ديوان الشاعر سعد عامر المحمدي

هذه القصيدة للشاعر سعد بن عامر المحمدي في حفل زواج خالد بن الشيخ حميد بن مسعدالقاضي شيخ
شمل قبائل قوفة من جهينة.

يا سلام الله سلام قلوب ناسـن ولهـا =الردى ما تقبله والميـل مـا ترضابـه
والسلام أخص به روس العرب وعقلها=الرجال اللي وفا الطرقي تحسب حسابه
الرجال اللي تشيل من الحمول اثقلهـا=ياعساه مـا تحمـل بـه ولا تبلابـه
يالله إنّـا طالبينـك طلـبـة تقبلـهـا=تحفظ الدرع الحصين وترحم اللي جابه
لا بديت القاف جبت من العلوم اجزلها=مفردات احلى الكلام الزين حنا أولابه
الحقايق والخلاصـة جبتهـا باكملهـا=دونوها واحفظوهـا واكتبوهـا كتابـه
الزباير جوهرة والنـاس مـا تجهلهـا=درتن لولا دخيـل الله تـروح انهابـه
احتظنها لين سلمها رجل مـا اهملهـا=واستلمها مسعد القاضي وحث اركابـه
لتعزوا فـي جهينـة وانتخـا بالبلهـا=يخلف العيّل واصعول الرجـال تهابـه
السبـاع تطاوعـه بالـراي لاقابلهـا=بالزباير قام يازر مثـل اسـد الغابـه
مرتكي علـى قبيلـة فعلهـا واهلهـا=ان صارت لابته ياويهـا مـن لابـه
واستلـم بعـده حميـد وبالمثـل دللها=لبسها للساع باقي مـن جديـد ثيابـه
شيخ قوفه ينطـح القـالات ويعدلهـا=بالظفر والطيب والاّ الشر ما يسعابـه
ومن يظن يروح لكبار العرب يسعلهـا=من قديم وقبلة المسجد علـى محرابـه
ما يحلـي بالديـار إلاّ فعـول اهلهـا=ما تضيع الذاهبه وانتـم لهـا طلابـه
نوّرت دار القضـاة وحققـت منزلهـا=كلمة الترحيب مكتوبه علـى البوابـه
تنشرح للمنطقة من حيث مـا تدخلهـا=الحدايـق ساطعـة وانوارهـا جذابـه
اعجبتني من علـو المنطقـة لسفلهـا=التفت واشّر عليهـا باصبـع السبابـه
ليلة اربع من ليال العيد يـا مجلمهـا=تجمع الرجال بالاصحاب بعـد غيابـه
نستجيب لدعوة الداعـي ولا نجهلهـا=ما نطيع اللي يجي ويروح ما يدرابـه
ودنا نافي مـع الاصحـاب ونجملهـا=الوفا من طبعنـا واصحابنـا تحظابـه
نرضي اهل النوب والجيران ما نزعلها=والحظيظ اللي يقوم بواجبات اصحابـه
كل كلمة للعرب تحسب علـى قايلهـا=والرجل يحشم سواعد لحيته واشنابـه
جيت اشارك عن قبيلة حرب وامثلهـا=سالمي والسيف تعرف شذرته واشبابه
اتحدث عن مشاعر حرب يا جاهلهـا=للصديق اكبر صديق وللعـدو حرابـه
تركت الواجب عزيز النفس ما يعملهـا=ديننا دين الرسـول وربنـا وصابـه
وكل شجرة تنتمي لعروقها واخصلهـا=ويحفظ الله راس ابو متعب وينصر نابه
المليـك اللـي لنـا روس العـدا ذللها=من فعوله معظم العالم تحسب حسابـه
لو بغيت احصي مزايا سيدي ما اصلها=ما تغطيه الحـروف وتتعـب الكتابـه
والسموحة والسـلام ختامهـا واولهـا=والحظيظ اللي ليا كلف بشـيء جابـه