قصيدة الشاعر/ الهاب الوسيدي في حفل تكريم عنبر الرويشد

قصيدة الشاعر الكبير/ الهاب بن عوض الوسيدي في حفل تكريم قبيلة حرب للشيخ / عنبر الرويشد لتنازله عن قاتل ابنه :

بسم الذي كل الرجا منه والخوف=مصرف الكون العظيم ونظامه
علام سر الادمى داخل الجوف=المتحد والمنفرد فى دوامه
نرجيه يوم الناس طوفا ورا طوف=ونعوذ فيه من الشقا والندامة
والصبر عند الله مقدر ومخلوف=مثل جزا الصايم بحسنة صيامه
وراع الوفا مايلحقه شك وحسوف=يعيش بين الناس مرفوع هامه
يابن رويشد لك على حرب معروف=فعلا على صدرك يعلق وسامه
والطيب بين الناس واضح ومشيوف=وراعيه محشوم ورفيع مقامه
مهما تصير اسباب واحداث وظروف=مايلحق الصابر بصبره ملامه
وحوادث الايام صادف ومصدوف=ما كل مامرت تمر بســـلامه
مير الحظيظ اليانكشف كل مظروف=اللى رضا الله غايته واهتمامه
ماباع دمه فى ملايين والوف=وحرج عليه وكل من جاه سامه
والياستجل الخطب والامر مكشوف=رباطة الجاش العظيمه صرامه
مضرب مثل تسمع بها الناس وتشوف=ورمز من رموز الشرف والشهامه
ودام العفو وعتاق الارقاب به نوف=عز الله انك نلت ذروة ســــــنامه
من بينك وبين ابن طوعان منصوف=الموقف اللى يستحق الزعامه
وان صار سلم العفو للناس مالوف=اجره لكم حتى تقوم القيامه
فى ثالث ايام العزا وانت ملهوف=ما حد برك قدمك وطش العمامه
اقدمت والعبره تكسر من الجوف=عسى عوض صبرك بدار الكرامه
والعلم الابيض له مضامين ووصوف=واللى يبادر فيه يمسك زمامه
والطيب بيت له معازيب وضيوف=والفرق بين الناس شده وقامه
والله عطاك العقل والسمع والشوف=والحلم والهمك الورع والقوامه
على كثر ما اسمع بالاحداث واشوف=موقفك وفقك الولى لاغتنامه
تشكرك حرب من ارض مكه الى الجوف=ومن الخليج الى سواحل تهامه
والطيب ما هو باوسط البير محذوف=يبقى على روس المنابر علامه
وعداد من يسعى على البيت ويطوف=كل يبلغ لك ثناه وسلامه

الهاب بن عوض الوسيدي الحربي