ديوان الشاعر/ سعد المحمدي

*ياهل الثماميه مواريث الابطال*

*ياهل الكرم ياطيبين السجيه*

*قدام مبدا في حديثات الامثال*

*شرد عليهن ماركه عالميه*

*سلام تسليمه وفاء قدر وجلال*

*يادرع جنبي يارجال العطيه*

*لابه لها بالولد من حرب الافعال*

*اصل ومواقف بالزمن جوهريه*

*اهل البيوت اللي بها فال وعقال*

*للضيف والجيران والاهليه*

*عن الشتاء تدفي وبالقيض مقيال*

*قبل السلام يسود نجد العذيه*

*حم الذرا من دونها ترخص الحال*

*في يوم صبحه ليلتن خرمسيه*

*مايذبحون الا مجوخ وخيال*

*وعقيد سربه مايهاب المنيه*

*يتلون شيخن لصعيبات حلال*

*فيحان له مني سلام وتحيه*

*دايم مضيفه للمشاكيل مدهال*

*دله وصينيه وكفن نديه*

*ايديه تفني مايحوشه من المال*

*دمث الجناب وطيب نفس وحميه*

*مدحي لشيخن فيه نفخر ونختال*

*بالمنبر المشهود واجب عليه*

*واليوم بعد الفيصلي شبل الاشبال*

*وحد قبايلها وقاد الرعيه*

*خلا الجميع اخوان في كل الاحوال*

*الدين واحد والهدف والهويه*

*صرنا حما لدار ونربي اجيال*

*ونحارب الارهاب والعنصريه*

*ياسامعي ماقول خله على البال*

*للفايده من تجربه واقعيه*

*العلم نور ومن تعب واجتهد نال*

*طموح من شوحه ورى الجاذبيه*

*سوات بندر راعي المعدن العال*

*ياعل مانسمع عن القرم سيه*

*كافح وحقق ماسعاله ومازال*

*عنده هدف سامي ونفسه جريه*

*مالوثو فكره خبيثين الاعمال*

*سود النوايا والنفوس الدنيه*

*واللي يقول اخطيت في مدح الابطال*

*ينطح براسه كشب والا طميه*