ديوان الشاعر الكبير: عضيب بن هليل العلوي الحربي

هذه قصيدة رثاء قالها الشاعر عضيب بن هليل العلوي الحربي
بالشيخ المغفور له بإذن الله :محمد بن عوض بن سرور العلوي الحربي .. وهي موجهه للشاعر لافي بن نفجان الشعبي الحربي..

دق الجهاز وهاجس القلب خايف=متوقعٍ لاخبار ماهي وديده
كني على ماقيل بالعين شايـف=وتم التحـري بالعلـوم الاكيـده
يالافي النفجان دمعـي ذرايـف=أخفيه لاكن ضامني في مزيـده
وقلبي يلفه ياابيض الوجه لايف=لفت هبوب العاصفـه للجريـده
يلوج من بين الضلوع السنايف=وينعى الرفيق اللي تهيا شديـده
ينعى الرفيق اللي عليه الحسايف=عز الله انـه راح منـا فقيـده
ياخوي والله ماصوابي مسايـف=متمكن بالقلب ينـزف صديـده
بعض الملا لو مات موته خفايف=مافاقده ياكـود عيـن الفريـده
وأبو عوض كل البشر له ولايف=بالعرف والمعروف وثق رصيده
شيال بالشده ثقيـل الكلايـف=عضيد من بار الزمان بعضيـده
وسوالفه بين النشاما طرايـف=ماتاع كلمات الخنا مـن وريـده
شهم وكريم وفيه كل الوصايـف=وله سيرة طول الليالي جديـده
مرحوم يارجل سلوكه عفايـف=فاز وتميز بالخصـال الحميـده
يالله ياللـي بالمخاليـق رايـف=عن الشقا تختار روحه سعيـده

::
:
وهذا مرد الشاعر/لافي بن نفجان الشعبي العمري الحربي
على قصيدة الشاعر عضيب بن هليل الحربي أعلاه..

ماجور ياللي دمع عينك نزايـف=عسى الذي تنعاه روحه شهيـده
الادمي لو طال عمـره مهايـف=لابـد قنـاص المنايـا يصيـده
يابو بدر دنيـا توجـه قذايـف=قل للقلـوب الغافلـه والعنيـده
ياما فجت من مقحمين الطوايف=كم فرقت ياعضيب شيخ وليـده
الرابح اللي باعها بيـع عايـف=واختار لـذات الحيـاة المديـده
نصيحة لأهل القلوب العرايـف=الزرع يسقى لاجل يثمر حصيده
مرحوم ياشيخ سلوكـه نظايـف=وادع واودع ماتعـدى الوعيـده
عليه مثلك ماجروحـي طفايـف=الامـر لله فـاعـل مايـريـده
ماتلف جرحي يالنجيب اللفايـف=على رفيق لـه مزايـا فريـده
أبو عوض في قمة المجد نايـف=راعي العلوم الطيبه والمجيـده
له سيرة ماناشها زيـف زايـف=بالازمه يفـرق بامـور عديـده
يوم الخميس أقفت ركابه نكايف=الدايـم الله والرحيـل لعبـيـده
جعله يفوز بيوم كشف الصحايف=في صحبة المختار صاف العقيده
أمين يامغيث الكبـود اللهايـف=ياعاقـل يوسـف لعيـنٍ تريـده

؛

الجمس

قـم يانديبـي على جمسٍ بتمريـنـه=ماهو من اللي مريضٍ جسم سايقها
ليادق سلفه وغنـت لـك شكامينـه=روحك على مركبه ينعـش تشوقهـا
يطرب على ثالثه من نقـرة أثنينـه=يوصف على نجمتن يخلع تشعقهـا
أو مثل شيهانتـن ضفـت جناحينـه=تبي وطن بيضهـا والليـل مغرقهـا
اليا خذا الكوربه تكت موازينه=كنه على ماذكرنا في تخفقها
وقت المغيرب به المـرواح يازينـه=تركد به الروح عن كثـرة تصفقهـا
متنحر لـي عشيـرٍ بينـي وبينـه=الجادل اللي معـه روحـي معلقهـا
يهتز عرش الضماير من سهم عينه=له غرتن يسحـر العشـاق مفرقهـا
مثل اللواميع تبـدي مـن رمامينـه=من مزنتن بالدجا يغريقـك بارقهـا
أبا أتعب الجمس واشرح خاطر الزينه=تفـرح لياشافتـه عقـب تشفقهـا

