احيان يكفي عن حضوري غيابي

تنشد وتبغی يالرفيق الجوابي
ياطيب الرفقه بعيد المحاريف

خذ علم ماحوله شكوك وضبابي
مغلفه عن سذج الناس تغليف

عند الامور الكايده والصعابي
دور وتلقاني من السيف لسيف

وعن مايذل النفس رافع جنابي
مرقب علی روس الجبال المشاريف

وان شفت حولي ضول عبر السنابي
قريب لكن بعد جده عن طريف

احيان يكفي عن حضوري غيابي
ماني مفتش في ملفات الارشيف

مالي ببنوك الرشاوي حسابي
وماحط رعيان الغنم روس يامنيف

ياراجي الماء من بياض السرابي
اعرف ترا بعض السوالف مراديف

اللي مايفرق بالخطا والصوابي
ودك يعدى العود الازرق مع الكيف

وانا اليا شفت الخطا والتغابي
ماني بحال مكسرين المجاديف

اليا جهلني زيد زايد درابي
في رحلة قبل الشتاء باخر الصيف