ديوان الشاعر محمد سعد اليوبي (لافي)

،
الله يخارجني .. خلوكم معي .. وأن خليتوني ( بأعود معكم )
،

سمعت كلمة مثل دق النواقيس=كلمة غريبة جات من بنت حوَّاءْ
قالت تعالوا ياعيال المناحيس=أنتم ملامة .. قنكم بير زوراء
أنتم رجال اليوم مثل الأباليس=أما اعتدلتوا بأتخذ فيكم إجرَاءْ
قلت الله أكبر يازمان المتاعيس= تقدمت داحس على خيل غبراءْ
ياليتها لاجات خلف الكواليس=خلف الستارة والإشارات حمراءْ
وألا من العنقاء قُدْم النواميس=ماهي دميمة تختبط خبط عشواءْ
ماتدري أن النطق نطق المفاليس=منطوق دمية من مكاييج وإغراءْ
ولا أذمهن كثير منهن مقابيس=وأكبر مثل من أنجب الروح عذراء
هذي حقيقة ما عليها مقاييس=ودون الثريا .. فيه عقرب وجوزاء

ياذيب لامنك على زيد ناوي=وضاقت بك الطرقة وخفت الملامة
ماكل من هجرس وغنَّا صفاوي=ولا كل واحد يستوي لك عمامة
حذراك من خُوَّةْ كثيرالهقاوي=اللي توَهِّق خُوِّتِه من عدامة
وابعد عن اللي لانصيته سلاوي=وليا نخيته ليت منه السلامة
عندك ينعِّم لوسمع قول غاوي=ولا غبت وجَّه ياعضيدي سهامه
إن كان ثامنته عتيمة لغاوي=وإن كان لازمته لقيته هلامة
خلك مع اللي في النحية نحاوي=زبن الشكية مثل جدك سلامة
عدٍ ركودٍ لا نصتك البلاوي=جزلٍ جزيل الجازية من كلامة
الحلو جابه من عذوب المراوي=والذِّكْر باقي للسميَّة علامة
ياعزوتي ماني كثير الشكاوي=راع الذلول مجوِّده من خطامة
لكن ثمينة من شراها شقاوي=يربط عليها محزمة مع حزامة
دايم حياته مثل زيد الخلاوي=مايفترش ياذيب ريش النعامة
وإن قلت لك وقت النخية نخاوي=المال يذري من غزير الجهامة
من بيت عز لعزوته والعزاوي=بيت الذرى والصايبة والشهامة
غير المثايل جاتني في الحراوي= ممَّ بروحي يابعد كل زامة
هذا كلام الصدق والنور ضاوي=لو كان هيف ما تحجبه غمامة

قال اليتيم اللي فقد والدينه=اللي غدا قلبه من الحزن مقتول
أنا اليتيم اللي هله حارمينه=أمي تخلت والأبو صار مشغول
أنا الذي جارت عليه سنينه=أمشي ضحية بين الاقران مجهول
ماشفت من قدم لمثلي يمينه=ولا شفت لو كلمة من القول معسول
أضحك وأنا للحزن دايم رهينة=الصدر ضاق وسيف الأنذال مسلول
الله من مثلي غدا به حنينه=و في داخله قلب(ن) به الحب مشلول
يصبر على بلواه والله يعينه=الله يعين اللي عن الحب معزول

