ديوان الشاعر/بدر بن عواد الحويفي الحربي

وهذه قصيدة للشاعر الكبير سبيل بن سند -رحمه الله- مسندها على الشاعر الكبير بدر الحويفي ..

يقول سبيل:

يابـدر ماتخفـى علـي السواليـف=ياطيّـب الرفقـه بعيـد الهـقـاوي
ادري واعرف ملامس الشلف والشيف=ورفيف الأبرق من رفيـف النـداوي
لكن اطوّف فاضي الحكـي تطويـف=لين انهـا تاصـل حـدود اللحـاوي
واليا التفتنا لـه هدمنـا الغظاريـف=بمطـرقٍ يبعـد خفيـف الاهــاوي
كد هيز ياواف الخصايل وكد عيـف=ملامسـه يحيـر فيهـا الـمـداوي
اليا طب ميدان النفـوس المشاريـف=حطت ووطت مـن كثيـر العـزاوي
والا الكمـال لواحـدٍ حـي ومنيـف=ذا الجواد والحبل المتيـن الرهـاوي
محيي النفوس وخالق المزون والريف=محيي الهشيم اللـي شعيبـه سنـاوي
ماقول انا عنتـر ولا قايـل استيـف=اقـول وهـاب الوهايـب سمـاوي
لكن ليـا منـي رفعـت المراظيـف=سـم الحنيـش وسمّهـن امتسـاوي
وليا ضرب رمحي مدق الشراشيـف=شـال الصفـاق وصلعـن الكـلاوي
يوم الردي في مذهب الكلب حريـف=يندس وذي عـادة كـلاب الشـواوي
ياصلك غافل ويترعرع اليـا شيـف=ويروغ اليا قلت الخـلا يالضـراوي
لاكان خلـه يابـدر يركـب الهيـف=يطويك في بشتتـه وانـا بالعبـادي
والحر يدري ليش نصبر على الحيف=وش هـو مدانـا لابتلتنـا البـلاوي
ماهي سواليـف الوجيـه المكاسيـف=عشاقـة الميلـه بلـيـا حــراوي
على الرفيق يصلفحـون التصانيـف=ومن الهبـوب يسخـرون الجنـاوي
والضـد ياخذهـا عليهـم مدانيـف=والكـل معطيـه القفـا مـايـراوي
كنـه مكتـف عـن تحديـه تكتيـف=لكن مـن العانـي يبـون العشـاوي
بصرار وبـرزّة خشـومٍ مشانيـف=وان ذار مالك تنشـده ويـش نـاوي
يضرب بك الغبة ويظهر على السيف=ويطير بك يـم الكواكـب فضـاوي
يصل القمر ويرد فـوق العواصيـف=وانته معه كـن الرياحـي خـلاوي
واليا صرخ باذنـه دوي القواصيـف=راحـت حماريـه وتمـزّع يـلاوي
من عقب ماهو حاتم الكف ياضيـف=وعنتـر ليـا غيّـم نهـارٍ عمـاوي
ويطق بأصبع لابن لعبـون وحنيـف=وابـن ربيعـه والحيـاة الخـلاوي
ماعلق المنسـف ولا علـق السيـف=مثلـه ولا غـنـا ولا عــد راوي
هذا الدليل انه على قصر واصخيـف=لاكان رايك وانـت رايـك كفـاوي
رايك نسّيـر فيـه الاقـلام وانقيـف=والنـار نشعلهـا ونحمـي المكـاوي

ورد الشاعر بدر الحويفي ..يقول:

يامرحبا عداد ما اشرق ومـا شيـف=نـور الكهـارب بالمـدن والقـراوي
باللي فتح لسلوب غامض مظاريـف=ولفتـت نظـر لملليـن الغـطـاوي
ضيحه زمت له بين غزو ومناكيـف=نوبٍ تـزم ونـوب تعطـي مهـاوي
وده يوقفهـا علـى حــد توقـبـف=وانـا اعتبرهـا للثمـن ماتـسـاوي
ياللي تقـدا بـك رجـالٍ عواريـف=طلبـت منـي راي وانتـه غنـاوي
رايـي تودعهـا نشيـط العواصيـف=لو انـت متسيطـر عليهـا عـلاوي
(يمكن لها باوضاع غيرك محاريـف=وانته لها تطـرق عطيـب الاهـاوي
انتـه تخيلهـا مثـيـرة قـواذيـف=وانا اعتبرهـا مـن ثميـن الهـداوي
رايي تجاوزها مثـل سانـع الطيـف=واقرب حرا القصه مجـرد حجـاوي
(وقصة رفيقي قصة الجار والضيـف=على المعـزب مـن كبـار البـلاوي
يابن سند بالصبر رحمـه وتخفيـف=وترى التسامح حق فـرضٍ سمـاوي
ترى الظنون تنشف الفكـر تنشيـف=نوبٍ تصيب ونوب تضرب هـواوي
العام انا سامـع هـروج وتصانيـف=من نـاس ماتفهـم كثيـر اللغـاوي
ناسٍ تحرف وقع الامثـال تحريـف=شجعان الالسـن بارديـن الهقـاوي
وان قلت من هم قيل هذلول وخليـف=شبّابة العنـدل علـى عـود جـاوي
ناسٍ ترّكـز للجبـر شـوك عكيـف=ويرثع بغيبـات العـرب كـل واوي
وان كان تذكر لـك كـلابٍ دناديـف=وتقول منهن قـد ختلنـي ضـراوي
قبل سمعت وشفـت واقـع وتطفيـف=وخليتها تضـرب وسيـع الفضـاوي
وان لهـا لـو ماتشيمـت حـريـف=لاكان ما ازعجنـي نغيـط العـواوي
من شيمة الطيب حشمـت المهافيـف=لو يتـرع الكلمـة خطـاة الرغـاوي
اللـي يسطـر فاضيـات السواليـف=نفعـه ضنيـن وبالسوالـف رهـاوي
لولا الرجال اهل اللـزوم والمواقيـف=لبّست راع الغـوج بشـتٍ حسـاوي
لو ان غوجه من سبـاق الشواحيـف=مرهي عليه اليـا بغيـت الغطـاوي
اللي يبـي يمسـح حنـان المواليـف=ياعنـك لا طيـب ولا هـو حيـاوي
وبالمجتمع ينعش صدى الكذب والزيف=يقول انـا مـع حـق وفـلان داوي
ومادام نار الشيـخ ماتعلـق الليـف=ماهو على عسـر اللحاليـح قـاوي
ماتبـرد النمـه كبـود الملاهـيـف=ولا تنفع العقل الضعيـف الـزراوي
واللي يلغف غايـب النـاس تلغيـف=لاعـل مالـه عنـد ربـه عـراوي
من دق بالغيّـاب هـزلان وضعيـف=حتى ايش لو هو عند نفسـه فـراوي
وانته رجل عارف ومن ناس عُريـف=ماضاع لـك حـقٍ ووجهـك نقـاوي
يوم الرعود اللي بها بـرق وتخفيـف=نجمك لمـع يـوم المهـذب جـراوي
هاك الخيال اللي سرى لـه رفاريـف=سيله على بعـض المناهـل نحـاوي
وقفت لـه فـي قـو همـة وتعنيـف=ومن عادة الطيب سمـوح وقصـاوي