قصيدة ( اقواس)

قضيت ليلي راكز الكـوع منقـاس =بالي سدير وعامس بـي عماسـه
عامس وعابس وامتكعمس تكعماس =كني تعيس مـل شـوف التعاسـه
اشكي جروح سقمهن صدع الراس =من سقمهن راسي تزايـد وجاسـه
ابديتهن للحبر مـن فـوق كـراس =لين الـورق بلـل بدمعـي يباسـه
ابديت ما سوو مقاريد هـا النـاس =اهل الحسد والبغض واهل النحاسـه
تسببـو بفـراق قلبيـن ونــاس =مستانسيـن فـي هواهـم وناسـه
صارو خساس للمحبيـن ونجـاس =من بيننا حالـو بحقـد وخساسـه
شبولنا في داجـي اليـل مجبـاس =ودسوا لنا سـود النوايـا دساسـه
ما فكروا برياق بـا الحـب يبـاس =ما فكروا با الحب عقـب انتكاسـه
ما كدروا عفت هوى عطر الانفاس =وما قدروا قلب غطس به غطاسـه
خلوني اسهر حايم فـي وسـواس =وافتل على فرقى وليفـي سياسـه
اجلس الهاجس على راس نبـراس =وارمس عليه بهاجسي واحتباسـه
حبه على قلبـي ملولـس تلـولاس =صعيـب تحديـده صعيـب قياسـه
راعي جديل ينطح الشمس بشماس =وعنق مبعـد بيـن متنـه وراسـه
ومبسم ليا منه بسم يبعـد البـاس =وبيض ثمان يلعجـن تقـل ماسـه
لامس بحبه قلـب بلحيـل حسـاس =وجاوب معه قلـب يحـب التماسـه
لوجتني الدنيـا بـلا كـم وقيـاس =والله منسى مـن عديمـه اجناسـه
ياليت لو قبل امس ما دونه اليـاس =مار انطوى من دون قبل امس ياسه
الحب لقلـوب المحبيـن محمـاس =ومن لاانحمس ماذاق طعم الحماسه
يقطعك قلب خاليـن دون هوجـاس =ويقطعك نفس عا يشه با الدناسـه
ويقطعك خف لصعب الطرق ما داس =ويقطعـك يـا راس بليـا رياسـه
والناس مابين المجـرب وعسـاس =والخيل تظهر كـل راعـي فراسـه
وعمر الذهب ما يلقي عند نحـاس =يلقى الذهب من دوره عنـد ناسـه
اكداس همي داخل الجـوف جـلاس =متربـعـات جالـسـات جـلاسـه
ابديت للقرطاس كدس من اكـداس =ولو زدت غيره كدس يطمس طماسه
وطبع الفتى ما يطرحه كل نسنـاس =ياقف لميـلات الزمـن قـو باسـه
والصبر قوت الروح دايم هو الساس =مثله يكون الراس با البيت ساسـه