ألفية بن نامي

ا

اهدي الفيتي لاعضاء المنتدى

الفية خالد سعد ( بن نامي)
اوراق مبعثرة

ا

اليف اسمي بسم رب الخلايق
ملجا الحزين ومن به الصدر ضايق
مجري السحاب لكل الاكوان سايق
سبحان ربي خالق المعجزاتي


والبا بثني بالنبي التهامي
واهديه من روحي صلاة وسلامي
هو واهل بيته تاج روس الانامي
عيني فدا طه ،، وفدوه حياتي


والتا ترى في القلب والقلب ميزان
هم لجا به حيل والبال حيران
اضحك ووسط القلب تشتب نيران
وادوس همي واحقر المجهماتي

والثا ثبات الرجل في الموقف الصعب
مثل الجبل ماهزه الريح لو هب
يرفع مقامه والصبر للفتى درب
والظفر دوم يلد للعالياتي


والجيم جيت اقصد وازومل واغني
والليل جن ،، وويّ ،، لا الليل جني
طار الكرى وجفون عيني عصني
حتى مباتي ،، صد عني مباتي

والحا حياة الزول في طيب ممشاه
يلبس ثياب العز من يوم منشاه
طيب الفعايل ترفع الراس والجاه
مثل النجم فاعلى جبال السراتي


والخاء خالد حرب والراس عالي
وشيوخ حمران النواظر خوالي
اقلط واطب الماد لاجا مجالي
ماعندي الا سوق جاتك ،، وجاتي


والدال دوك القلب فدوة لعينك
والا المشاعر حكمها في يدينك
وانا المسافر وين دربك ووينك
ياولّ لو دربي يضيع خطاتي


والذال ذلوا ناس والراس ماذل
لو الصعاب تتلني في الزمن تل
راسي ،، ودايم موقفي قمة التل
لاعاش رجل ينزل الواطياتي


والرا رحمك الله ياخالي البال
انشهد ان الحب هم وغربال
ياكم تضيع فيه وانلز رجال
ضاعت معاه البينة والسواتي


والزاي زادت في فوادي طواريه
اخاصمه ساعه وساعات اراضيه
مدري ادور الكيف والا اجافيه
خذ من عذابي ياحبيبي وهاتي


والسين سيرت القوافي والالحان
وسمّع قصيدي امةالانس والجان
ماهو بفني لكن الوقت فنان
ياوقت ويش امرك بالامرار تاتي



والشين شط الوقت والبال بي شط
مدري اخط الخط او امسح الخط
مثل الغريق اللي عيونه على الشط
يبغى السباحة لكن الموج عاتي


والصاد صبرك ياحبيبي عليه
جيتك وشايل خافقي في يديه
تراك مثل الروح واغلى شويه
يفداك كل البيض والسمرواتي


والضاد ضاهيت البدر في جمالك
ياورد ياكادي تعبني دلالك
مضناك ساب الكون كله وجالك
يحميك من عين الحسد والوشاتي


والطا طلبت الله في كل حزة
يزيد دار اهلي سلامه وعزة
قومن لهم في القلب قدر ومعزة
بني جهم ربعي سعوط العداتي


والظاء ظالم مير ظلمه سلامات
رايق ودمه شهد في وسط كاسات
واليا زعل سوا بهجره حرافات
يدري غلاه اللي سلبني ثباتي


والعين عيني تسهر الليل كله
والناس عن شرح الهوى مسفهله
ياشمس مالك في اسود الليل طله
تمحي بها ليلي ترى الصبح فاتي


والغين غني ياحروفي على الناي
وغرهد ياقمري فوق الاغصان مشكاي
ولاتضيّع من كلامي ومعناي
وانقش على غصنك سواليف ذاتي


والفا فديت اللي كلامه يسلي
خلي ليا قال العرب ذاك خلي
مدري وش اوصف من وصوفه واخلي
وجهه حلا والخد سكر نباتي


والقاف قالوا حرب والراس شاشي
على النقا ماهو كلامي بلاشي
والعز لو يذكر فدار النجاشي
طرنا له وجبناه غصب ورضاتي


والكاف كافي لامن انشدت قافي
وافي وانا في كل الاحوال وافي
زيزوم حوَّم حول شعري ولافي
والقاف ليّ خيولي المسرجاتي


واللام لا للهون ،، والفين لا لا
للدون ماتحنَى جباه الرجالا
الا الخسيس اللى رضا الذل حالا
والمَيْت مايشقيه ضرب العصاتي


والميم مني يالمى لك محبه
يابنت ابوها ياحياته وقلبه
ظفرة ووقت الجد ريح مهِبّه
تسوى مية رجال ست البناتي

والنون نون العين طير صوابي
رمى سهوم العشق نحوي وصابي
عذّب وانا ممنون لك ياعذابي
معذور رمشك مال جرحه شفاتي


والها هوان الشخص في اللي يماشيه
امشي مع الطيب وكب السفافيه
كما سوات العز باللي يخاويه
مع الذي في الذل قيّل وباتي


والواو ودي اشرح الحال ودي
لكن شجوني في طريقي تصدي
لاجيت امر تقول لي ماتعدي
اجلس وسولف يانديمي وحاتي


والياء يومي فالهوا مثل امسي
علي الهوى اصبح وبالحب امسي
يارويحتي في كل جهري وهمسي
يافخم في قربك وبعدك مماتي

صح لسانك بلا عدد


الفيه وافيه وكافيه

اجدت الجزل وابدعت بالروعه والجمال

صح بدنك ياولد العم

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح بدنك الحب الباقي ماعنك زود

لاهنت وصح السانك

تقبل التقدير والاحترام

وفقك الله

االاخ الجرح صح بدنك ولاهان غاليك تحية لك

هدية رائعة بيض الله وجهك
وصح السانك مليون

صح الله لسانك
ولاهنت
وسلم فكرك وبنانك
دمت برعاية الله وحفظة

صح السانك مجهود جبارتستاهل الشكر
والثنابيض الله وجهك دمت بخير