ديوان الشاعر \ نافع الحربي

ياوم ان كلن في قصيده ترنّم


هذه القصيدة ذكرت فيها ما ستطعت من بعض مفاخر قبيلة حرب
والمعذرة والسموحة من القصور حيث مفاخر قبيلة حرب تحتاج إلى مجلدات :





ياوم ان كلن في قصـــــــيده ترنّم = والشعر سلّم للقــــــــــــناوات همه

بنيت مطروقٍ يسم العدى ســــــم = سمٍ ذبح سم الافاعي بســـــــــــــمّه

لعيون حرب اللي عليـها الثناء تم = حرب الحرايب منجــــــزين المهمّة

قبيلةٍ لها من العصر الاقـــــــــدم = مجدٍ تعلا الصـــــــــــدر لفروع قمة

أهل المهار اللي تخـــم الوطى خم = حمر العيون مكاضـــــمات الازمّه

يما عليهن فرّقوا جمـــــــــعٍ ادهم = نمرا قويٍّ باسها مدلهـــــــــــــــمّة

شتاتهم ياخذ نهارين ملـــــــــــــتم = لو تجتمع كل العـــــــــــرب ماتلمّه

من دون وضحٍ دعج واشعافها حم = سيلٍ تحدّر مع صحاصــــــيح حمّة

ترعى بنا الحد البعيد الموســــــــّم = تقطف زهر عشب الفياض المطمّة

حتى نبات الأرض فيها تصـــــــرٍم = تذرا به الأرياح في كل يمّــــــــــة

ثم انثنينا لماردٍ صــــافي الجــــــم = محــــــدٍ ورد قدامنا عذب جمّــــــه

البل ترازم والاصــــــــــايل تراهم = والجو لاهوب السمــــــــــايم يسمّه

لنا مع التاريخ عهـــــــدٍ مخــــــتّم = مجدٍ دواوين البطولة تظــــــــــمة

خوينا من خنجر الموت يسلـــــــم = نموت ويرجع طيّـــــــــب الفال لمّه

ودخيلنا عن من يريده محــــــــرّم = صعبٍ وصوله والمـــــــراوين يمّه

وان قيل ياهل الجـود من يتكـــــرّم = خلف يصوّت للمكارم بكـــــــــمــّه

والجار له حقٍّ علــينا مقــــــــــــدّم = عهدٍ عليــــــــــــــنا جارنا مانذمّه

وبوي يوم الدم يطـــــــلب به الــدم = سامح بدمه فدوةٍ لبن عمـــــــــــه

جرح اللحم مــع مر الايام يلتـــــــم = وجرح القلوب الطـــــيبة من يلمّه

ابيك يابن العم حصــنٍ عن الهـــــم = القاك لاضاقت علي المهــــــــــمّة

حنا كما نواٍّ ساحــبه اليا ضــــــــلم = سيله نحاوي كل نابي يطـــــــــمّه

منا الامير محنّي السيف الارخـــــم = من فوق غراء مابنحــــرها ترمّه

ومنا الشجاع معشّي الذيب الاسحم = عشرٍ مردّف باللقاء ما تهـــــمّه

حنا هل الجمع العظيم العرمـــــــرم = موج المحيط اللي كـــما الليل يمه

لنا دليلٍ بالتواريخ يعــــــــــــــــــلم = مشمرخٍ فوق المزن روس شــمّه

شيباننا بالحق والعدل تحـــــــــــكم = وشبابنا ياخذ من العلم صــــــــمّه

وحنا فدى دون المليك المعظـــــــّم = نفدى وطــــــــــنا وديننا بكل همّة

تم الجواب اللي على السبع يقــسم = اسقيـــــــت جل الوقت دمّي ودمّه

سالم سليم امسلّم السلم الاســــــلم = سلمٍ على عهد المــــــــواثيق تمّه


نافع مطر المرواني

يمشي بي الواجب على الوجه قدّام


هذه القصيدة قلتها أيام الغزو الأمريكي على العراق حيث كلفني العمل في

مهمة إلى الحدود الشمالية وقلت هذه القصيدة :