الشاعر الكبير /عضيب هليل بن شلاح العلوي الحربي

هُنا له رأي في انتقاد من بيع القصايد
وانها ليس سلعة يتاجر بها حيث قال:
"انه كلمني رجال وقالي بعض الشعراء يبيعون قصايدهم ويطلب مني ان ابيع قصائدي فجاوبته
بهذه الابيات

يابو محمد ماقصيـدي تجـاره=انا قصيدي بالعلـوم الشريفـه
لامن خطوى اللاش ضيع وقاره=النفس ياريف النشامـا عفيفـه
كدقال ابن نفجان والعلم اشـاره=شعر التسول مانحطه وضيفـه
ولاناخذ البيت القديم استعـاره=عيبن علينا نفرقه عـن وليفـه
ترا الرجل قيمة حياته وكـاره=لافاز بعلوم الرجـال الطريفـه

الشاعر الكبير / عضيب هليل بن شلاح العلوي الحربي

هذة القصيدة للشاعر عضيب بن هليل العلوي الحربي ، يثني بها على
الامير بندر بن عبدالمحسن الفرم ولقد نقلت القصيده لجزالتها ولمحبه هذا الامير وتقدير واحترام بني علي له الله يطول بعمره لنا وللقبيله

يا الله ياللى تامر العبـد ويطيـع=يا جاعلٍ خلقـك شعـوب وبدايـد
يا مسخرٍ بأمرك هبوب الذعاذيـع=يا مبدلٍ عسـر الليالـي سعايـد
ياموزع ٍ فضلك على الناس توزيع=يا من يجود بحكمتـه كـل جايـد
وجعلت فرق الناس مثل الأصابيع=ماهم سواء ما بين قاصر وزايـد
تمد عمر مشرع البـاب تشريـع=اللى لنا فـى قمـة المجـد رايـد
لابار بالواجـب خطـاة المنيزيـع=وده ينوض وعنـده الحيـل بايـد
نصيت من يجزم على ذبه الريـع=لا قام خطـوان المصفـح يحايـد
بندر ولد محسن بعيـد المراميـع=الفرم وقفات الشرف لـه عوايـد
انهى لزومي في معزة وتشجيـع=يوم ان بعض الناس يعطي وعايـد
هو ريف من ضاقت عليه المطاليع=لاصكته بقعاء وشـاف الزهايـد
كم قالةٍ عند احتكـام المواضيـع=يحلها رغـم النفـوس الحسايـد
نجل الشجاع اللى يطش المداريـع=قدامه الفرسـان راحـوا طرايـد
كم فارسٍ يمهل حبال المصاريـع=لا شاف أخو حسناء يعاف الفوايد
ماهى علوم مجمع الهرج تجميـع=تشهد على ما قلـت كـل البدايـد
زيـزوم قـومٍ بالملاقـا بواتيـع=هني منهم له عضـود وسنايـد
عز الصديق وللمعـادى مراقيـع=عدوهم يشكـي الطنـا والنكايـد
قصيدتي ما أقصد وراها مطاميـع=إلا الثنـاء للـي فعولـه وكايـد
ما ودنا المعروف ننساه ويضيـع=وإلا أنت ما أنت بحاجه للقصايـد

الشاعر الكبير / عضيب هليل بن شلاح العلوي الحربي

هذه قصيدة للمدمر الشاعر الكبير و الذي أحب أن أطلق عليه أسم شاعر حرب بغير قصور في بقية شعراء حرب الذين نعتز بهم . و التي ألقاها في حفل زواج الشاب (( نـــواف )) ابن الشاعر الكبير/ لافي بن نفجان الشعبي الحربي . و إليكم القصيدة

