ديوان الشاعر منصور بن دفيلج المزيني الحربي رحمه الله

فتحت هذه الصفحه لكي نضع قصائد الشاعر الكبير العلم منصور بن دفيلج المزيني رحمه الله رحمة واسعه .. واتمنى من الاخوان من لديه قصائد للشاعر يضعها هنا بهذه الصفحه مشكورآ ..
:::::
عرف عن الشاعر أنه من العارفين بالتاريخ والمطلعين على امهات الكتب المختصه بالتاريخ ، وقد ظهر ذلك واضح في قصائدة ، كما تظهر الحكمه والنصح واضحه بقصائده ، ومن ما قال : ( وهرج الجهالة لوم ومجادله لوم )

يالله يــــا عــلام خــافــي ومــعلـــوم = يــاعــالـم الظــاهـر وسـر العـلـومــــي
تعــين من وقته بــه الصـدق معــدوم = إلا قـليلـه والكــثـيـر مــــعــدومــــــــي
هذا ضــــريح الصدق ميت ومرحوم = والله على خلقــه رقـيـب ورحــومــــي
وهـــرج الجهالة لوم ومجادله لـــوم = ومـجـادل الجـاهــل مـهـونه ولـومــــي
ومصادق الخـدعـه مضره ومسمــوم = نـفـحـات نــقـال الــضـغاين سمومــــي
لا قلــت مـفـهـوم عـود لـمـفهــــــوم = وغـيـر لك الـمـفهـوم عـنـد الـفهـومـــي
إن قـــلت علمك حلم وأخبارك حلوم = كـثـرت عـلـيك مـجـادلات الحـلـومـــي
وتظهر عليك علوم من غارق النــوم = وإن قـلـت نـايـم قـال راضي بـنـومـــي
وركـض عليك القرم مع جملة قروم = وحـرض عـلـيك الـقـرم كـل الـقرومـي
إن شفت حرف الجر ينصب ومجزوم = إصــبر لحــكـم الله وخــلك جـزومــي
إن شــفت وقـتك فيه مـيلات وثــــلوم = إصــبر لحــكم الله وخــلك عــزومـــي
مــن كونـت الدنــيا تـغيـر ولا تـــدوم = الــدايم الله مــــاش شــــــــيٍ يــدومــي
والمــرجلة ماتـنوصـل كـود بعـــزوم = والـعـلـم نـور وفـي خصم الخـصومـي
واللـــي يـريـبـك جنـبه ما أنت ملزوم = لا صــار ما يلــزمـك مــالك لــزومـي
والعنـــبره مــا تـنـتقـارن مـع التــــوم = الثـــوم ثــوم ومـــزرع الـثـوم ثــومـي

وله هذه القصيدة الجميلة (سكر سموعك عن سماع الاشاعة ):

يـــاطالب العلـــيا تنقـــى البضــاعة=وأنئى بنفــــسك عن وكالة يقــــــولـــون
سكـــر سموعك عن سماع الإشـاعة=لاتـــــنقل الهـــرجة مع اللي يهرجـــون
الحكـــم لله خل عندك قـــنــــــاعـــة=خل الإذاعــــة حــــق ناسٍ يذيــعـــــــون
ولــيا سمعت اللي شنيــــع سمــــاعه=لا تنقـــل المنقـــــول من دون ماعــــــون
خل المبـــاع بوسط سوق المبـــاعــه=ما يشتريــه إلا من النـــــاس مفتــــــــون
أمــــانة المســـــلم بعنــــــقه وداعـه=ومن لا صدق بالقــــول ماهــو بمأمـــــون
من طاع شيطـــــانه تحقـق ضيـــاعه=ومن أعتصم بالله من الشيـــن مصيـــــون
يا باذل الحســــنى زمــــــان المجــاعه=الأجــــر مايكتب لنـــــاس يمنــــــــــــون
أخفـــه عن الأخــــرى وبث الأذاعــــه=ماهي طريقة ناس لله يـــرجــــــــــــون
لاتجــــادل اللي مايفيــــدك نـــزاعــــه=الصمت حكمه وأهل العـــــــرف يـدرون
ترى رفيع النفس يرفــع ذراعــــــــــه=ويصــــافح العلـــيا بحشمــــة وقانــــون
يوم الخــــطأ تم النقـــــا ياخزاعـــــــه=يوم الوتيــــر أنهــى الصحيفة من الكـون
حجافــــل الإسلام جــــت بإندفــــاعــه=تســــاقط الأصنــــام في رمشـة عيــــون
والله نصـــر عبده وجنده بســـــــاعه=غصبٍ عن الأحـــزاب ماكان يرضـــــون
وصلوا على اللي له سجــود الشـفاعه=تحت ضلال العرش ياللي تصــــلـــــــون