يمشي بي الواجب على الوجـه قداّم = حتى ظلام الليل جاله سهــــــــومي

من فوق مرعوشٍ ننوشه بالاقـــدام = جسرٍ على طي الفـــــيافي عزومي

اليالمسته عن مدا هــــقوتي زام = قام يتخطّف نابيات الحــــــــــزومي

كنه اليا حوّل مع النازية ســــــــــام = بخط الدفاع موجّهٍ للهجـــــــــــومي

احكم تمثاله على نبـــــــــير الا رقام = اعد فوقه ساريات النجـــــــــــومي

يوم ان كلن في حضن صاحبــــه نام = وطاب الكرى مع زاهيات الهدومي

نومي على صمدٍ مثل قطعت الخـــام = اليا بغيت أنام ما زان نومــــــــي

يما جهمنا بوّل الصبح مجــــــــــهام = ويما سرينا ليل غدرا قحـــــومي

ويما شوتنا الشمس بالشارع صـــيام = بوجيهنا ننطح لهيب السمــومي

ويما دعانا أمر على غـــــير ما يرام = بالصبر عدّى والمهين امخدومي

من دون ستر وجيــــــهنا نقدم إقدام = ندحر شياطين الكسل بالعـــزومي

تسوقنا سود الليـــــــــــــالي ولايام = حتى نذير الموت جاله رســــومي

العمر يطوى كل عامٍ بعـــــــــــد عام = يطويه مجهول النظام اللهــــومي

والله خلق خلقٍ على كل الاقســـــــام = معطى ومحدود العطى ومحرومي

كم من وضيعٍ حطّه المال مـــــــقدام = لولى فلوسه ما سوى فص ثومي

وكم من خبيثٍ يلمز الناس نمـــــــام = دايم لسانه بالأجـــــــــاويد يومي

وكم من رديٍّ ناقص العقـــــــل لواّم = كلن حصلّه من بلاويه لومـــــــي

وكم من ضعيفٍ قدرته عض الإبهام = لا جاب علم ولا تحذاّ علـــــــومي

وكم عاش بالــــدنيا غريقٍ بالاوهام = مغرور في نفسه سجين الوهومي

وكم نوّ صيفٍ في هــــقاويك ما دام = معهم عليهم عشرته ما تـــــدومي

وكم عاشقٍ صابه على خله هـــيام = من حب ترفات الصبايا امهـــيومي

وكم طيّبٍ ينقلك للطــــــــيب همــام = شهمٍ لصعبات المراجل يهـــــومي

عزٍّ لربعه كلّهم عـــنده حشـــــــــام = ومن حشّم الاجواد صارامحشومي

وكم خيّرٍ من راتب الفقر منـــظـــام = ودّه يقوم ولا حصلّه يقــــــــــومي

وكم من فقيرٍ طاح حضـه ولا قــــام = صار الفريسة للعفون الرخـــومي

وكم من شباب شب في دين الاسلام = الله هداه لطيّبات السلــــــــــومي

جليسه القرآن تفسير وحـــــــــــكام = نعم الجليس اللي يبيد الهمـــومي

وكم كاتبٍ بيّد صواريخ الاقــــــــلام = عليه من فن الكتابة وســـــــومي

وكم شاعرٍ وثّق حروفه بالاخــتام = درٍّ من الجوهر عليه الختــــومي

وكم شاعرٍ بالواسطة وصل الاعلام = خلى بياض الشعر كله وشــومي

وكم من شجيعٍ للمناعير لطـــــــــام = تاسم مخاليبه رفيع الخشــومي

ولا دام عرش العز للشيخ صـــدام = طشه زمانه من رفيع الرجــــــــــومي

أصبح ذليل يهددونه بالاعـــــــدام = ما كنه الليث الشجاع الجــــــــزومي

في مامضى شيخٍ على كل الاقـوام = وليوم صاروا حتى الاصحــاب قومي

يا الله يا للي للمخاليق قســــــــــام = تجعل نصيبي من خيار القســـــومي

يا معطي أبنادم فضيلات الانعــــــام = أنا دخيلك يالكريم الرحـــــــــــــومي

لا خير في عيشٍ بلا عــــــز وكرام = يوم المعزّة ينشـــــــري بلف يومي

