القدوة

انا هيض علية الهاجس أللي ما يحب اللاش = ولا يمشي بطرقة يعرف ان اللاش يمشيها
قليل العرف وهروجه كثيرة والفعايل ماش = علوم يقولها بالليل يصبح ما يسويها
ويحب اللقمة أللي ما تعب فيها تجيه بلاش = لجل ما يتغب النفس الردية ولا يعنيها
ولا يعرف صديق ولا رفيق الباير الغشاش = حشايم حاجته روحه على الانذال يرميها
كريم النفس من تلقاه سارح يتبع الادباش = مداهيل الضيوف أللي تفلي في مفاليها
مجار انك تلاقي جنبها واحد من الاوباش = عطا يالله عسى الله يطرح البركة لهاليها
اذا غابت عليه الشمس تسمع دنة المهباش = ونارن فوقها دلة مقابلها يواشيها
ليا شاف المسير حط له فوق الفراش فراش = ورحب بالتحية أللي تنشط نفس موحيها
وكريم النفس رجلن بالمدينة مجهز المطراش = يقوم بواجب الجيران والضيفان يقريها
وكريم النفس من يتعب ومن يعرق لجل يعتاش = ومصدر عيشته دايم مصا بحها مماسيها
وكريم النفس من ما يذكرونه للفتن نباش = ولا طبعه يجيب علوم وعلومن يوديها
وانا يعجبني الصادق ولا يعجبني البكاش = وكل رجال طبعه قدوته اللي يقتدي فيها