ديوان الشاعر عبدالعزيز الزويهري

أول أحبـك وميّـت فـيـك=كنت أحسب ان الوفا ذاتـك
و اليوم صوب الهوى معفيك=طويـت صفحـة سجلاتـك

الليل و الصبح متشابـه=من حال زايد على حالي
من قسوته و علة أسبابه=المر أشوفه كما الحالـي
الـوضـع لابــد يسـعـابـه=وتشوف لك ناس عقالي
لاتتـرك الأمــر كالغـابـه=ماينـفـع الـشـي طـوالـي

احذر تسمّع كـلام النـاس=لو قيل ما قيـل فأحبابـك
السم مدسوس وسط الكاس=لو كنت غافل عنه صابـك
وحذر من الواشي الخنـاس=ارميه من قبـل يصخابـك
وداري على صحبة النوماس=اللي علـى العـز يرقابـك

الديرة اللي بدون أحبـاب=شينـه و محـد ٍ يدانيهـا
مكتوب عالي سماها أغراب=و المر مشروب صافيهـا
اكيد طبع الهوى غـلاب=يجـذب قلـوب ويعنيهـا
والديره اللي بها الاصحاب=ارتاح لاجيت انـا فيهـا

لا تحسبون الهوى لعبـه=كل ما زهقتـوا تسلوبـه
الحب يا أهل الهوى نشبه=من جربه يعلـن التوبـه
اصل الهوى صعب من قربه=ماهو كما الماء في شربـه
خطر وماشي كمـا الوهبـه=واللي وقع سـار اعجوبـه

يا ليتني حرف في اكتابك=في كل الأوقات تقرانـي
حتى اذا غبت بأسبابـك=في داخل الحرف تلقاني

آهات في القلب مكتومـة=يا كـم أعانـي مآسيهـا
بالبوح و الصمت مرسومة=محكوم بالصبـر أداريهـا
لا تترك النفس مكلومة=باشراقة الورد واسيها
للقلب لحظات موسومة=كل السََّعد في معانيهـا
مادام قسمه ومقسومه=كتبه ولالك سبب فيها
لاتسجن القلب فهمومه=أزمه وربـك يعديهـا
حياك يا شاعر علومـه=يـقـول بالقـلـب حاويـهـا
الطير يتعب على حومه=من دون يبيّن خوافيهـا

يطيب لي أحبتي نشر هذا اللحن ( عسى أن ينال رضاكم )
و الذي دار بيني ( عبد العزيز الزويهري )و بين أخوي .. العزيز .. فواز الزويهري
يوم الخميس ليلة الجمعه الموافق 19_20/ 3/1429هــ
البدع ..... من فواز ............. و الرد من .. عبدالعزيز

سلام يا زارعين الطيب=يا أهل القلوب الحياويّه
أجراحنا تطلب التطبيب=عجزت للقى دوا ليّـه
منا لكم كامـل الترحيـب=ترحيب صافي على النيّه
عجّل و هات المثل يا ذيب=تلقى لها اوصاف طبيّـه
عسى البقا صاحب التجريب=و الغصن من عذبنا ريّـه
حلو الثمر ما يشوبه ريـب=و اللـي جنـوه الغناويّـه
الشمس عن وقتها مـا تغيـب=مـن عافهـا يـدرق الفـيّـه
و ما بين امسك و هات و جِيب=حـلـو الثـمـر للهواويّــه
اللي رضي فيهم التقليب=يموت و يحيا على السيّه
حلو الثمر للهنيّ اقريب=و يا بُعد مجنى العناويّه
خابر رجايه معك ما يخيب=و نظرتك ميه على ميّـه
عد الخطا و ازهره بالطيب=تفتح لك اقلـوب ورديّـه
جينا و حنا لنـا ترتيـب=و سلوم الاجواد مرعيّـه
لكن جازى الصواب بعيب=و القلب صابه لظى الكيّه
يا كيف تجني ثمر ما يطيب=و اجذور الأثمار مسقيّـه
واجب على ثمرهم تعقيـب=يعـدّل أحـوال ملـويّـه
لوكنت عالم بحال الغيب=هاجرت من ارضهم ذيّه
من قابل البشر بالتقطيب=هل أتبعه في ردى غيّه
قدّام راسك عليك يشيـب=و اتسير في ادروب منسيّه
اشطب على ودهم تشطيب=و صفحات الايام مطويّـه

و سلاااااااااااااااااااااااااااااااااااااامتكم

لا تحسبني عشان أهـواك=أرضى بظلمـك و تعذيبـك
لا و الذي صورك و أنشاك=أدعس على القلب و آسيبك

غربة ألم في صميم الروح=أعيشها بصمت فاضحني
بارق صفاها بدمعي ينوح=بالله يـا هـم فارقـنـي