الله من قلبٍ على هاجسه عــــــــام = بين المغاليق العرايا يعــــــــــــومي

عن كل مغرورٍ رفع خشته شــــــام = يحق له عن كل ناقص يشـــــــومي

شم الهوا بأرضٍ بها شيح وثمـــام = غضٍ ورقها بالزماليــــــــق يومي

وهضبة ربيعٍ فوقها الصـيرمي حام = مفرود كحليّ الجــــــناح الردومي

وعشبٍ سحابه بالسماء يرزم ارزام = على رفاع الارض مثل الغــيومي

يجلا هواجيسٍ على قلبي احـــــــيام = رواسيٍ بقصى الظماير أجثومي

الله على ربعٍ لهم بالشهـــــــــر زام = اقطع بهم قفرٍ بعيد اليمــــــــومي

ومالٍ يصخّر لي صعيبات الاحـــلام = يطلق سراحي لا سجنّي لزومــي

وجيبٍ جديد الصنع من مصنعه تـام = عجلٍ مسيره للوعيرة غشـــومي

ماني بمن يبني له الظل بلحـــــام = يدور حوله بالقراش مخــــزومي

إن ما سهجته بين كثبان وآكـــــــام = يحرم عليّه خوتي للقـــــــــرومي

اتبع هوا نفسٍ بها قيد والجـــــــــام = تطلب محالٍ في وطنها معــدومي

شب الشباب وشاب وهجارها غلام = مبهم حديده بالرصاص مختومي

صُم الحلق صنع الفرنجي ولا اروام = اسقوه عقب النار من دم رومـي



نافع مطر المرواني

يا زين لا تعرقل طريق المسافر


يا زين لا تعرقل طريق المسافــــر = عابر سبيل ولا له بداركـــــــــم شف

يا بو عيونٍ يطعنن بالخناجـــــــر = من رمشهن سهم الهوا بالحشى رف

ارحم قتيل الناعسات السواحــــــر = وزميّمٍ فوق الاشافي مشــــــــــــرّف

يا مهرةٍ من نقوة الخيل ضامــــــر = غراء بمنقوش المكثّل تغــــــــــريف

صما العظام المبهمة بالحـــــــوافر = في هيكلٍ عن مطلب الوزن ما خف

الردف طعسين اليتيمــــــــة تخازر = عقب السحاب اللي عليهـــن ترادف

يطون جديد اللبس طي الجــــــباير = شوامخٍ بمعلـــــــــــــّق الورك وقف

مربوعة القامة هضيم الخــــواصر = مصبوبة الجسم اللطيف المسرجف

كن النهود البارزات الظـــــــــواهر = رماّنتين العتش والوبل ما كـــــــف

ومنقّضٍ كنه لهيب الســــــــــــعاير = عطر فرنسا في مثانيه ما جـــــف

مثل الذهب دونه كونـــــــتر وتاجر = على حريرٍ باليدين يتعطّــــــــــــف

وسودٍ غواضي فيهن الكحــل حاير = هدبٍ مذانبهن تدف الهـــــــوا دف

من حقها لو حيــّرت كل ســـــــاير = براّقة الذرعان مدفونة الكــــــــــف

كفٍ كما الصافي من القطــن فاخر = عليه ترفات الاصابع مرعّــــــــــف

مخضّباتٍ بالخواتم حـــــــــــواسر = يزهاهن الفن البديع المــــــزخرف

بنت الرجال الطيبين الاكــــــــــابر = عوارفٍ لا جاهـــــــــــم العلم ياقف

أهل الكرم والجود ماضي وحاضر = مجدٍ مثبّت بالأدلّة معــــــــــــــرّف

مروين عطشانٍ به الدم خـــــــاثر = مصقول فولاذٍ يسف الحمر ســـف

من فوق دهمٍ باتعاتٍ صــــــواطر = حجلٍ تحت ضل الاسنّة معسّـــــف

الواردات الصادرات الكواســــــر = من طاح قدم نحورهن بالوغى هف


شعر \ نافع مطر المرواني

هلاهلا ماخط حبرٍ بقرطاس



هلاهلا ماخط حبــــــــــــــــــــــرٍ بقرطاس = ومارف براّق الحيا في سحــــــــابه

