. . . ( صــبـــح أسبــــــــــاني ) . . . !!

مساءكم سكر :
في صيفية ماضية كنت خلالها خارج المملكة كتبت هذه القصيدة . . في الغياب تشعر بقيمة الحضور . . !!
.
.
.

( الدمع طبشور ) و ( الأوجـان سبـورة )= و ( الليل منفى ) وجرحي أجمل أوطانـي !!
وأنـا غريـب ٍ غيابـه يشـبـه حـضـوره= كان الحـزن خطوتـي والعمـر ميدانـي !!
ماكنـت أحـس القلـوب تعيـش مأسـوره= لين أقبَلـت مـن هواهـا هـز وجدانـي !!
وقفت . . والقلـب ضـاع بلجـة شعـوره= والعين تاهت . . ومات الحكـي بلسانـي !!
معهـا عرفـت الغـرام وعاتـي بـحـوره= ونسيت شـي ٍ قبـل مـا أنسـاه ينسانـي !!
لقيـت بعيونهـا الثنتيـن . . ( أسطـوره )= قـصـة غــرام ٍ تمنيـتـه ولاجـانـي !!
ذكـرت ذاك الزمـان اللـي قـضـى دوره= أيـام كـان الهـوى يسـري بشريـانـي !!
آمنـت بالحـب . . قبـل أؤمـن بدستـوره= وأطلقـت قلبـي علـى فالـه وخلانـي !!
ورسمت في داخلي لأهـل الهـوى صـوره= وبروزتها مـن ( رداة الحـظ ) بأجفانـي !!
دورت بيـن ( الصبايا ) ( بنـتٍ أمـوره )= ( أحيا ) على شانها و ( تموت ) من شاني !!
أبـي مـلاك ٍ مابيـن الـنـاس مسـتـوره= ماسولفـوا عـن حلاهـا فـلان وفلانـي !!
إن سلهمت قلـت أنـا النظـرات معـذوره= الله عطاهـا الجمـال أشكـال وألـوانـي !!
وإن سافـر الحـزن فيهـا لأخـر سطـوره= قلت: ( الحزن يا إلهـي ويـن ودانـي ) !!
الشعـر مجـدول . . والخصـلات منثـوره= على جبيـن ٍ كأنـه ( صبـح ٍ أسبانـي ) !!
والعـيـن بالسـحـر منهـيـه ومـأمـوره= والثغـر مـن روعتـه خاتـم سليمانـي !!
واليـوم عـاد الغـرام لسالـف عـصـوره= ولقيـت ذيـك المـلاك اللـي تحرانـي !!
سألتها : الحب ؟؟ قالت : ( كان له ثـوره )= شفني مـن العـام مـن تأثيـره أعانـي !!
وأتذكر أني قبـل مـا أقـول ( مشكـوره ) = رميت قلبي وقلت : ( إن الهوى فانـي ) !!

.
.
للجميع ارق تحياتي ..
.
.
.
منصور المعمري
21/10/2007م