ياطير ياللي عالي الحيد غنيت=عساك ما أنت معتلي كل الاغصان
إن كان تبغى المدح باقول كفيت= وأطربتنا ياطير من طيب الألحان
وهجرست ثم أسمعت وأخذت وأعطيت=وأنت تعرف الصدق لو كان ما كان
صوت اللحن ماهو كما أنا تمنيت=لاتحسب إني لاعلى الصوت طربان
إحمد رقيبك طيعني لاتهاديت=ترى الليالي مقبلات(ن)بالاحزان
ولاخذت من طيب المعاني وقفيت=بدلنا الاحسان ياطير بإحسان
وإن كان حي(ن)بان مايبني البيت=ويبات في بيت(ن)على غير سيسان
خله يجيله يوم وأنت تجزويت=باللي صفا في الوقت ياصقر شيهان
ماني نديمك كان ليه تحديت=وأنا على ما قيل حاير وحيران
ياليت ماعميت بالصوت خصيت=دامك فهيم وعارف(ن)كل الاوزان
نمشي معك على النقاء لاستحقيت=والحق مثل النور في الكون لابان
أقول قولي وأتعذر ليا أخطيت=وردوا عليه القول لاكنت غلطان
لاهو جزاف ولا في نفسيت توريت=من يشري المعروف ماضن خسران

مايزت مابين النعايم والأهوال=وخايلت مابين الندى والغمامة
وشفت الشبه مابين رجلٍ ورجَّال=مثل الشبه بين الجمل والنعامة
الرجل زينة في ذراعة ليا مال=ماهو كما اللي زينها في اللثامة
ياربعتي مازدت عنكم بالافعال=أنتم سلايل مركسة .. كل زامة
يوم الردي ماله مع الناس منزال=منزالكم بين الكرم والشهامة
قال من قبلي تمثل بالأمثال=الرجل ربعه يارفيقي حزامة
وياربعتي والله نحية من البال=ماهي نزية من قرين العدامة
أفعالكم تبقى من الجال للجال=لاهل الحمية في الحمية علامة
ولعل راع الطيب دايم لكم فال=وقصيركم وقت السلامة سلامة
أقولها وأنا موثق من الخال=ومابين عم موثقينه عمامة
وأثني بها لاجات من ذيب شيال=والقاصر اللي ما يثمن كلامة

هجرست من ذاتي وأنا دون ذاتي=وحاولت أعرِّف من متون التعاربف
وهميت أصنف في البحور العواتي=وأحترت بين أصنافها والتصانيف
ولياي مالي في صنوف الذواتي=ولاني من اللي يقدرون التحاريف
ولاني غريبٍ من فلول الشتاتي=لجَّوا عليه المرجفه بالغطاريف
ولاني سميجة غارقٍ في سباتي=آميز بين الصادقة والتخاريف
أنا وزاني ثابت النايفاتي=لاجاتني من رأس راع المعاريف
أعرف محلي حزت النايباتي=ماني مكلف ما يعرف التكاليف
وإن طاح رمح ذياب دون الزناتي=وصارت قضية للصفوف الطواريف
أعرف جزاهم والجزاء من جزاتي=وأقصر عن اللي ما يطول التصاريف
وياهم قلبي هم من هم آتي=لاهم بالمثلوث بعض التناتيف
الغدر ما رومه ولا من صفاتي=ولاني مكسر للجموح المجاديف
لكن شقاها حزت المثمناتي=ساع الجدايل ميَّلن بالمغاديف

ياظفر يرمي من بعيد الاشارة=إحذر توسق رميها وأنت في الماد
إن كان رمَّايه بعيد(ن) قرارة=خيال براقه نواظيره إحداد
النار تقبس من صقير الشرارة=والحر قالو مايزاود على الزاد
حنا عيال العود ماحنا قطارة=إن كان بعض الناس بالقود تنقاد
إن جات زلة ما يعيب المشاره=بين الجماعة.. والقوانين ميراد
أنتم نمور وكل أبونا نماره=ذخر الفهود اللي اتوارد بالاعداد
حزت عددنا محتمين الصداره=وإن كان بالعده لنا الماد ميعاد
ياما دفنا في الثرى كل غارة=وياما رُوَيْنا من رهيفات وحداد
ويا ما رسمنا بالقلم كم داره=في صفحة التاريخ من تبر الامداد
وأنتم ذراية والقبيلة منارة=نعمين في نعمين من عهد الاجداد