بشعرٍ يسامرني على هجعــــــــــــة الناس = سلم وسلمني مفاتيــــــــــــــــح بابه

دق الضمير بمرهفــــــــــــــاتٍ من الماس = يكتب على نبض المشاعر جــــوابه

ويلي على خلٍ خلــــــــــــــــيلٍ على ساس = صاف الضمير اللي عزيزٍ جنــــــابه

اقطع به الفرجة على كـــــــــــــــل نوماس = ليا من ردي العزم كشـــــــّر بنابه

ليا طال سجن اللي ورى سور الاقـــــواس = وصار الفظا عندي دهاليــــــز غابة

وقامت هواجيس الحشا تضرس أضراس = أضراس المحاور في محال اللهابة

دنّيت امعســـــــــــــــوفٍ عليه الزمن داس = منقوش في صفحة جبيـــــنه عذابه

طقّيت فوقه لطمـــــــــــــتي يمرس أمراس = أصم وأبكم ما نطق لي بجــــــــــابة

يهوي أهواي مسندس الريــــــــش قرناس = حتى سواد اللــــــــــــيل ولّت ركابه

والصبح أشم الورد مع كل نســـــــــــــناس = مع درب غيثٍ شــــــــق برقه ربابه

شيخٍ أتعزف له مزامير الاجــــــــــــــــراس = عليه من تاج الوقار المهـــــــــــابة

الذيب له وقفة ورمعة ومـــــــــــــــــرماس = كم مرقبٍ صلف الذواري عــــــوابه

له ماردٍ ما ياصله كل عـــــــــــــــــــــساس = نبعٍ على ملسٍ عذيٍّ شـــــــــــــرابه

والحر له في عالي الجو مجــــــــــــــــلاس = براس الطويل المعتلي من هضـــابه

بطراف قـــــــفــــــــــــرٍ خاليٍ ما به أوناس = يرفع منيفات الرواسي ســـــــــرابه

كم من جريحٍ دم قلبه على الســـــــــــــاس = يدفن بغابات الظماير صـــــــــــوابه
يضحك لو إن الحال يرعى بهـــــــــا اليأس = على الأمل وليأس تقطر حـــــــرابه

يخاف نمّامٍ مع النـــــــــــــــــــــــاس بلاّس = يرقب عيوبه راقب الله عــــــــــــيابه

كم مطلبٍ دونه بعــــــــــــــــيدات الارماس = يقتل مريض القلب في ســـــم دابه

زودٍ مداه النقـــــــــــــــــص حده للإفلاس = وقصرٍ بلا سكان يرجـــــــــــع خرابة

وحيٍّ وراه الموت قطاّع الأنفـــــــــــــــاس = يحصد مشيبه ما زرع في شـــــــبابه


