ديوان الشاعر عبدالله عتيق الحنيني

الكل عقله يا اهل العرف مغنيه=كلن يقول انه بعقله غناوي
لوكان خبل ويمطخ الما على يديه=مزري على ما قيل فيه المداوي
يطيش راسه لا بغا احدن يقديه=وان طاش ركبك القعود الرغاوي
ودعواه لاكبرت غدت بارد أمويه=وحق المطرف طارف المسنحاوي
نطلع عن الموضوع والقصد تنبيه=للان ما قررت لاشك ناوي
والا اترك المعنى لغيري يسميه=وثلثين جمهور التحاليل غاوي
العفو يا جمهور من غير تنويه=الفتل حال وحال ماهو حراوي
جدع وبدع وادمج القصد تمويه=ويصير نجمك فوق نجم الخلاوي
لو ما تعقد الحبل حاول تلويه=يجيك حلحيلً يفل الملاوي
ياهملالي عرف راسه مهقويه=شاعر وعدا فلسفة كل راوي
متعمقن با الفلسفه قل واليه=وبـّال لو هو قبل قبل امس شاوي
والطيب كله كاسبه في حراويه=وان قلت فارس قال مثل العطاوي
لا استرسل وقام يهلس تنخدع فيه=صحيح لولا الفعل بار النداوي
هرج السعه يجتاح جرد المهاميه=يبين حزات الزوم الرهاوي
الله يبطي في لزومه وطاريه=حزام راسً فوقه الذيب عاوي
والاش وقتً فات يبحث خوافيه=والا الرخاء فيه الجميع متساوي
كم واحد يكرم بما تملك ايديه=واحدن يصد وهو على الجود قاوي
واللي مضى تاطا وتعدا المشاريه=با الجود والا با الظفر والعزاوي
لو مالحقنا وقتهم سامعن فيه=والوقت هذا ما يجي با المناوي
ستر الله الوالي على الخلق مضفيه=والله يجنبنا الفتن والبلاوي