( اقوى جدار )... محاوره

خالد بن عبيد بن معتوق الأحمدي

اقوى جدار انبنا جدرٍ مشيّد بالحجر والحديد=مثله في بعض العرب ناس لها ثقله بوقفاتها
لاتصير مثل الورق وتطير في عجّاتها لابعيد=وتصبح ضحيّة عواصف ماحسبت احساب هبّاتها

عيسى بن رجعان الرّشودي

صحيح ماقلت بالشّدّه يبين الرجل يابن عبيد=والنَّاس بالنّاس نوب إيغر بعض النّاس هقواتها
لاتصغي الأذن للاشوار واتبع كل رايٍ سديد=من عاقلٍ عاصر الدّنيا على شتّى مجالاتها

خالد بن عبيد بن معتوق الأحمدي

تراك يابن الرّشودي عندنا محسوب شيك برصيد=لاتخلف النّهج دام انّ النفوس تزيد حسناتها
العلم بيّن ولا نحتاج في شرحه نعيد ونزيد=هل تذكر الدّله الصّفرا وقهوتها وعاداتها

عيسى بن رجعان الرّشودي

وأنتم حزامي وانا دربي على القمرا ولمع الجليد=امشي دروب الوعر بالليل لو صِعبة ملفاتها
ناس تفتش سراير ناس بتطلع بشيٍ جديد=للنّاس مثلك عقول وخل خلق الله وزلّاتها

خالد بن عبيد بن معتوق الأحمدي

اتغيّرت عملتك ماعاد تُصرف ياريال المجيد=اصبحت ذكرى من الماضي نقلّب في سجلّاتها
سير اليالي على قدّام والنّدمان مايستفيد=والنّاس تجني ثمر ماتعمله من غرس نيّاتها

عيسى بن رجعان الرّشودي

قالو قديمك نديمك بس اضنّه علم ماهو بكيد=شف موضة العصر تمشي بالحداثة مع موديلاتها
صحيح من لايواكب سوق عصره عاش عمره وحيد=والنَّاس ياصاحبي تال الزّمن ياكثر غاياتها