ديوان الشاعر// عبدالعزيز بن حمود ابالعون

نبـي نوجـه للفريحـي رسايـل=من فوق جمس صافيـات بلوفـه
جمسٍ يخم الخـط خـم الهوايـل=خص ليا قـام الدريـول يحوفـه
يسرب كما يسرب سراب القوايـل=حصاة ضلعٍ من قـراه محذوفـه
يحمل تحيـاة الوفـاء والمثايـل=مني لمن هو يستحـق الطروفـة
ابو محمد مـن حسـاب الاوايـل=بالطيب له منهاج ونفسه عزوفـة
انصاه ليا ضاقت علـي الوسايـل=والقاه في بيـت وسـاع رفوفـه
بيت يزورونـه كبـار الحمايـل=دايم ليا جيتـه تداحـم ضيوفـه
عليه من صارة وصوف ودلايـل=أسود سوات الليل من صفو صوفه
بانيه ضرغـام يعـرف الدغايـل=عساه في دنيـاه يلحـق شفوفـه
ضاري على شد الرحل والرحايـل=ماهو صعب بيضٍ صفايح دفوفـه
وافي ليا جت بالعلـوم الصمايـل=دنياه معطيتـه ونفسـه عطوفـه
ماهو بـرسٍ مـا يبـل البلايـل=دايـم شرابـه بالنكـد والكلوفـه
الرس لو كبـرت عليـه النثايـل=لا تنحـره لعـل بقعـاء تلوفـه
لو هو على وادي من الوسم سايل=تلقى الهوافـي ماليـات لجوفـه
انصى مثل هـداج خـل الثمايـل=هداج تيماء اللي تهشـم قنوفـة
شيخ العدود اللـي يلـم القبايـل=كلٍ يعرفه عرف لو مـا يشوفـه
مثل الفريحي من كبـار العوايـل=متواضعٍ ما به على الناس شوفه
المانعي طيـر الثـلاث الجلايـل=ماهـوب وكـريٍ يهمـه علوفـه
اليا عثا بالجول راحـن سحايـل=يدلـي بمخـلابٍ كبـارٍ كفوفـه
الدم من مضـراب كفـه شلايـل=كم خارمٍ يأكـل معاليـق جوفـه
يفعل ومن مثلـه يجيـد الفعايـل=ومثلك اليا وصفت وانته وصوفه
انته على ماقيـل واف الخصايـل=وانا عن الخاطر جليت الحسوفـة
سويت لي جملـة بيـوتٍ قلايـل=يومٍ وضعي ساعدتنـي ظروفـه
متعمدٍ ماني عـن الـدرب عايـل=واللي مثل شرواك تكثر صفوفـه
انته كفو للطيـب ياصقـر حايـل=وعلى كثير من العرب فيك نوفـة
الناس كلٍ لـه عيـوب وفضايـل=وكل على حقه جموعـه زحوفـة
أخبرك والا عنكـم الشـك زايـل=يوم انت من بيتٍ رفيعة سقوفـة
من لابتٍ يـروون حـد السلايـل=كم ايتموا من عين بنت ٍ هنوفـه
شمر هل البوش العفر والاصايـل=واهل اللحيسة في ليال الحفوفـة
رجالهم ماهو عن الطيـب فايـل=مثل الجنيه اللي قليلـة صدوفـه
تمت وانا مانـي مـدور حثايـل=لاشك في مثلـه تراهـا مخلوفـة
هديـةٍ منـي لـراع الجمـايـل=اللي فعولـه بالجميـل معروفـة