ديوان الشاعر/بدر بن عواد الحويفي الحربي

متى على الله تبتدي رخصة الطيـر=وعقب الرباط يصف ريش القرانيس
والمزن بالمنشـأ نشوفـه مزابيـر=والبرق تالي الليل مثـل المقابيـس
ابي إليا قالوا مشينـا علـى خيـر=والراي شـدوه العيـال المدابيـس
وتواعدوا عقـب العتيـم المناعيـر=مسرى تحت داج الظلام الغطاليس
ربع لهـم عنـدي معـزه وتقديـر=مدلهيـن اللـي بقلبـه هواجيـس
وافيـن باللزمـات ماهـم مثابيـر=شيالة الكايـد إليـا دنـق الهيـس
يبون من خشم المسمـى محاديـر=نشمل إليا لوقا ونجنب الى التيـس
لاوقفوا بارض(ن)بها اثرة وتأثيـر=وفكوا براقعهن حرار(ن)فواعيـس
والطير تـل وشافهـن بالعثاميـر=الخرب كوبر والطبايـل مفانيـس
واعلق به اللي مزر الريش تمزيـر=اللـي مخاليبـه سـواة الدبابيـس
واللي تروح طيار ما عينت خيـر=شيهان نكسها على القـاع تنكيـس
نادر بحر ياخـذ عليهـا مشاويـر=ماهو بوكري(ن)يهـاب الدماميـس
وإليـا تلافـوا بالمعشـى مناعيـر=في خايع(ن)جرمه سواة الكناديـس
وشبوا وقـادوا للسوالـف معابيـر=النجر يلعـي والمباهـر متاريـس
خفاف النفوس رجال ماهم مثابيـر=ولافيهم اللي فيه كبر(ن)ولا فيـس
وجوهم يبون الكيف ربع(ن)مسايير=قالوا علوم الربع قالـوا عواسيـس
نذكر لكم جول(ن)رثعنابه عصيـر=حازن من الخبه يبـن الطعاميـس
في ماقع(ن)عقب المطر مابعد ذيـر=تومي بنـواره هبـوب النسانيـس
والصبح مدوا للحـراوي مداويـر=وطاحوا بجرتهن جداد ومداريـس
وحثوا بهن بالخور مثل الطوابيـر=وتزارقن قوع الشجـر والمتاريـس
وتنهض اللي كن عينه سنـا الكيـر=كد ذوقوه مـن الثنـادي تلاميـس
والخرب قام يحوز دون المعاشيـر=وزته وطار الريش مثل القراطيـس
ومدوا عليهن مبهمـات المواصيـر=شغل الفرنج مقولمـات النواديـس
وصادوا و وفقهـم ولـي المقاديـر=واهل الوكارى ربطوهـن مفاليـس
هذي حلاة الصيد وقت المخاضيـر=وبعض الصقاره يالنشاما مطاريس