ديوان الشاعر / عضيب بن هليل العلوي الحربي

قصيدة مرسلة من الشاعر عضيب العلوي إلى الشاعر محمد العسيلي رحمه الله

ياطالع أوصل من جوابـي خيـاره=للـي عرفنـا بالمواقـف سيرهـم
ياللي طلوعـك بالسعـد والنـداره=يابن الرجال اللـي قديـمٍ ظفرهـم
هاض الضمير من أشتياق وغزاره=وأسباب ماهاضـه ربـوعٍ ذكرهـم
اللي لشوفتهـم نسـوق البشـاره=شفي مشاهدهـم وشفـي جبرهـم
أشـرف نهـارٍ شرفـوا بالزيـاره=وأنا بمحلٍ منتحـي عـن ديرهـم
هذا الدليل مـن الوفـاء والوقـاره=تجـاوزا بعـد الديـار بسفـرهـم
والكل قـدم لـي جزيـل أعتـذاره=زودٍ علي طول المسيـر وسهرهـم
اللـي مواقفهـم مواقـف جبـاره=فحول الرجال اللـي بعيـدٍ نظرهـم
منهم محمد ريف ضيفـه وجـاره=ومرزوق ريف اللي لفوا من سدرهم
مع لافي النفجـان نـادر حـراره=وأناأتشرف وأفتخـر مـن فخرهـم
ربعٍ عمى عيـن العنيـد ودمـاره=يوم اللقاء ماأحدٍ يجي في نحرهـم
عدوهـم مجـبـور بالأنكـسـاره=دائم يعاف عنادهـم مـن سبرهـم
أبن العسيلي منهج الطيـب كـاره=مسقي صناديد العداء مـن كدرهـم
ومرزوق نمرٍ من سلائـل إنمـاره=وينبيك عن بعض المواقف خبرهـم
ولافي عرفنـا ماقفـه وأشتهـاره=يوم أرقصوا بعض البشرفي سكرهم
ماخاب ظـن المحتـري وأنتظـاره=قلبي حظى بحضورهـم وأنتظرهـم
شاهدتهـم والريـق فيهـا مـراره=وتم الوداع وعـودوا مـع أثرهـم
عسى الجميع موفقٍ فـي مسـاره=الله يمّـن سيرهـم مـن خطرهـم
بلـغ سلامـي كـل واحـد بـداره=أما أوصل المكتوب ولاأنت زرهـم
أحمل سلامي وأوصله مـن نهـاره=بتحيةٍ تظفي علـي مـن حضرهـم
من خاطـرٍ ماشـال زوم وكبـاره=اللي علي دافـع وفاهـم شكرهـم
عرف النشامـا ياخدينـي تجـاره=راع المثل قـدام ذكـري ذكرهـم
أهل المواقـف والشيـم والنعـاره=الرابح اللـي دون مالـه ذخرهـم
ولاّ ترى الرديان ذكـروا خسـاره=اللي ذخرياديـب منهـم خسرهـم
ياليـت بالرديـان ياخـوي شـاره=من شأن من شاف العلامه حقرهـم
من شأن تعرف قيمتـه وإحتقـاره=حتى مشاكيـل الرجـال تحذرهـم
أحذر ترى الرديـان زيلـة خبـاره=عززجنابـك لاتـغـرّك صـورهـم
ساس الـرداء مذكـور بالأنهيـاره=عزوم الرجـال تعزهـم وتعثرهـم
أحدٍ على العليـا تسوقـه غيـاره=ومدهالهم رجم الشرف ماعسرهـم
واللـي قنـع بالهينـه وأنحـداره=ذولاك ماأحـدٍ بالجماعـه شهرهـم
نـاسٍ تحـط السيـده مستشـاره=ياليـت معبـودٍ خلقهـم دمـرهـم
وأخير مـن كثرالكـلام أختصـاره=ولاينحصي صاح البشر من عورهم
دقِّ الجرس ينقلي أجمـل إعبـاره=من الرجال اللـي حميـده سيرهـم
يحمـل كـلامٍ بالصداقـه مــداره=من اللي علي الشيمه إلهي فطرهـم
طالع زهم وأنـا أتحـراء خبـاره=في ساعةٍ كنـت أتخيـل صورهـم
وأرسل كلامٍ به حمـاس وحـراره=كلمة وفاء تشرح غلانـا بنظرهـم
عضيب شرفنـا بحسـن أختيـاره=وخص الثلاثه في ثنـاه وحصرهـم
أثنا علي اللي في هاك اليـوم زاره=وأهل الظروف اللي ماجوله عذرهم
وهـذا دليـلٍ فـي وفـاه ووقـاره=بعرفه يرى من واجبه مايخصرهـم
ويدراء الرفيق اللي الصداقه اشعاره=أهل الوفاء راع الوفاء مايهجرهـم
والوقت يكشف لك حصيل أختيـاره=وأهل التجارب نعتبرمـن أعبرهـم
ياعضيـب كـلٍ دون حقـه وداره=وأهل الضغاين كم وقفـت بنحرهـم
وقفـت وقفـات العديـم بصطـاره=وأهل الظفر عيب الزمان يغدرهـم
واليوم راحـت بيـن أداره وأداره=وأهل الوسائط طوقوهـا بقشرهـم
تبي لهـا حلحيـل يصـل الـوزاره=ورجال صعبـات الامـور تخبرهـم
قلّ للأميـر اللـي زهتـه الامـاره=ذخرالفـروم اللـي بعيـدٍ نذرهـم
حـدّ القبيلـه لايضـيّـع قــراره=ترى الرجـال حقوقهـم تنتظرهـم
وحـقٍ بـلا هيبـه لعـلـه وداره=والنـاس هيبتهـم بهيبـة ديرهـم
يالفـرم لكـم وقفـةٍ بالـصـداره=ومثلك يسنّع ناس لـو ماحضرهـم
إنحاء زملاك إليـا نووهـا بغـاره=وحنا زملانا إليا نووهـا نعسرهـم
يالفـرم جتنـا فزعـةٍ مستعـاره=وتأمـروا لكـن سببهـم قصرهـم
يالفرم ترى الوقـت تـاره وتـاره=لايفرحـون اللـي سلفنـا قهرهـم
أدحم بجنبـك كـل راعـي نعـاره=الياما عن الحق العزيـز نحجرهـم
بالحـق ماتمشـي علينـا العيـاره=من الماكرين اللي عرفنـا دورهـم
لـولا صلابتنـا كلتنـا السـعـاره=ومشّوا علينا أهل المشاكل دجرهـم
حنا إليـا مـن أن الطوابيرسـاره=جمعٍ عن الواجب مايكشف قمرهـم
فينا علي صعب المواقـف جبـاره=إليا ما أن شيطان قبلانـا سحرهـم
لعـل رجـلٍ مابـرأسـه غـيـاره=دون الحقوق اللي بها الفعل يرهـم
تعجـل تعيسـات الليالـي دمـاره=وبعد الرخوم عن الرجال يعمرهـم
وكان الجمل ياعضيب عاقه إهجاره=عليه منها وكـل نـاس وخبرهـم
وأن كان هـذا خافـي العلـم ذاره=وذولاك قانون الوسائـط نصرهـم
عفها مثل ما تعيف قطف الزقـاره=الياما يزول الحاجز اللـي سترهـم
وراع الجوار الشين بـدل جـواره=بجيران مايشكي المجاور ضررهـم
هذا كلامـي وأنـت قـرر قـراره=وأبعد عن اللي معمي الله بصرهـم