـا
ياعسى الله يبـلاه بحياتـه بلـي=ويشغله في حياته ليـن يفنونهـا
قلتها والله أعلم بالنـوى ياهلـي=الله أنـه يوفقـهـم ويلقونـهـا
ذكرياتٍ مـع الأثنيـن ماتنجلـي=وجنة الخلـد ياربـي يسكنونهـا

يابنـت لوبينـي وبينـك سواليـف=لا أعالج جروح الوهـم بالقصيـدة
لأجلك كتبت الشعر ياأحلى من الطيف=واليـوم قلبـي زاد علـة جـديـدة
ما حاجتي بالحـب كذبـة وتزييـف=غيـر الحيـاة الهانيـة والسعيـدة
غصبن علي أهواك ماهو على الكيف=القلـب يأمرنـي وشوقـي أزيـده
عازم وجازم وأنتي الحـد والسيـف=لو كانت أفراحـي بـأراضٍ بعيـدة
الهم فينـي مثـل سحابـة الصيـف=عدَا وعشت الحـب فرحـة مديـدة
والكلمة اللـي قلتهـا دون تحريـف=تبقى على نفسـي عهـودٍ جسيـدة
ما أقدر أغيرها ولا أقـول ياحيـف=وأصبر مـادام الـرد والحـل بيـده
هذا غلاي ولا أبي منـك تصريـف=أنتي هـواي وتـاج حبـي وسيـده
يابنت حبي كيـف ماهـو بتصنيـف=متـى علـى الله نلتقـي يالعنيـدة

هذه مساجلة بيني وبين الشاعر نواف الجهني .. ابو نوف ..

وسند علي قصيدة ارسلها مع اخوي ماجد الجهني .. وسبق ان نزلها هنا ..

وقصيدته يمدح بها قبيلة حرب .. وهذه قصيدة نواف الجهني:

((بـيـض الـغـيـوم))

سلام من شاعر يخط الشعر في بيض الغيوم=تحية من نورهـا تشبـه بروقـه بالسمـاء
تحية تضفي من أسفل أرض إلى عال النجوم=تلبست ثوب الذهب من شان يكساها الغـلاء
كله فخر لمن لفى من دار قـوم لـدار قـوم=من ديرة جهينة لدار حروب جابته الخطـاء
دار الأسود اللي بها الأبطال ورجـال قـروم=يحمل لهم باقة ورود وعطرها يعزف شـذاء
بعد التحية جيت أبعطي علم وأباخـذ علـوم=دام الله اللي راد يجمعني بكم ياأهل الوفـاء
حنا ليامن اشتكى الظامي لهايب من سمـوم=صرنا له الغيم الظليل وصار له عـز وذراء
يشهد لنا التاريخ في وقفاتنا عنـد اللـزوم=وسيوفنا تاصل إلى متن المعـادي لأعتـداء
بكفوفنا يا أخوك صدينا الغذايف والسهـوم=وبصدورنا شلنا همومٍ ما تحملهـا الفضـاء
وأنتم لكم تاريخ ما ينكـره ياكـود الكتـوم=يا نصرة المظلوم لمنه مـن الشـدة بكـاء
عدوكم في المعركة ما يستقر غير مهـزوم=ونصيركم ما يذكر إنه من معاديـه اشتكـاء
ذاوإختصار القول يغني عن تفاصيل العمـوم=وأرفع يديني بالعذر إن كان جاء مني خطاء

الشاعر:نواف الجهني

وهذه قصيدتي ردا على قصيدة الشاعر نواف الجهني...

((بيض العلوم))

جاني سلام الشاعر اللي تسبقه بيض العلوم=من واحدٍ ماله سوى التقدير عندي والوفاء
ابعث تحياتي معه وازيدها بالطيب كوم=يم الرجال اللي فعايلهم لهم درع وحماء
من شاعرٍ مثل قبيلة حرب في وقت اللزوم=يزف لجهينة سلام شيوخها والامراء
لأهل الكرم والجود والتاريخ يشهد للقروم=يشيل في قلبه لهم تقدير واخلاص وولاء
وصل تحياتي يا (ابولانا) ووصلها العموم=يوم اجتمعت بمثل شرواكم وخير الأصدقاء
حنا لنا وقفات ماتنسى وهيبتنا تدوم=في نصرة المظلوم بالحق وإكعام العداء
حرب الحرايب لا احتمى الموقف وعدوان الخصوم=سمٍ على العايل وبالأرواح للصاحب فداء
تاريخنا يشهد له الماضي بتحطيم الرقوم=على البياض وواضحٍ وضح النقاء
وأنتم لكم ساسٍ عريق وروس قوم= هيبة أسود الغاب في يوم الوغاء
ماينكر العاقل فعايلكم وتحجبها الغيوم=على المراجل عزكم دايم وللعليا رقاء
بين القبايل صيتكم ذايع ووصل للنجوم=والسمعة اللي يوم تذكر مالقت غير الثناء
هذا وعن طول الكلام وقصره الأمر محسوم=وفيت يا نواف في قولك وجنبك الخطاء

الشاعر/ سعود الغيداني