ديوان الشاعر/ سعد المحمدي

تريحو يامسامرين العجايز

لاتزعجون الحي والحي هادي

كثر الكلام الابسات البلايز

مايستوي لمخضبين الهنادي

ماكل مايطري على البال جايز

لكن عسى ماصار كبوة جوادي

مات الشجاع اللي على النعم حايز

حرن ينومس في نهار الهدادي

واليوم يافواز صفق لفايز

وارقص على موال عمك عبادي

والوجه الأخر ماتطوله لازايز

يامطولين السالفه والعنادي

للقبه الخضراء سلاح وركايز

اليا سرق عين الشرود الرقادي

السلام عليكم ورحمة الله وبركاته
انتقل الى جوار ربه المرحوم باذن الله سعود غنيم السليمي ( ابو فهد) يوم الخميس الموافق ١٤٣٨/٨/٨
نبذه عن سيرته
عرف بالدين والاخلاق النبيله والكرم الحقيقي وحسن الجوار والخوه
جمع بين الصفات الحميده معروف ومقدر عند الجميع من حرب والقبايل الاخرى دايم حريص على التلاحم وصلة الرحم مجلسه دايم مفتوح للجار والمسير الله يرحمه ويجعل قبره روض من رياض الجنه



************************

مالوم عيني يوم تبكي على سعود

لو ان دمع العين بالحيل غالي

مرحوم ياللي كل مافيه محمود

انشهد انه من زحول الرجالي

ان قلت راعي جود من منبع الجود

وان قلت راعي دين مابه جدالي

يالله يامعبود ياخير معبود

تغفر ذنوبه ياعظيم الجلالي

وتثبته لاغادرت قبره اوفود

في ساعتن يسمع قريع النعالي

يبطي عليه القلب ضايق وملهود

عن راعي الجزلات ماهو بسالي

عندي يقين انه مع الوقت مايعود

ياما غدت بااحباب سود الليالي

ان جيت اسلي خاطري وقت محدود

له صورتن ماتنمسح من خيالي

بيني وبين الهم حاوي ومردود

والكبد يصلاها من الحزن صالي

لله در قروبنا يابو شادي

طلع نضيح اهل القلوب المعاليل

دفانة الجمر الحمر بالرمادي

دايم سوالفهم نميمه وتظليل

نقرا ونسمع ماتقول السرادي

ونسكت عسى يدخل على الخط عقيل

ومع الاسف زاد الخطاء والتمادي

من ناس ماموره على القال والقيل

اسرجت صفراء ضاريه لطرادي

لرخيت حبل اعنانها كفت الخيل

جموح لاراجت تغيض الاعادي

ماتهاب طعن ارماحهم والمصاقيل

اقول ياقصار النظر والايادي

كلمه ماتقبل بالنقاشات تاويل

ان ماهداكم تالي الوقت هادي

خليت زمل عقيل ترجع مخاليل

تبي تستريح ابعد عن المدن والوتساب

تنحر ديارن مابها ناس ورسالي

مع الجيب والرشاش والاحمر الشباب

افراشك وماتحتاج ياطيب الفالي

وتخير ثلاث اثنين من خيرة الاصحاب

مطانيخ مافيهم منافق ومحتالي

ترى اللي يغيض النفس ويوتر الاعصاب

صديقن يبيعك وانت شاريه بالغالي

يحاول يحطك بالزمن بين ضرس وناب

على كسر عظمك يزعج الصوت ويلالي

لو السيف والرشاش والرمح والمشعاب

غدينا طماعه للمعادي والانذالي

يادار احبك من غلاك وغلا اهلك

تقودني يمك سلوك الحريري

مع الخطوط اللي من البعد تاصلك

اجيك لو دونك يطول المسيري

والله ماتقطن عدانا مناهلك

مدام مالك غيرنا من مجيري

لاخانك اللي بالزمن مايجملك

نرويك من دم العدى بالشطيري

الله يرحم يالحبيبه مهلهلك

ذراك باليوم العبوس الكبيري

ابوك يسئلني عنه قبل يسئلك

واقول تكفى تسئل انسان غيري

ياهاجسي للجزيل افرد جناحك وطير
لاما تشوف الجبال الشم كبر القطا
حلق سما في سما نجد العذيه عصير
شاعرك للكايده دايم سريع الخطا
ان كان ماطربت جمعن بنتظارك غفير
منته بمشكور من بعد انتظار وبطا
سلام تسليمتن تشمل كبير وصغير
فروعها بالسماء وعروقها بالوطا
مضمونها من وفاء وحروفها من حرير
وغلافها من ذهب والعود الازرق غطا
يالعزوه اللي لكم بالدار شانن كبير
ايام شبه الجزيره بين صح وخطا
