ديوان الشاعر \ نافع الحربي

جيت الرسوم اللي تقدم زمنها

وهاضت عليه ذكرياتي وغنيت

وقفت فيها وانشد الارض عنها

في نقطةٍ منها هي أقفت ونا قفيت

ياليتني ماشفت واضح سننها

عنها مع الدرب المطرف تعديت

وأرخيت للفاطر مصارع رسنها

على. طريقٍ ماتجيه العفاريت

عهدي بها خضراء رتوعٍ عدنها

واليوم. جردى ما بوطنها ولا بيت

حتايفٍ غبرٍ تروع اقننها

شهبٍ جوانبها ما فيها منابيت

من عقب مايجنا شذى الورد منها

وارتاح فيها لا سرحت وتمشيت

وين الذي تزهى مراتع وطنها

اللي لها في زهرة العمر خاويت

يوم أنها فيها وانا. من سكنها

واليوم مايسكن بها ذايع الصيت

مالي بها لو السحاب يودنها

شدوا وانا من عرض من شد شديت

نافع مطر

يامصورين جنيف ولندن وباريس

مالي هوى في ديرةٍ ماهي داري

هواي دار مكملين. النواميس

اللي بحماها بيت ربي يزاري

وهواي لاذعذع براد النسانيس

ولبست روابي نجد ثوب الخضاري

جيبٍ يحطم محكمات المتاريس

ياطى على روس الأفاعي جهاري

وخوة رجالن ماضرو بالمجاليس

فيهم مع الشيمة نشاط ووقاري

اصل بهم قفراً من الوسم ماديس

باقي عليها من مطرها خباري

نافع مطر

ابطيت يادحيم ابن نواف
وانا احتري منك مندوبي

اقفيت وبطيت بالمحراف
وانته من الناس محسوبي

لد النظر ورقب المشراف
ولعب على القوس مسحوبي

مايولع النار يالعراف
شريم لو كان منجوبي

قالوه قبلي خلف وسلاف
والطوب يبناء على الطوبي

عندي بصيره وفي انصاف
ماني على الكذب مغصوبي

اصخر القاف بعد القاف
والعب على كل ملعوبي
عجاب صالح الحنتمي

بعد الفجر ياللي تبي هبت الريح
وفنجال والم للمسايير والجار

سير على ريف الوجيه المفاليح
عبدالله محمد راع الكيف والكار

راعي هلا لو اليالي شلافيح
عساه دايم من طويلين الاعمار

رفيق من روس الرجال الطحاطيح
عيال حنتم لاهبا كل هذار

تاريخهم وفعالهم دون توضيح
بيضاء بياض الشاش في كل الاقطار

فوق السبايا بالمعارك ذوابيح
ياما رمو من شيخ لابه ومغوار

ياحبتي لهل والوجيه المفاليح
اللي لهم شيمه وحشمه ومقدار

وسج القدم بين السهل والحاليح
في خايعن نبته خزاما ونوار

عجاب صالح الحنتمي

عن اذنكم بالطيبين النشاما

ولا الردي ماله لزومٍ علية

أنا امتطيت الشعر ونا غلاما

ماني بحاجت ناقد الشعر ليه

عليكم مني كل يومٍ سلاما

وانا هواي فجوج نجد العذية

مالي ومال هروج راع الملاما

والنفس عن بعض المواقف غنية

نافع مطر المرواني