( الصمت ضيم )

السلام عليكم ورحمة الله وبركاته
قصيده جديده أحب ان اشارككم فيها عسى
ان تنال على الاعجاب ، ولكم كل الشكر ...

لاوافقن ّ العوج عوجا صريحه = بالله عليكم يآهل العرف شآقول
الصمت ضيم ولاهرجنا فضيحه = والعرض مدري ليه مايقبل الطول
اليوم اشوفه( بار )راع المنيحه=واشناه من فعله لو الهرج منقول
والله لآاذكيه مثل الذبيحه=لو مااعترف لي لو على شبه مدلول
العام اسمّيها ضمير ونصيحه=واليوم اسمّيها متاهات واحلول
عـَـلـَقـت والمخراج نزف القريحه=عسى قصيدي فيه الادراك مآمول
وانا مخاطبلي بوقتي شريحه = اخص واللي خص يلقى له اعقول
ولااشره على المترديه والنطيحه = لاواكب المنهاج ابو هرج معسول
لاقال لازم سالــْفـَـتـه الصحيحه =وان قلت قول يقول ماهو بمعقول
لامن هجيته يعتبرها مديحه =واليا مدحته قلـّب اعيونه الحول
هذّار والهذّار نفسه شحيحه = غير ان عقله بعض الاحيان مشلول
وان كان نفسي منه ماهي مريحه= لاعاد ينشدني على ويش مذهول
النفس شينه والنوايا قبيحه=واشتلتها من تيهتي هم واحمول
( على الرجى ) كم بحْت فيها فصيحه= لكن مغير الياس مجني ومحصول
والدْ عيني كل ماشفت ضيحه = واسْـمَـيتها في ضيعتي بااربع افصول
طرد السراب وعلة(ن) مستبيحه = للخافق اللي له زمانين مقتول
واليا نشقت لطايح الوسم ريحه = اجيه والقى القاع محمي ومنزول
ضاقتبي الآفاق لو هي فسيحه=والقيد بيديني مكبـّـل ومفتول
ولو السكوت اعلاج نفس (ن) جريحه =كان التزمت الصمت مبطي على طول
لكن سكوتي مِنه روحي ذبيحه = الصمت باب(ن) ,, مير ماهوب مدخول
اما اِفتحه والا فخذها صريحه = عساه يبقى طول الايام مقفول

انشالله اعجبتكم يالغالين ..

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

	صح الله لسانك ولاهنت وسلم فكرك وبنانك دمت برعاية الله وحفظة

اخوي رابح الجحدلي لاهنت وصح بدنك ..

الله
الله الله
ماشاء الله تبارك الله
ابداع غير طبيعي وقصيده جزله وقويه
الشاعر المبدع الجزل بــــــدر
صح لسانك مليوووون وبيض الله وجهك
قصيده جزله و تستحق الوقوف كثيرا وقراتها اكثر من مره

لا هنت بصراحه وفييييييييت وكفيت وقصيده جزله
ودوما تضل حروفك رااائعه ومميز ولها طابع خاص
ومن جوف القلب تتمتم بالصميم مبدع
دومً من تالق الى تالق في سماء الابداع و الشعري
ودمت بخير
وبيض الله وجهك ومافيك حيله

قصيده رااااائعة
صح لسانك
دمت بود

الشاعر الكبير/ بدر بن عيد الهبيري

صح لسانك على هذه الشامخة بشموخك

و الجزلة بجزالتك ..

و بيض الله وجهك

صح لسانك وسلم بنانك ودمت بكل خير

صح لسانك
والله يـعـطـيـك الـعـافيـــــــــــة

السلام عليكم ورحمة الله وبركاته
سلمت ودمت أخوي الشاعر بدرالهبيري على القصيدة .
.
.
جزله ورائعه وصح لسانك
أخوك ابوساره