هباريه من مزينه جابرين الكسير
اهل البيوت الذريه والكرم والعطا
يوم الليالي رحاها بالفتن مستدير
رجالهم فيه مع زود الشجاعه سطا
بالشلف والرمح والبندق وحد الشطير
كم جمع زاحوه ماهو هرج ناس اعبطا
لالاح برق المشاكل ثم صاح النذير
ياما اجدعو من عقيد وكم وكم اربطا
اهل السلوم الشريفه حاشمين القصير
واهل وفاء ورث جد ولرفيق اصفطا
كلام شاعر يحكم بالكلام الضمير
لحصان صدق النوايا بالزمان امتطا
مايذم واد الرمه من شان واد الجرير
ومايرفع اللي قبل حكم الامام ابسطا
يبعد عن الكلمه اللي للمشاكل تثير
ومايشت شمل الولايف والضعون اخلطا
ياحادي العيس قدامك طويل المسير
ياكثر مافيه غيرك بالمجال انشطا
ان كان منته مع الفرجه شجاع وبصير
لو انت محتاط غيرك بالرجال احوطا
مال الحمول الثقيله غير غارب بعير
يقطع بها البيد لو دربه غراز ولطا
عليه لازادت الحمله يقض الهدير
وماينثني عظم ساقه بالوحل لاوطا

الشاعرسعد المحمدي

من لادعاني ماخطرته طراسه

ليه مواجيب وعليه مواجيب

اغيب وقت العافيه والوناسه

وماغيب في يومن به الحاضر ايغيب

يقوله اللي ماحنى الوقت راسه

مجرب اهل السيف واهل المشاعيب
*********************
مجاراة الشاعر نايف البشري

والف ونعم ياللي على العز ساسه

يامعرب الجدين مايلحقك ريب

شاعر ونعرف قو شعره وباسه

وغير الشعر معروف شرواك بالطيب

مفروض وقفاتك تدرس دراسه

لرجال دايم فيهم الهقوه تخيب

********************
الشاعر سعد المحمدي

نايف تكلم من وفاه وحماسه

ياعل شمس معرب الجد ماتغيب

شاعر وشعره فيه فن وسلاسه

صغير سن ومن كبار الواعيب

يابو سعود الوقت فيه انتكاسه

تقدمت روس الرجال الزواريب

ماودي ادخل في عميق السياسه

من خوف هرجة شاذبين العراقيب

الشاعر سعد المحمدي

يابو جمانه لو لقيت اللي لقيت

بعد الثلاثه قبل وقت الاربعه

طرقا بها ياطيب الفال ابتليت

فوق الجمال البنت زود مدلعه

امديك لاهلحين باقي ماضويت

بالسوق يامال السلامه تتبعه

وبعت النياق اللي بهن قبل اعتزيت

وعذرك تقول الذود مابه منفعه

/////////////////////////////
الشاعر عبدالله فالح الفريدي

ذكرتني بيتٍ يساوي كم بيت

اسمع كلامي واسمع البيت اسمعه

كلٍ علی همه سری وانا سريت

اتبع هو البل وانت صاحبك اتبعه

ممشاي عند البل دقايق لامشيت

يسوى بنات السوق والمتلمعه

انا هويت الذود يوم أني هويت

هذي طماعتنا ونعم المطمعه

ايام ماتميز التمره من الجمره
وحنا نضد الاعادي ياملس الساقي

والا انت ماغير رقص وهز لزمره
ذكرت ربي عليك عيون وخلاقي

خلك بظلي ياراع الروج والحمره
قدام يسرق زهابك كل سراقي

ابوك ياعل ماالله يمهل بعمره
علمك ماعلمه لطوال الاعناقي

الشاعر سليم سعود الجابري
اي والله انا احب يامقشر الحب

حب(ن) تغلغل في مافيه دبره

ياهب يا ها الحب ياهب ياهب

يدخل بقلب الادمي مدخل ابره

تكفى يابن دومان دور لنا طب

اطعمت حب(ن) مر تقال صبره

حب ( ن) شبكني شبك مامنه مهرب

ضفي عليه يابيض الوجه شبره

يوم العمر وقت الصبا كنت انصب

واليوم مثل الباركر دون حبره

عطني حلول تعالج الوضع الاشهب

ان كان عندك يابيض الوجه خبره


*******************
رد سعد المحمدي
سليم ينخاني وورده على غب

والمشكله مابين عظمه وهبره

بالبيت بنت اجواد حشمه ومنسب

تاريخهم معروف كلن يخبره

عقل وجمال وطيب جوهر ومذهب

وسليم مابه عيب ماغير كبره


ان طعتني جنب عن الحب جنب

مالك ومال الضلع وعله وبره

وان قلت لا لا يالصقيل المذهب

اللي كسر عظمك مكلف بجبره