البارحـة وأنا أتصـلَّي على النار=سرَّى على قلبي من الهم طارق
أوجست خِيفـة جالهـا سابق إنذار=وإيقنت بعـد أيمنت أني مفارق
وحار دمع العين في ناظري حار=واكف دمـع العين والدمع سابق
أطرى عليـه اللي موكل بالأعمار=إليا تبعت النفس والمـوت لاحق
قمت أتفكـر يوم ماتنفـع أعـذار=ويغلب عليَّه من هوى النفس سارق
ومنه تفكـر في المنيـه والاقدار=كيف يتوقَّى الروح والموت سايق
وقمت أتذكـر من سبقنا على الدار=وأقفى عن الدنيـا بليا مرافق
وين الجيوش الحاكمة شتى الأقطار=وين الوفود الساريات البوارق
وين النشامى اللي طويلين الاشبار=وين القصـور العاليات السرادق
وين التواصـل والتنادي والأسفار=وين الجموع مصفقات المعالق
وين الشموع اللي تأجج بالاعطار=وين الجنـان الوارفات الطرايق
وين الغـوني يـوم أشَبِّه بالأقمار=وين الهنـوف وشدوها والمعانق
ماشال منها العبـد لو ربع قنطار=غاب وتورى بعد ماكان شارق
وإلياه مالـه غيـر مدبول الأمتار=ولفـة ثيـاب مرقَّعـات الشرانق
والخاتمه منـه على الفانيـة سار=لابد من سهـم المنيات ذايق

ياخفوقي ياشفوقي.. ميل واطرب في هواه=واعذابه من سحابه برقها خلف المزون
زاد حبـه دام طبه .. قلب ساكن في حشاه=هو مرامه من غرامه مابقي غير الفتون
رام ريم .. من كريم .. هو دواه وهو بلاه=إتهـوَّل لاتحـوَّل وإن تمـايل بالفنون
وإتعجب لاتحجب بدر صـافي في سماه=فوق نوره زاد نوره لاسدل ليل المتون
إن مشى مثل الرشى .. لاتهادى في الفلاة= ويوم يرتع فوق أربع يرتعن معه العيون
هو حنيني هو أنيني كل غالي من غلاة=هو سمايه هو رجايه يوم غيري يرتجون
لو تخطى ما خطيته الخطاء خطوة خطاه=وإن جفاني ماجفيته جفوته جفوة جفون
وإن تعـزز لاتقـزز والله اللي في علاه=أستبينه في جبينه ما أمتري فيه الضنون
بأعتنيبه وأختليبه والخلاء عندي .. خلاه=ما تـأسَّ لو تعسَّ والعـواذل يعتبون
السـلامه في سلامه نور قلبي مع صفاه=والندامه في عدامه لاربت ريب المنون
هو بلايه هو دوايه هو شريكي في الحياة=إشتريته وإقتنيته وكل عـذراء مـاتهون

يامن توهق في كثير المطاريق=وعيَّا يلاقي للسلامة دليله
حذرا اتوجه يم دار البلاليق= أهل الغواية والكبود العليلة
منه تعلق في كثير المعاليق=مايهتدي فعل الصواب وسبيله
يروح مابين الدروب الزحاليق=ولا عاد يلقى دربه اللي يشيله
تومي به الحياة سوات الشماليق=من حيث ما ذرَّيْت مافيه حيله
ومنه تعلق في الوجيه المطاليق=وجه العميل اللي يقدي عميله
إليا ارتكالك مثل صم المصاليق=وإن كان ماشيته رقيت الطويلة
يرفعك سد الغيب بين المخاليق=ولامد مايعطيك غير الجزيلة
وإن لِقْت من لاجاك يالذيب لا تليق=رجل(ن)تعده من رجال القبيلة
لابد من يوم(ن) تَصَك المغاليق=وكل(ن) يحصل في شليله حصيله