أقدم لكم رائعه من روائع الشاعر العلم/منصور بن فالح بن دفيلج..
..حيث أنها في المقام الأول للدفاع عن خير البشر محمد -صلى الله عليه وسلم- بالإضافة الى قوتها الشعرية..
واليكم القصيدة..بعنوان((مليانة الدنيا من الشر والخير))

يـالــله يـا رزاق حـمــر المـــطاييـــر=حسناك يامحيي رميم العظامي
يالله عفـوك يوم حـشر الجماهيــــر=تنشر من الأجداث مثل التهامي
به قسم للــجنة وقســم لـزمهريـر=أحصى عدد حسناتها والأثامي
بيبــــان للــــجنة وبيبــــان للـــغير=يفوز بالــتكريم كــل الــــكرامي
وصام رمضان صيـام وافطـر مفاطير=ويدخل مع الريان جمع الصيامي
ومليانه الدنيــا من الشــر والخيــر=وسميت باسم الله رب الغلامي
والــصبر مفتــاح الــفرج للــمباصير=والصدق لرجال الفضيله وسامي
ومن عاش في دنياه من غير تفكير=ماهو مميز بـين حـل وحــــرامي
وطيـــر بلا جنحــان لـو فـز مايطيــر=وده يحوم وفوقه الــحوم حــامي
والحيل تمسي حيل تصبح معاشير=وتالد وترضع ثم تفطم فطامــي
تتبـــــع الآيــات واقــرا الـــتعــابيــر=هـذا كــلام الله ماهـو كــلامـي
يـوم القـوافـل روحـت بالـتباشيــر=أبصــر عماها يوم شمه تهامــي
شــم الـــقميص وكبـر الله تــكبير=والتم شمل الـبيت بعـد الهدامــي
وقصة بحيري يوم ضيف هل الـعير=في رحلةٍ للصيف والـدرب شامـــي
قالوا غــريبه منـك ياراهـب تصيــر=ماهي طبيعه منك في كل عامي
قـــال الله الآمــــر ولي الــمـقاديـر=وهذا اليتيم اللـي عليه السلامــي
وجا ميسره بالعلم والشرح تعبير=وزاد أمــنا رفــعــه وزود إلــتزامــي
أم الـــخيار الـمؤمنين الـمشاهير=أول رعـــيل الـــمؤمنين الـحشامـي
واللي لهن من سـورة النور تنوير=رغم افترى أهل الإفك رمي التهامي
الله حـــبا بيــت الـــنبوه بتطهيـر=وفيــه الـــنبوه ختمت به ختـــامــي
نبـينا اللـــي لـه من الله تـوقيـــر=غصبـــاً علــــى طلابة الإنتقامــي
أهل الرسوم الحاقدين المحاقيـر=ومـخالفين الحق وأهـل الظلامي
وأتباعهم من عايديــن الـمناشير=مـن بيتنـا يــوجد عميــل اللئامي
باســم الــتقدم للــمزامير تبريــر=بيـع القيم والدين عبـر الحطامـي
وقتٍ تغيــر فيه حــتى الأعاصيــر=تدعـى بكاترينه وتدعـى سونامي

قصيدة بعنوان / أخير من خطو الصديق إعتزاله

بديـت باسـم الله جـل جلالـه=مافيه غيره له على الناس منـه
من لاتوجـه للكريـم بسؤالـه=خييب رجاه بخالقه سـوء ظنـه
وآخير من خطو الصديق اعتزاله=لاصار قربه نار وفرقـاه جنـه
وان شفت لك خبلٍ يراعي ظلاله=يشيل نفس(ن) بالخطا مستعنـه
لا تجادل الجاهل يغثـك جدالـه=لا ملت من قنه رقا فيـك قنـه
الكامل اللي ما يضاهـى كمالـه=وإلا البشر كل يقول إنـه أنـه
كم طالباً زوده ورى راس مالـه=ضحك لهن يوم إنهـن ضحكنـه
المال سمى الشيخ خطو الحثالـه=لو هو سلالـة هـن والأُم هنـه
صعد على راس الطويلة لحالـه=مشاعره فـوق القمـر طلعنـه
وكم من صميدع كاسباً للجمالـه=كابـد ظروفـه لينهـن نوخنـه
وعليان طاح ولا بقا إلا عقالـه=كلٍ نصاه بخوصته مـع مسنـه
وكم جامعٍ يجمع ويورث كلالـة=حظ الجمل يـوم النمـل جمعنـه
ورث عيـالٍ ماتسمـى عيالـه=لله في خلقـه بهالكـون سنـه
والنمل طلعة ريشته من زوالـه=والنفس لوعاشت تزور المجنـه

