ديوان الشاعر عامر عمران الشدادي

ياللي ظهورك وختفاك امتساوي = ودفنت راسك مير باقيك مكشوف
على الرداء يا الاش مادمت ناوي = وخايف رفيقك منك يحتاج معروف
اصبر لين اتحده عليك البلاوي = ثم صد عنه وقول ماني بمكلوف
لا تسابق الاحداث بالشين ضاوي = اخر رداك شوي لين انك اتشوف
يمكن رفيقك عنك يصبح غناوي = وتعدي الرحله على خير وتطوف
اما لقيته يسهجك بالنخاوي = او يستر الله مايجي عنده اضروف
وليا انت ياللي لانذاله مهاوي = ومن الوفاء والطيب يلعب بك الخوف
متجملً لو مانت حول الحراوي = ومن الرداء سالم وهو إلك مالوف
ويمكن بعد توصف بحراً نداوي = لو يضلمون اللي عليه انت ماصوف
مير المدوح اللي قبل لرهاوي = تصرف لمن شره بها الوقت مكفوف

مرثيه في الشيخ / بندر بن تركي ابا الشيوخ الشدادي الحربي , يرحمه الله

مرحوم ياشيخاً فقدته قبيله = دايم لوقفاته تذكر وتحتاج
الم جميع افراد ربعه رحيله = لكن هي الدنيا وطن هم وازعاج
دايم مشاكلها عريضه طويله = ياليتها ما تقفي الا بهلباج
والا ابو خالد وين يقلى مثيله = تتعب مداويره مع الناس ماداج
مثل الجمل قدم الحمول الثقيله = ما تزمله لوهي كبر كير وسواج
الحمل عن ربعه يقوم ويشيله = وعنده قضاياهم لها طب وعلاج
الحلها يسعى بحيل (ن) وحيله = ويورد الضامي على جم هداج
اقولها والقول يعرف دليله = والهرج له مليون قافي وهراج
بندر ولد تركي علومه جزيله = له مع رجال العرف مدخل ومخراج
ياما من اجهوداً بذلها جليله = ما تنتج الا الطيب يانعم الانتاج
مواقف ابا الشوخ ماهي قليه = كثر النجوم اللي توهج توهاج
كم من قضيه عند صاحب فضيله = لولا ابو خالد وضعها كان من عاج
حاما وراها والمعرفه وسيله = لين انبلج حقن كما الصبح فلاج
يا الله تجزاه الجنان الضليله = وترحم فقيدة حرب ياوال الافراج