شعر \ نافع مطر المرواني

سرت بي هواجيسي وصوت الضماير سار

سرت بي هواجيسي وصوت الضماير سار
على بحر قافٍ ساوقت لي هناديبه

ليا دق سلف الجيب مايقبل الاشوار
ركب واستلم دربٍ بعيدة معازيبه

على اللي كما القرناس من فارع الحرار
جميل. الوصايف محكماتٍ كلاليبه

عليه العلامة رمز للفاهمين اشعار
بعيد الهقاوي مركز الطيب. يحريبه

انا وين انا والنوم والنوم عني طار
هواجيس قلبي لا بغى النوم توميبه

تراثت علي مخلفات المرور اجهار
ومعاش التقاعد مايكفي مطاليبه

كلتنا الضرايب يوم ساهر علينا جار
ودين القروض الباهضة كيف نوفيبه

يسدد لنا البنك التجاري اهل العقار
ولكن ديون البنك جابت لنا مصيبة

نسددبها حتى تولي بنا الإعمار
تولج صغير السن حتى بعد شيبه

شهاداتنا يرمي بها الخاين السمسار
اهل. الواسطة شقوا سرانا وترتيبه

الا يا خوي الوتر يامصلي الأسحار
نبي دعوةٍ. بالليل يومك اتصلي به

على اللي على الشعب السعودي لهايب نار
اهل المال والمنصب وساهر. واصاحيبه

نريد. الأمانة والعدل وافي المقدار
نخاف الاإله وحق. الاجواد نافيبه

ترى الحق يرضي صاحب المعرفة والكار
رجال. الوفى والطيب تعرف مواجيبه

الا ياإله الكون سلط على التجار
عسىا مالهم مع عاتي الريح تذريبه

ملكوا منتزاة البر مع شاطي الابحار
وخلوا لنا حزمٍ تقادح مشاهيبه

يعيشون بالأملاك وحنا. على لاجار
على سيرة الاجواد والصبر والطيبة


نافع مطر المرواني.

دنّيت مرعوشةٍ وشّح جوانبـــــــــها = بموشّحٍ عن مرد الباب ينعــــــــرجِ

تلّيتها من الرياض الصبح مُتّجــــهٌ = دار ذُراها بغُر المزن تعتلــــــــــــــجِ

يوم ألذن الظهر وكتضّت مساجــدهُ = واد الدواسر تقل في صــــدرها يلجِ

ولما تجاوزتها والخط مُعتـــــــــدلً = في صحرى تثليث عنه الأرض تنبلجِ

حومانةٍ من نبات الغيث ما رُزِقــــت = كأنها في ســــــــــــراب اللال تدّرِجِ

تذرا بها الريح مغبرّة مناكِبِــــــــــها = من حولها الأُفق يستاسع وينـــفرِجِ

طويتها فوق خرسا صابرٍ ركبــــــت = سودٍ سليمات ما بجنوطهن عِـــــوجِ

حتى بدت شمّخٍ قدامنا اعترضـــــت = كأنها الليل قبل الصبح ينفـــــــــــــلجِ

من نايفات السراة متونها انكشــفت = عن واضحٍ مع ظهور السود يـــنزلجِ

وصلنا الخميس الذي هو حد رحلتنا = عن ناطحات المطر حدّث ولا حــرجِ

مشمرخاتٍ لبسها الورد وبتسمــــت = زهورها في نسيم الغيم تغـتنـــــــــجِ

يامن يرى عارضٍ حمرٍ لواعِجــــهُ = متعزّلٍ مع غروب الشمس يلتـعــــــجِ

يهز سيله جذوع الدوح مرتهـــــــجٍ = سهّاب نهّاب فوق الأرض يرتـهــــجِ


شعر \ نافع مطر المرواني

قـم يانـديـبـي فـوق وســـــق الجديدي

هذه ألقصيده موجهـا للأخ سعـد صالح العـشـيش اطلب منه ايخاويني حيث
إنني قررت اطلع في رحله بـرّيـه وكان الوقت ربيع ومطر وعـيد :
ولا قصر أبو صالح طلعت أنا وياه وقضينا رحلة ممتعة جدا لازلت أتذكرها