قصيـــدة / خوارج التاريخ

إبن حزم راوي للأنساب بسلـــوب=علمه فرض على الجميع إحتـــــــرامــــه
وإبـن كثير إمام راوي ومحســوب=علمه صحيح وكامل الإستقـــــامـــــــــه
ومـــأثـر مزينة بالأســلام ياحــزوب=ترفـــــع بها هامـــــه وتنهــــان هامـــه
وعروبة الكـذاب ماتستــر عيـوب=ولاتلَزم التـــــاريخ غيــــــر إلــــتـــزامــه
ياللَه يــامــن رد يوســــــف ليعقــــوب= عونــك على اللـــي تاجـروا بالكرامه
وإن تاجر الكـذاب في علم مكذوب= علــــــــى جبينه من دواديـــه شـــــامــه
كتَب الفتوحات إليا غوى كل سعبوب= يابـــــــا يعَض بشائة الله بهامـــــــــه
يقرى أسد الغابـه وما فيه مكتــــوب=قبل مزامير الهيـــــوس الخمــــامــــــــه
وهرج الزعيم اللـي من الحق مرعوب= عن مستــوى عقـــلــه يميـــط اللثامـه
ويبقى معـــــادي للكـــرامه ومغلـوب= اللي يدور بالرخــــــيص الزعــــــامــه
وينبَش الأجـــداث ويحـيط عذروب=للي علشـــــانـــه حذف للعمــــــامــــــــه
من حبه الله صار بالأرض محـبـوب=ومن طاح حظـه صار خصمــه كلامــه
سفينتـــه سيــكل تجنــح على صــوب=وإن إلتــطم بالجـــــال عوَد قمـــامــــه
وإليَــا تمـادى بالخطــأ كــل منكـــوب=مأثــــر الإســــلام تبــــــقـــى لجـامــه
من غاضـه التـاريخ يقــراه مقلــوب= ســــراي ليــــلٍ حانــــــــكٍ فـــي ظلامه
خوارج التـاريخ تمشـي بلا قـــلــوب= أخــــلاقهم تضفـــــي عليهـــــم لئــــامه

(الشعر به جزل وهزل طايش)..

الشعر به جزلٍ وهزلٍ طايـش=ومن طاب حظه جنبه طيشانـه
أحـد يصيـر موفـق بألفاظـه=وأحـد ينانـي كنـه الذبـانـه
مثل الذي سيـر علـى خويـه=يطلب وفاه اللي مضى بزمانـه
وبعد الزياره والقيـام بواجبـه=رد الوفـا بالهزلـه الرنـانـه
المعدن الطيب يحفـظ الشيمـه=والمعدن اللـي دون ذا وجدانـه
ومابه لزوم نقـول هـذا وهـذا=لاعبيـد يعنينـا ولا ضيفـانـه
نضرب مثل للناس حول المعنى=ولاكامـل إلا الله هـو سبحانـه
والي يبي يعالج أمـوراً شايكـه=يبـدي علـوم هادفـه مليانـه
مثل الذي ينصح شبـاب بـلاده=هذا الذي خـلا الوفـا عنوانـه
ومثل الذي يقول حدو مهورهـن=لاترهنون المحصنـات رهانـه
شبابهن إن فات ماهـو راجـع=فيقوا إن كان أذهانكم سرحانـه
شبابكـم ليـه يتجـول بــرا=يبحث عن الزواج من حرمانـه
ومظاهر الحفلات ليلـة زفافكـم=البـذخ بالنعمـه عظيـمِ شانـه
عودوا لماضيكم تراه أفضل لكم=يامعـدن الأمجـاد والأمـانـه
تذكير والذكرى تفيـد المؤمـن=ولا هنا لزوم وكل شخص وشانه
والشعر به هزل وجزل طايـش=ومن طاب حظه جنبه طيشانـه

