محاوره بين الشاعرين / عبدالرحمن السمين + نايف العتيبي

نايف العتيبي

مرحبا ترحيب رجّالٍ يرحّـب فـي محلّـه=باالرجال أهل الوفاء في كلّ دار وكلّ ديره
ياالسمين أنته تحسْب إنّ القمر مثل الأهلّه=أمس عفت الدار مار اليوم ياالحربي تديره

ع ـبد الرحمن السمين

البقا ياللي ترُحـب عـد ماتنسـاق دلـه=وانتم وحنا على درب المعزه والبصيـره
لو نسوق الرجل في كل الدير ما صار خله=مير بلشتنا من اهل الذود يا مال الستيره

نايف العتيبي

عارفين اللي لنـا واللـي علينـا مانزلّـه=والحقوق تساق ماينقص بها حبة شعيـره
ماكتبت إسمك ياراع الطيب في وجه المجلّه=غير ناوي باالوفاء والرجل مايخطي مسيره

ع ـبد الرحمن السمين

الرجال الطيبه تمشي على مذهب وملـه=ما عليها لو صدفها واحدٍ يشعب بعيـره
ابشر ان الحظ طيب والطريق السنع أدله=ان عطيناها قليله وان عطيناها كثيـره

نايف العتيبي

مابنينا باالوفاء للطيـب ديـره مستقلّـه=غير نبغى أهل الوفاء والله يعلم باالسريره
أنت طرقيٍّ من المغرب معك سيفٍ تسلّـه=مار خلّه للعدا وأصحاب الأنظار القصيره

ع ـبد الرحمن السمين

ما نقول قصور مادام البحر ريقـك يبلـه=وواحدٍ ما يستشيرك لا تعـود تستشيـره
لو نسل السيف يا نايف برت عشرين عله=مير يا نايف عساها للعرب خيرٍ وخيـره

نايف العتيبي

شكوىً لغير الولـي كـلٍ يسمّيهـا مذلّـه=والبحر بيني وبينه حرب في بطن الجزيره
سلّ سيفك في طريق اللاش والا الذرب خلّه=والسحايب مدلهمّه والبـروق بهـا مثيـره

ع ـبد الرحمن السمين

الله أكبر يالجبال اللي على العالـم مطلـه=ما عليها من الهبوب اللي يسمعنا صفيره
يكرم السيف المصقُل والخبل يبشر باأخله=وسط عينه يا وسيع المعرفه لو طار طيره

نايف العتيبي

الجبال الصمّ لو تضرب حجرهـا ماتهلّـه=وأنت أشوفك طامعٍ فاالنير ياالحربي تديره
الرجل لو كلّ مايبغاه فاالدنيا حصـلّ لـه=كان ماشفت العرب تدخل مداخيلٍ عسيره

ع ـبد الرحمن السمين

لو بغينا يالعتيبي كـل شـيٍ نستحلـه=مير ماش النير وحده فيه بالظلعان غيره
البنادم ما يحصُل غير مالله كاتـبٍ لـه=مير طعني والليالي كلبوهـا مستديـره

نايف العتيبي

مانقول إنه لحاله مار قلّي من يصـل لـه=موقعه في قلب نجد ودونه الخيل المغيـره
مانطيع الا الله الخـلاق حيـث الأمـر لله=وأنت يوم أقرأ كتابك نص خير ونص غيره

ع ـبد الرحمن السمين

السوالف ما تخالف ميـر قلـي ويـن ظلـه=يا عجايب يا عجايب فالامـر شـك وحيـره
البلاد بحكم أهلها مـا حصـل بالـدار خلـه=والرضا نصف العقل والرجل ما يعرف مصيره

وسلامتكم

ياسلام ياعبدالله الرحمن لله درك
وانت علم من اعلام الشعر ومدرسه

ونايف بلا شك لا يحتاج شهاده هنا الكبار اذا اجتعوا ابدعوا

الله الله محاوره من الوزن الثقيل

الشاعر عبدالرحمن السمين بلا شك شاعر غني عن التعريف لله درك وصح السانك ياعبدالرحمن

وصح السان الشاعر نايف العتيبي

شاعرنا

عبد الرحمن السمين


صح لسانك و بيض الله وجهكـ على هذه المحاورة الرائعه

و صح لسان الشاعر / نايف العتيبي

صحت السنتكم

	صحت السنتكم وبيض الله وجيهكم والله يـعـطـيـكم الـعـافيـــــــــــة

صح لسانك ياعبدالرحمن السمين وصح لسان زميلك نايف العتيبي محاوره جزله ورائعه وراقيه ومميزه من الجانبين بيض الله وجيهكم ومن الوزن الثقيل الكايف سلمت ودمت وتقبل مني صادق ودي وتقديري

صح لسانك اخوي