الشاعرة القديرة نبض الوجود 000

قابل البشري=
ياسلام الله برده تنطوي تسعين طيه= تعرف الدرب الصحيح وتعطي العلم القراحي
من تعرضها غدا حاله كما حال الصبيه= لويفرفر طيرها ماطار مكسور الجناحي
نبض الوجود=
ياهلا مليون باللي نار شعره دوم حيه =مير انا جاييك متهني وشاعر بنشراحي
مد لي فنجال مشروبي وكيفي شادليه =قهوه البن اليماني ..بعدها اطلق سراحي
قابل البشري=
البقا بعطيك حقك وانت لاتبخل عليه=بغتنم زهرة عبيرك واغتنم هبة ر ياحي
واحدة من الف للمزيون ماتحسب خطيه=خلها تسرح وترعى ثم تضوي فالمراحي
نبض الوجود=
لوتهب الريح تلفحك السموم الساحليه =وانت ماتقدر على ناري وماتقوى فياحي
الخطيه لو تجي منك ترى ماهي زريه =ولو تجي مني الصغيره ماتصبح بي صباحي
قابل البشري=
ليتني جنبك قريب غزال الخالدية=كان جيتك فالمجي مرة ومرة فالمراحي
وليت ترجع لونهار اليوم ذيك الجاهليه= واقطف العنقود والتفاح واشرب كاس راحي
نبض الوجود=
مايمر الدار من يملك رسومي الجمركيه =وانت لاجمرك معاك ولا معك مكتب سياحي
مير لم حروف شعرك لا اتبلا بك بليه=ويسمعون اللي بمكه رفع صوتك بالصياحي
قابل البشري=
مايرد شعيل عن دربه كلام القنفذية= ان بغتيها بجد وان بغيتيها مزاحي
بندقي بندق تودي من نصاها للمنية=مير يام قرين قري قبل لا اطلع سلاحي
نبض الوجود=
لويجينا شعيل شاف نجوم في وقت الضحيه=غير مايبرح سوى جثه بعد نزف الجراحي
خطتك ماهما تزيّن بالحروف المخمليه=تفشل الخطه وماتبلغ سبلها للنجاحي
قابل البشري=
خطتي بالطيب نبغاها ولانبغى العضية= وانت تبغاها عضا مقرود ماتبغى الصلاحي
والدواء يعطيه للمرضان راع الصيدليه=وانت حرمت الدواء وشلون بتحوش الرباحي
نبض الوجود=
الدواء ماينطلب مني ومالي فيه نيه=والعقل واعي ومايخلط محرم بالمباحي
انت ماتحسب حساب الناس والا المنقديه =ترمي الهرجه ودستورك يدور الانفتاحي
قابل البشري =
هيه بنت الرجال امزح ولالي فيـك سيـة=ثابث مثل الجبال الشم وعلومي صحاحـي
ولاتلوم الشاعر اللي تعجبـه هـذي وذيـه=وانت فجناحك دوا شافي وفي الثاني ذحاحي
نبض الوجود=
انت شاعر مير انا عندي حروفي اللولبيه=لو تزيد الجرجره بالشعر ماتبلغ كفاحـي
انصحك وآخر كلامي.. اتـقِ شرّالبنيـه=لاتغامر لاتطامر دور اللي لـك متاحـي

... أوركيدا فاخرة ...