عفــــا الله عن نفــس حـداهــا حيـــاهــا=تهــوم المعـالي في زمانٍ فحـــاهـــا
زمـــانٍ ضحك لأهــل الريـا جافي الوفـاء= بعض سلوم الناس مسنـي سناهــــا
وبعض اللحـى سيما هل الخير جنــــــدت = لأغــراض دنيــا بس لاهـي سواهـا
نـــاس تــقيــمـها ونـــــــاس تهيـنهــــا = وأنا ماعيب أهــل الشرف في لحاها
العيب كثر الغش والكـــذب والجشـــــــع = ونفسٍ تمــــوت بغيــها من شقاهــا
ومن عاش بالحيــلات والكذب والريــــا= يمــوت نفســه ماعـرف مستـواهـا
ماهو معمــر تي تقـــوم قيــــامتـــــــــه = يمكن تقوم قيامـــته في ضــاحــهــا
وإلا عشيـــتهــا وهو غــارق بــــهــــا = يلهــث ويجمـع سحتهـا من رباهـــا
وكسب الفتى بالصدق من صالح العمـل = وديـن الشــريعة كل حيلة نفــاهــــا
وحنــا بوقتٍ معجــزاتٍ مصــايبــــــــه= ولا كـل من قال الفضيـله مشـاهـــــا
ماتصـدق الصادق تخاف الخدعـــــــــه =من كثرهـا العـــالم تكــدر صـــفاهـا
وحتى مفـاهيم الرجـــــال تغيــــــــــرت = ما تأمـــن الجـــابــه ولا اللي حكاهـا
وأوصـــيك يا فـالح تجنب هزالهــــــــا = وأترك علــوم الطيــش للي بغـاهـــا
ومخافـة الله لاتهـــاون بشــانهــــــــــا = ترى عمـود الديـن مقضـب عصاها
والعـلم نور ولا تجــاهـــل فضـــايـــلـه =الأغبياء ماتنــول شئ بغـبــــاهـــــا
ولا تعاشر إلا صاحب الصدق والـوفـاء= وإحفظ حقوق أهل الوفاء في وفاهـا
ولاتعــاشـر الهمـاز راعــي النميـمــــة = اللي عروض الغـــافلين يهـاجهــــا
وترى عفيف النـفس لـــوبه خصاصـة= يجديك لـو لـه حاجةٍ ما قضــاهـــــا
وترى الوفــاء بالنفوس مثــل الأمــانة = وبعض نفوس الناس يصعب رضاها
ترى الردي يوذيك في كبـر شرهتــــه =وإن قال جـابـه بالــوفاء ما حمـاهـــا
إعــرف مقامــه ثم جنــب مضــاهــره =وإحفـظ حقوق أهــل الوفـاء بمعناهـا
الله لا يبقـي نفــــوسٍ دنيـــــــــــــــه = الله لا يثـري على أرضــه ثراهــــــا
في جـاه رب اللي رفـض منوة أمـــــه=اللي تمنــت بأمنـيه ما أمتـــناهـــــــا
اللي تمـــنت للجنين كــــرهـــــــــــــا =والثانيــــة يوم كرهتـــها هـــواهــــا
ملهــم بحكمـــه معجــــزة في زمــانـه =بأخبـــار كل الحـــالتيـن ورواهــــــا
والأم ماتـــدري عن الســـر والخبـــر =مــار الجنـين أنبــاه رافــع سمــاهـا
دنــيا تدور أفلاكـها في عصــورهـــا =مـمـــر ما خــلد عليــها أنبيـــاهـــــا
الله يوفقنــا مناهــج نبيــــــــــــنـــا = ويجيــرنا من حــر حـامـي لـضـاهــا
في ساعــة ما تـوجد أنســاب بينـنـا=وأعمــالنا تحصـــى بسجـلٍ طـواهــا
عفــا الله عن نفــسٍ حــداهـا حيـاها= تهــوم المعـــالي في زمــانٍ فحـاهــا

الشاعر الكبير/ منصور بن فالح بن دفيلج المزيني رحمه الله

بعنوان( واللي يبي عوج السوالف تسليه)

يالله يالــي فيـــك شــد العــزايــم= فردٍ صمــد ما غيـرك أحدٍ أنـــاجـيــــه
مالي ومــال مدوريــن الثـــلايـــم= واللي يبــي عــوج الســـوالف تسليـه
دورٍ تخاوا فيــه مفــطر وصـــايم = يحسن بــه المحســن وتنكــر حسـنايه
والوقـت وقـت الله هو الوقــت دايم= الفرق في نـــاسه وســــره لــباريــه
يالله عفــوك يــوم فــل الحـــزايـــم= يوم العتيــد يجيـــب سجلٍ كتب فــيـه
يـــوم الخــلايـق بين طايـــح وقــايم= يوم كل إمـــرٍ ولــه شـأن يغنــيــــه
تقــطع الأوصـــال مـــا بــه دعــايــم = بين الرجل وأعضاه ما به مشـاريـه
هـــذاك يـوم المفخـره والهـــزايــــــم= يكـرم بـه السـبعه وتحشــر طواغيـه
يــوم الجــوايــز وإســـتلام الغنـــايـم = يفــوز بــه من يســر الله مســاعيـه
كم واحـدٍ يمشــي على الوجــه هايــم =وكتابــه اللي في شــماله يناديــــــــه
ما بــه صقـــور ولا مسمـى حمــايـم = كــلٍ يبـي ينظـر سجــلـــــه ويكفيـــه
يــوم تحـــاكم فيــه حتى البهــــــايــم=والحـكــم بأم قـــــرون يطلــب تمنيـه

الشاعر الكبير/ منصور بن فالح بن دفيلج الحربي رحمه الله