باسـم الكريـم ونيـة الخيـر سرنـا=و الآدمـي فـي حكـم ربـه مـدبـر
ربٍ علـى سـنـة نبـيـه ومـرنـا=و محيي الهشيم و جاعل عوده أخضـر
يالله تمّْـن سيرنـا مــن خطـرنـا=يالواحـد المعبـود ياكاشـف الـضـر
للصاحـب الطيّـب تـقـرر سفـرنـا=اللـي إليـا جـاء واجبـه ماتـوخـر
سـلام ياحفـلٍ مـن أجلـه حضرنـا=سلام أحـلا مـن طعـم دافـي الـدر
بحضـور ابـو نـواف يبعـد سدرّنـا=تستاهـل التقديـر يالحـر الأشـقـر
مضى المجرّب من زمـان وصقرنـا=بالنـادر اللـي ينثـر الـدم الأحـمـر
وفـاك ياريـف النشـامـا غمـرنـا=يالصاحب اللازي على الخير والشـر
علـى مواقفـك القديـمـة شكـرنـا=يوم أن خطو اللاش من واجبـه غـر
أنشـدك عـن رجـلٍ تجاهـل خبرنـا=لعـل لـه حـظٍ بعـد ذلــك أوفــر
بالله يــوم ان السنـافـي خصـرنـا=قصده حداه إبليـس و إلا أنـه أنغـر
لو هو قصـر فـي نظرتـه ماقصرنـا=تبّت يدين اللي عطـا الـدرب الأيسـر
مانعتبـر ياديـب مـن لا أعتبـرنـا=و من يحقـر العالـم بالأنظـار يحقـر
حنـا قضينـا حجـنـا و اعتمـرنـا=و بعض البشر يطلب فريضه ولامـر
و الشاعـر اللـي بالعـدد ماذكـرنـا=مسمـوح لـو أنـه بالامثـال قصـر
مـن عـزوةٍ انعدهـم مـن جبـرنـا=عوق العنيـد بساعـة اليـوم الأقشـر
أبا أنشـده هـو عجـز و إلا حقرنـا=لعل و الله يـا أبيـض الوجـه ماشـر
ليتـه تقصّـا يـوم عــوّد لأثـرنـا=أمـا أكمـل المـشـوار و إلا تـعـذر
و إلا تنشّـد قبلهـم مــن سبـرنـا=هو منهو اللـي ذوّقـه علقـم المـر
حنـا إليـا شـح الكـلام اعتـذرنـا=حتى الرفيـق المستمـع مـا إيتكـدّر
حنـا و قفنـا يـوم موسـم ظفـرنـا=يـوم أن مثلـه يستـمـع و يتفـكّـر
غابت نجـوم القـوم و أبـرز قمرنـا=و اللي يتحدانا عطا الـدرب وأعـذر
رفـرف علمنـا بالسعـد و انتصرنـا=لو كان مايطلع على الشاشـة اصـور
مافيـه داعـي كـود تطلـع اصورنـا=شمس الضحى تقضي على الليل الاسمر
غصبٍ على خشم الحسـود أشتهرنـا=و المستمع ياخذ أمن الماضـي اعبـر
حنـا تـرى عـز القبيـلـة فخـرنـا=قبيلـةٍ عنـهـا المقـابـل تقـصـر
ما أحدٍ ينوش إحدودنـا مـن سطرنـا=يوم انها بالمـاس و السيـف الأبتـر
من .. هام بالهمّـات .. غبـة بحرنـا=عـز الله انـه ماكسـب غـزوه إدرر
ماهو هنـيّ اللـي يجـي فـي نحرنـا=في ساعةٍ يحذف بهـا عقـل و إغتـر
يامـا كسرنـا مـن عظـام و جبرنـا=و اليوم طـاروق الجهـل زال و أدبـر
كـل السلـوم الطيبـه مـن دررنــا=رغمٍ على الزعلان و إبليـس الأعـور
و كسب الفلس قالوا لـي أنـه عقرنـا=عقب أمتلا صدره من الغيـظ و احتـر
قلبـه مريـض و يجهلنـه سيـرنـا=لاشـك لاسـر القبيـلـة و لا ضــر
و أشوف لـي رجـلٍ يخبّـط شجرنـا=وهو يخلعه صوت المريعـي إليـا فـر
يا أخوي مـدري وش بـلاه انتحرنـا=الأولـه طـافـت و هــاذي تـكـرر
بغيـت أقـول إفـلان مـار أتسخرنـا=ماودنا نكشـف عـن الوجـه الأغبـر
مافـاد بالمثبـور غـضـة بصـرنـا=الظاهـر أنـه يحتـري عينـه أتـذر
لو كـل هـرجٍ ناخـذه كن تجرنـا=من كثر مايعرض على سمعـي ومـر
ان كـان فـي كثـر العلـوم انسعرنـا=ماهي علامة خيـر و الصايـم أفطـر
عـن كـل مانسمـع بعيـدٍ نظـرنـا=عيبٍ على العاقل وراء الهـرج ينجـر
إليا صار نأخـذ مـن بعضنـا حذرنـا=أكبـر دليـل أن المـذاهـب تغـيّـر
ترى الـذي غـث الضميـر و قهرنـا=نـاسٍ تحـط بدربنـا عقـم و حفـر
عقـب بغينـا الجايـزه كيـف صرنـا=يالله دخيلـك دورنـا ضـاع وأفتـر
أهـل النوايـا السـود فيهـم كفرنـا=و أمّْنت باللي يبسـط البحـر والبـر
تمت و عـن كثـر الكـلام أختصرنـا=و صلاة ربـي عـدّْ ماهـل وأمطـر
عـلـى نـبـيٍ بالهـدايـه ومـرنـا=إعـداد مـن زار المشاعـر وكـبّـر

