أسباب الغياب

ينشدوني عن: الغيبه ( وهل من جديد؟) = قلت: والناس ما تدري على أيش الغياب
يوم أسكّر ضلوع القلب عن هالقصيد = كل ما اصك باب ايفك عشرين باب
صار للناس والأسرار مثل البريد = وصرت أصدّق ظنون الشك والارتياب
ليت قلبي ضلوعه من فولاذ وحديد = ما تنوشه سهام ، ولا تدكه حراب
وآتريّح من اللي مستبد ٍ عنيد = كل ماأصد عنه ، ايصد لي باقتراب
وكل ما جيت أقرّب منه وأرجع وأعيد = حال بيني وبينه شيء مثل السراب!!
شاعر ٍ لو معه حكمه وراي ٍ سديد = كان ما خرّب العامر ،، وعمّر خراب
لا مسيّر ولا مخيّر ولاني فريد = لا تلومون مثلي من يلوم السحاب؟
أعشق الصعب من هذا الكلام الفريد = وأتبع العذب لو ما فيه غير العذاب
أصعب الشعر جمع المختصر والمفيد = وأتعس الشعر تطويله ولوهو صواب
لا يهمّك ليا دوّنت فرد ٍ وحيد = ساحة البيت تكرم عن جميع الرحاب
ما يقلل مقام السيف قل العضيد = سيف واحد ولكنه يقص الرقاب
والله إني عن المنشود ماني بعيد = فكّر اشوي تلقى في كلامي جواب
كان ما أصافح المعنى وبيت القصيد = عن غياب الجديد أهوى جديد الغياب