قـم يانـديـبـي فـوق وســـــق الجديدي = عليه مهارات الصناعة جديدة


من وارد اليـابـان صـاف الحـــديـــدي = ماشوّه المعجون صافي حديده

ياطــى بالااربــع كــل عــــســرٍ عـنـيـــدي = سبيرين يطوي كل جرداء عنيدة

جـيـبٍ مـع الــدوّ الخلا لــه رجــــيـــدي = يهز بمتون الروابي رجيده

يـحـمـل ثـقـيـل امـلاعــبــات الــوريـــــدي = حروف ينزفها القلم من وريده

أحلى مـن رخـمٍ هـازعــات الجريدي = من سكّريٍّ مايشيله جريده

ياصــل لــبــو صالح معــانـي قـصــيـــدي = بحساس من نبض المشاعر قصيده

أبيه عـن ضـيـم اللـيـالـي عـضــيــــــدي = حيث إن مثله مايبور بعضيده

انا مــع الـطــيّــب سـروري يـــزيــــــــدي = ولاّ ألردي هم ألليالي يزيده

يـاصـلــك خـطــّي فـوق مـتـن الـبـريـــدي = بمزرّفٍ مختوم عجلٍ بريده

ردالــجــواب بــكـــل رايٍ ســــــديـــــــدي = الراي محكم والمعاني سديده

أنـا بـوجــودك كـل وقــتـــي سـعــيــــــدي = أعيش لحضات الدقايق سعيده

والله عـــلــى مــاقـول خـيـر الـشـهـيـــدي= يومٍ كلٍ قال واثبت شهيده

الـوقــت عـيـد وصاحـب الـعـيـد عــيـــدي= وكلٍ يميل لرغبته يوم عيده

سـيـل وربـيـع وجــو غـايــم وصـــيــــدي = وقفرٍ جديد النبت ماذير صيده

وهـذا هــــواللـي فـي طـلـبـنـا نــــريــــدي= والحمد الله جت على مانريده

نبـيـلـنـا بــطــراف نــجـــد اتـغـــريــــــدي = نقطع على جول الحمام أتغريده

نــنــزل ونــطـلـع فـي مـشاريف غــيـــدي= على صعيدٍ حيزم السيل غيده

تــم الـجـواب الـمـجــرهــدّ الااكــيــــــــدي= يصبغ على عصم الشوارب أكيده

ياشاعر الجيل هل للشعر من حـــــكمٍ = يأخذ ويعطي وينصف مبدع القلــمِ

كم من سقيمٍ ضعيف السبك مضطربً = ياللأ سف معتريه الجوع والســــقمِ

رفرف على رغم انف الشعر مفتخراٌ = في معظم الصحف مقبولٍ ومحـــترمِ

ياطالب العـــز من كدشٍ مُهجّنـــــــةٍ = اقصر لك الويل لا يرمي بك الوهَمِ

الشعر بحرٍ غمــيق القعر ملتطــــــمً = كم شاعرٍ حضه الخســـــــران والندمِ

الشعـر عزفٍ يهــــــــز القلب ديدنهُ = في محكمٍ من لهيب الجوف مضطرمِ

وزنٍ وصوتٍ وموضوعٍ ومفــــردةٍ = في جوهرٍ من سليم القول مبتســـــــمِ

أشقيت نفسي بغرٍّ شاب ناظمــــــها = غرٍّ مرا ميعها في عالي القمــــــــــمِ

مثل الذي فوق حجر العين حاجبها = هلال ثلاث بين الأرض والنجــــــــــمِ

نقش لها الفن ثوب الحسن والبسها = قلايدٍ من ثمين الدر تنتظــــــــــــــــم

إن كان ما الشعر لا ناضــت بوارقهُ = يبرق كما ثغر بنت العز والكـــــــــرمِ

غريرةٍ من جمال البيض ما حُرمت = من مفرق الراس حتــى الساق والقدمِ

تنعم بخمسٍ عن اللذّات ما حجــبت = امحشمــاتٍ برياتٍ من الهـــــــــــــرمِ

وإلا اتركونا على مافـات من أدبٍ = حفض لنا الشعر ما تفخـــــــربه الأُممِ

يا أيُّه اللي تريد الشعــــر من عدمٍ = هل يحسن الشعر من يشكـو من العدمِ


شعر \ نافع مطر المرواني

ياطارق القلب تال الليل تطـــــــــرُقُهُ = ما ذا تريد وعيون الحي قد رقـــدوا

إن كان تطلب حكيمات عنيتُ لهـــــا = أمر وأنا عطيك ما تطلب بِلا عـــــددُ

جواهرٍ من ثمين الدُّر قد سُبِــــــــكت = صقلتها لين راحت كنــــــــها البردُ

أسقيتها من جروح القلب وشتمخت = شموخ غرن بقفــــــــــــرٍ ما بها بلدُ

واقحمتها في بحور الشعر ما متنعت = في كل بحرٍ عسير القافيــــــــــة ترِدُ

عرضتها لمّهات الصحف ما قُبِــلت = إلا قليلاً شحيح الموهــــــــــــبة نكِدُ

تباًّ لشعرٍ ما يقرءا الا سم ناظِــــمــهُ = غثٍّ به العلم ولإبداع ما تجِــــــــــــدُ