الشاعر الكبير : عضيب هليل بن شلاح العلوي الحربي

وهنا ابيات للشاعر الكبير / عضيب هليل بن شلاح العلوي وهي بمثابة ابدي وجهة نظره حيال هذا البيت لأبن فطيس المري
حيث قال ابن فطيس في برنامج شاعر المليون

والله انه احر من دمع اليتيم=دمعة الرجال من فرقاء مره

فرد الشاعر الكبير/ عضيب هليل بهذه الابيات مجاراه

ماخبرت ان الرجل يبكي حريم=ودمعة الرجال مافيها ثمره
صح طراد الهواء دايم سقيم=مستمرن في عذابه وسهره
لكن العبره لها شآن عظيم=ماتجي ياكود من ضيم وكره
ماتجي ياكود من خطوى العديم=شاف غلبه من خصيمه وقهره
ذاك موسمها حسب راي الفهيم=لاتفوق جور خصمه وجبره
اختصرت القاف بالمبدا السليم=كل شاعر جابته حسب نظره

الشاعر الكبير/عضيب هليل بن شلاح العلوي الحربي

مرحبا حييت يا شيخ القبيله
قصيدة ترحيبية للشاعر عضيب هليل الحربي، قالها في مناسبة زيارة الشيخ محمد بن عبد المحسن الفرم، شيخ بني علي، لمحافظة حفر الباطن:

مرحبا عداد ما تنشـي مخيلـه=عد ما هلـت هماليـل المخايـل
مرحبا حييت يـا شيـخ القبيلـه=يا عوضنـا بالصناديـد الأوايـل
فيك عن بعض البشر فرق ونفيله=يا زبون اللي عليه الوقت مايـل
نجل شيخٍ وإن علا فوق الأصيله=ما يوالونه هل السـرد الأصايـل
في نهارٍ فيـه طلعـه وتحويلـه=تالي الفرسـان حمـاي الدبايـل
كان صياح الضحا شاح بشليلـه=وفرّعن بيض الصبايا والحلايـل
خضب السيف المسمى من قبيله=واشتهر في عزوته بين القبايـل
يا أبو فيصل لك فعولٍ مستحيلـه=لك علينا يا ولد محسن فضايـل
والرجل يثبت كلامه مـن دليلـه=وعن كلامي لازم أعطيك الدلايل
بالعطا يمنـاك مدتهـا جزيلـه=والله إنك مـا تمـد إلا الجلايـل
الشجاعه والكرم عندك وسيلـه=والبشاشه فيك مع زين الخصايل
اجتمعنا في مساعيـك الجميلـه=وأنت من عادتك كسّاب الجمايـل

الشاعر الكبير/ عضيب هليل بن شلاح العلوي الحربي

سيرتي مستقيمه.

