رسالة مجهول

وصلتني رساله من مجهول تحتوي على هذه الابيات
ولا اعرف صاحبها ولكن بما ان كل اناء بما به ينضح لم اتصل به لانها احتوت على ابيات لا تليق بمن اسعى خلف معرفته وقد قال المثل : ضع نفسك تجدها
فقد وضع نفسه من خلال هذه الابيات بمكان لايليق بي ان احاول معرفته
فيقول هداه الله :

بيني وبين اهل الحكي والنمايم = برزخ يقين وقل سمع وتطنيش
كني عن اللي ينقل الهرج صايم=اطق باصبع للهنود الدراوش
مادام حضي مع هل الطيب قايم = فالشوك له من فضل ربي مناقيش
أدعم جهودي من قوي العزايم= مايقضي الماجوب ذبح القرافيش
لياحصل بسوق بايع وسايم= وشحت يدين مجمعين المعاويش
حياك ياحذف العبي والعمايم = نكسبها الطيب ونخسر بها الديش

فكتبت له هذه الابيات :
واللتزاما بقوله تعالى (وَإِذَا خَاطَبَهُمُ الْجَاهِلُونَ قَالُوا سَلاماً).ابتدأت بالسلام واردفت بما اتمنى ان يفهمه

( ماحد ضربه على يده يرسل على جوالي خزعبلاته )

سلام ياكاسب لنفسه ظلايم = يامن مكاسيبه كما حزمة الريش
لا تحسب انك كاسب للغنايم = تطق باصبع للدراويش ياديش !
مثلك مكاسيبه تسجل قسايم=مديون يادفان عظم وعراميش
حافي بسواد الليل منجوم هايم= تشكر مناقيش(ن) تعالج مطاريش
وترى الكرم عن كل مهبول شايم=مايصللع معزب بسلم المداغيش
وليا حضرت السوم مانته بسايم =مغبون ماتفرق اصيله من اكديش
سباح لكننك عن الدر عايم = مثل الخشب -تحتاج نشر وشواكيش

صح لسانك مليون على القصيده
والله يعطيك العافيه
بيض الله وجهك

مثلـك مكاسيبـه تسجـل قسـايـم=مديون يادفـان عظـم وعراميـش
بيض الله وجهك
يابن العم
صح لسانك مليون على القصيده

قصيده وافيه ومن راس وافي
لاهنت ولاهان هذا الحضور
تقبل تحيتي

صح لسانك ولسانه والقصايد كلها جزله
ولايهمنى ان اعرف قايل القصيده يهمني الجزاله منك ومنه
وتسلم ومشكور

بيض الله وجهك
يابن العم
صح لسانك مليون على القصيده

بالنسبه لي لا تعليق من غير قصور في بعيد الشوح

صح الله لسانك
ولاهنت
وسلم فكرك وبنانك
دمت برعاية الله وحفظة

وليا حضرت السوم مانتـه بسايـم
مغبون ماتفرق اصيله من اكديـش
سباح لكننـك عـن الـدر عايـم
مثل الخشب -تحتاج نشر وشواكيش

الله المستعان يابو فارس ياكثر الدراويش الي يبلشبهم الرجل على قول

المثل بالصدر تجرح ولا مع الناس تفضح
واذا رفعتها بالشنب واليا طمنت باللحيه

الصبر ثم الصبر على العموم صح لسانك هالبيتين عن قصيده

الاخ بعيد الشوح صح لسانك والرد حق لك مشروع
الحداري يقول
من قال بالناس قالوبه