مشتاق

مشتاق انا والشوق لعلوم الرجال الغانمين = في مجلس فيه الرجال اللي يسراقبالها
مشتاق انا يوم انهم وسط المجالس ساطرين = وليا بديت السالفة ربعك عطوك ابدالها
مابينهم نفس خبيثة كلهم متصالحين = والباطلة لاجاتهم قاموا بقطع احبالها
اذا بد بالهرج واحد كلهم له سامعين = مااحد يقاطع هرجته لين انتهى مجدالها
مشتاق لرجال تقول ولا تجيب اللا الثمين = ارجال لا قالت دلايلها سند لاقوالها
مشتاق واللي شاقني يوم انهم متقابلين = والدلة الصفرا عليهم يدرج فنجالها
مشتاق واللي شاقني لاجوك بالعلم اليقين =ربع سلفهم شرهة الجابة على من قالها
مشتاق لرجال لباب البيت دايم فاتحين = والنار مشبوبة وواجبها مقلط جالها
وليا لفاهم ضيف فازوله وجوه مرحبين=ماحسبوا فالموجبة من فالهاواعقالها
مشتاق لرجال لياجات اللوازم واقفين = ارجال تبرك للحمول اخفافها واثقالها
مشتاق للي لاعطيته علم والينه ذهين = يحفظ رسالة مرسلينه دقها واجلالها
مشتاق للي قالقضايا والسواير عارفين = والمشكلة من يوم تبدي قدمها حلالها
مشتاق للي دون حلتهم دواما محتمين =ماطبها فاسد ولا مفسد دخل في احيالها
والمعتدي يلقا رجال فالشدايد ماتلين = الموت دون الحلة اللي صافيات اسبالها
لحاقة البارود لانادى المنادي من يعين = كل الضعن محمي ورايتهم يظل اظلالها
ان كان جاهم طيب تلقا ما يسر الناظرين = وان كان جات الثانية يرجع بها حمالها
مشتاق لرجال لجار البيت دايم فازعين = واللي طلب نخوة ليامنه نصاهم نالها
ويزيد شوقي كان صاروا فالسراير صالحين= صلاح فالدنيا ودار الاخرة يسعى لها
مودبين الورع والبنت محشومة ماتبين = فحضن واليها يالين تروح مع رجالها
والشوق الاكبر كان جلستنا تحت وبل الغشين= سحابة ترعد والاخرى ماانقطع همالها
ياماحلاها والرعد فيها اصح النايمين = وحنا في مجلسنا نراعي برقها وخيالها
لكن شوقي قال وين انت وجيل اليوم وين = ترىحياة الناس محكومة بحكم اجيالها
الشوق ناداني وقال ارفق بحالك ياحزين = هون على روحك تراها حالتك يرثى لها
مانت مغير سيرة الايام واحوال السنين = دنياك تبغى من يجاريها على منوالها
وقلت انا مشتاق واشواقي على تقوى ودين = ماموج عن سلم الرجال الغانمة وافعالها
دنيا تمر وطيب الاعمال معها كل حين= وكل هجرة يعلم الله حافلة بارجالها
تمت وصلى الله على المختر سيد المرسلين= ماهلت مزون السحاب وعد قطر اثعالها