بسم الكريم اللي خصاله عظيمـه=ربٍ يدبر ما يشـا فـي ثوانـي
محيي العظام الهامـدات الرميمـه=ما شاركه في دبرة الملـك ثانـي
وبعده بديت القاف بأحلى وسيمه=الله على قول الصواب ايهدانـي
هاض الضمير وصار للقاف قيمه=وعن ما يكن القلب عبر لسانـي
منصاه كسّاب الشرف والحشيمـه=منصا النشاما في جميع المعانـي
يهدا لبو طارق عسى الله يديمـه=ريف الرفيق وريف من جاه عاني
يا ليت بادي يوم جتـه النميمـه=عن العلـوم التافهـات احتمانـي
أشره على سبل الرفيق الكريمـه=ما شرهتي على الهزيل الهدانـي
طاوعت دقات العقـول السقيمـه=يا حيف يا الطيب عريب المجاني
وأنا أحمد الله ما عليّـه جريمـه=لاني خيون ولا تضويـت جانـي
عزيز نفس ولي كرامه وشيمـه=وشهامتي عن الطمـان اتحدانـي
شريف ما أمشي بالدروب الوهيمه=كل العلـوم السافـلات اتخفانـي
أمشي طواريق الرجال السليمـه=أجنب الهفوات وأمشـي البيانـي
ولا اخادن إلا من يحوش الغنيمه=مار الغليبه وصلكـم يـوم جانـي
حطيت لي عند المخالف قسيمـه=وأنا أتحدا الظالـم اللـي دهانـي
اللـي ينـوخ ذمتـه للظليـمـه=يرجي وراها من يدبور الزمانـي
ما له عليّ سلوم ربـي يضيمـه=أشر خطأ وإلا الحقيـد اهتوانـي
وأحكم لنا بين الخصيم وخصيمـه=ما ادري عليك الحق وإلا نصاني
رفيق تفهـم سيرتـي مستقيمـه=ولي شرهةٍ تلزمك يـا مودمانـي
لولاك من روس الرجال الحكيمـه=ما أشره عليك وكن ما شيئ كاني

الشاعر الكبير /عضيب هليل بن شلاح العلوي الحربي

بسم الله الرحمن الرحيم
هذه القصيده قيلت بمناسبه للقبيله في حل قضيه داخليه وكان على راسهم الشيخ / محمد بن عبدالمحسن الفرم والذي كان الاكثر اهتماما وسعيا للاصلاح في هذه القضيه حيث تكللت مساعيهم ـ ولله الحمد ـ بالنجاح بفضل جهودهم الحميده وكريم خصال المعنيين بها 0 وطيب معدنهم 0

بسم الكريم اللي خلق كـل الاجنـاس=خلقه كثيـر وكافلـه عـن ضياعـه
اللي عزل نور النهار من الادمـاس=ربٍ سمك عرش السمـاء بارتفاعـه
هاض الضمير ودق به مثل الاجراس=امهـل طواريـق المثـل باندلاعـه
عن اذنكم ناخذ مع الشرح مـرواس=ابي اتحـدث قدمكـم ربـع ساعـه
ترى المثايل وصفهن صفر وانحاس=وفيهن ذهـب ياعارفيـن البضاعـه
ورجي عسانا بالمثل ناخـذ الكـاس=وقافي يشوق المهتـوي لاستماعـه
يامرحبـا ترحيبـةٍ مالهـا اجنـاس=باميرنـا واحضـور كـل الجماعـه
امير من ساس تسيس على سـاس=بـدر ينـور جونـا فـي شعـاعـه
يا أبن الشجاع اللي للاخطـار دواس=شريـدة الفرسـان سبـع السباعـه
بالسيف ينطح لابس الدرع والطـاس=كم فارس يحـذي جـواده اقلاعـه
فيه الشجاعه والكـرم مالـه اقيـاس=ذباح جـل الـذود وقـت المجاعـه
ياحرب ياللي جمعكم يرفـع الـراس=الله يـوفـق جمعـكـم باجتمـاعـه
ياريف من حسه من الوقت حسـاس=حمله ثقيل وبـه صـواب الشناعـه
حي الرجال اللي بهـم قـوة البـاس=اللـي منازلهـم طويـل الرفـاعـه
ترحيبة من قلب ولسـان واحسـاس=دافع وفـاء مالـي وراهـا طماعـه
يدفعني الواجب وانـا اقـول لابـاس=الحـر لـه عنـد اللـزوم اندفاعـه
عسا المساعـي ماتعـود بالافـلاس=عندي على حسـن النتيجـه قناعـه
ياللـي مواقفكـم جـديـده ودراس=ياهـل السلـوم الطيبـه والبتاعـه
اول سلفكم يـوم دقـلات الافـراس=حاشو مقاليـد الشـرف والشجاعـه
حرب الحريبه كان للحيـل مسـاس=عدوهـم دايـم وقلـبـه زعـاعـه
دايم لهم في ديرة الخـوف عسـاس=ويدفع لهم بعـض القبايـل ارتاعـه
وحاضر سلفكم به شهامه ونومـاس=والطيـب يبقـى بالنشامـا وداعــه
يرجيكم اللـي بالمهونـه والاتعـاس=لازال يرجـي سعيكـم واتسـاعـه
تذرف دموعـه والمعاليـق يبـاس=ورع يتيـم وراح قلبـه رعـاعـه
بين الضلوع اللي مثل لون الاقـواس=قلبـه يلـوج ويلتفـت للجمـاعـه
يمسي ويصبح في مذلـه وهوجـاس=ماعنـده الانظـرتـه واستمـاعـه
غير الجدار وصكة البـاب حـراس=ومن غيركم يرجي الضعيف دفاعـه
ياهل الحموه والمـروه والاحسـاس=ماعند مجروح الضميـر استطاعـه
من خلقة الدنيا ترى الناس بالنـاس=والذيـب ماياكـل شرايـح اذراعـه
يالفرم حان الوقت والوضع حسـاس=يرجيك مـن طـول عنـاه ونزاعـه
عليك بالعلياء تراهـا هـي الـراس=اقولهـا مـن كـل قلـب وبراعـه
واللي على يمناك وايسـرك جـلاس=يبـون رايٍ ينقـضـي بانقطـاعـه
ودي تبت الـرأي وتخلـص النـاس=وتخلي سبيل اللي يبـي الانجضاعـه
ترى المرق ماحصله طابـخ الفـأس=ولاينقه العطشـان شـرب النقاعـه
لاصار مايبرز صناديـد واضـراس=يصير فـي رأي الرجـال انهزاعـه
الناس ماتشره على الهابـط الهـاس=اللي كلامه بيـن ضعـف وكواعـه
يشره على اللي به صعاطير واعطاس=رايه سديد وفيـه عـرف وجزاعـه
وصلاة ربي عـد ماهـب نسنـاس=علـى نبـيٍ فيـه هـدي وشفاعـه
أفضل نبـيٍ وضـح الحـق للنـاس=اللي على المسلـم وجـوب اتباعـه