الشعر فنٍ يهيم بعقل سامِــــــــــــعُهُ = يبرا الضلوع وسجين الجوف يرتعِدُ

حمّلني المفردات اللي تُكلِّفــــــــــُني = قولٍ عن العصر والمألوف ينفــــــرِدُ

فكّرت بالأمر والأيام تُخـــــــــبِرُني = إني أسير الجناح الطارف الفــــــــــرِدُ

شربت حب الطبيعة من منابعِـــــها = مع درب غيثٍ يهز الـــــــــدوح له زبدُ

وحقٍ على من يزور القفر يا صِـفُهُ = في ما يراه بزمان الشح والـــــــــرغدُ

يا من على ما يريد القلب يعـــذِلُني = صبراً تراني بلغت الحلم والرشــــــــــدُ

جرح العصا مع مرور الوقت يلتئمُ = وجرح اللسان بصميم القلب يتّقـِــــــدُ

نوم الفتى بجندلٍ تضـــــــبح ثعالِبُهُ = في ثلث ليلٍ شديد البرد والصــــــــــردُ

أخير من مجلسٍ قلّت وناســــــــتُهُ = مجلس حقيرٍ أسير الكره والحـــــــسدُ



شعر \ نافع مطر المرواني

الله من قلبٍ بحالي تلاعب



الله من قلبٍ بحالــــــــــــــــــــي تلاعب = زادت هواجيـسه ووقتــــــه لعبّه

حكم عليّه في هواه اتعذــــــــــــــــــّب = وازريت للقاء مع اهل الطـب طبه

اخيل برقٍ في نحر غيمــــــــــــته شب = برقٍ سحابه صافي الوبل صــــــبّه

ذعذع نسيمه في شذى الورد واطرب = قلبٍ عبير الورد من ورد لبــّــــــه

زاهي نباته بالــــــــــــــروابي تناسب = يسوق عوده في سنابــيل حـــــــبّه

كان الهوا لي في سماء ا المعرفة هب = قسمت في سيف الحقيقة مهبّـــــه

نقيت مرجان الثميــــــــــــن المذهّب = وكتبت حرفٍ بالقــــــــلم ما كتــِبّه

حرفٍ على سبع المواهب معـــــرّب = ابداع موهـــــــوبٍ على در غِبّة

نقشٍ على الجوهر من الماس يكـــتب = فن البريسم بالاباري اكتبـــــــــــــّه

وقفت في باب المنيع المحجّـــــــــب = ادرس نفايس كنزه اللي احجــبــّه

كني على رأس المنيف اتقضـــــــّب = في عاصفٍ ما فيه ما ينقضــــــبّه

دنياً نسايرها على الصِـدر والغــــــب = تطحن رحاها والسنة مشلـــــــــهـبّة

ياهيه ياراع اللســــــان المخضــــــّب = بأعراض خلق الله نســـــي دين ربّه

ما يضيع حقٍ عنـــــد الإله يكـــــــتب = نعم الكتاب وعدله اللي اكـتـــــــــــبّه

كم نوّ صيفٍ بالـــــرياح ايتقـــــــــلّب = بالماقف المحسوب ماينحـــــــــسبّه

لامال فيك الوقــــت مع ميلتــــه طب = يفرح بميلات الزمان ومطــــــــــــبّه

عليك باللي بالمـــواجيب يحســــــب = هميلعٍ جزل المثل ينضـــــــــــــــربّه

حرٍ على كسب النواميـــس يتعــب = تشكر مصاديره مصـابيـــــــــح غِبّه

وابعد عن اللي فيه الاحقاد تشـــتب = هشيم شعواطٍ شــــــــــــرارة تشبـــّه

تمّت بمقفيٍّ من الشـــــــعر يطـــلب = ورود وسميٍّ على نبـت خبـــــــــــــّة



نافع مطر المرواني