الشاعر الكبير // عضيب هليل بن شلاح العلوي الحربي

السلام عليكم

هذه القصيده قالها عندما اتجهه الى احد الاشخاص من قبيله اخرى
طالباً فزعته بموضوع يخص احد افراد قبيلة الشاعر وما كان رد هذا الشخص
سوى الا يوجد له شيخ او قبيله يقومون بموضوعه فحز ذلك بخاطر الشاعر وقال هذه الابيات

ياشهيـل كنـك بالحقيقـه تحـلا=اعطيـك علمٍ ماينقـض ثباتـه
اميرنـا زبـن الغريـب المجـلا=هو ريف من ضاقت عليه سعواته
لاضايقه جـور الدهـر واستـذلا=واصبح عليه الوقت يرفـع قناتـه
عقب بقا مركاه والكف زلا=وعود يحسب سيته واحسناته
يوجس على كبده من الضيم ملا=حار وتحير ماعرف وش سواته
هـذاك لامنـه نصـاه اسـتـدلا=علي ولد محسن تجـوز شرهاتـه
لاجاه عنه الضيـم والحـزن ولا=بسعود ابو فيصل تحقـق براتـه
اللي لروس العاليات ايتعلا=ماهو من اللي موسم الطيب فاته
شيـخٍ ليا شـاف المساييـر هـلا=قولت هلا يامرحبا مـن صفاتـه
في مجلسه يابن الحمولـه تسـلا=يومن بعض الشوخ يخسر حياته
خطو البليـد اللـي بالانعـام فـلا=بطنه كبيـر ولادرا عـن عباتـه
وله سفرتن فيه الصيانـي تمـلا=من عوج الارجل والهرافه شواته
وربعه حمول الخيل واسأل معـلا=عدوهـم ياشهيـل يكثـر شتاتـه
ربعـن سلفهـم للمخافـه تــدلا=ليتك سألـت العـود قبـل وفاتـه
خيالهـم ياشهـيـل ماقـيـل ذلا=يفرحبهم من ضيم عنـد انوقاتـه
في شيوخنا شيوخ القبايـل تحـلا=ولاخير من ضيع دليـل كلماتـه

الشاعر الكبير / عضيب هليل بن شلاح العلوي الحربي