والشك مايدخل قلوب الرجاجيل

يامدوّر المدحه من القال والقـيل=كـل الـكـلام اللّي تــورّاه رصّـه
وصـف الكـلام وميّـله للتّماثـيل=والجاهل المغرور قـلّه ووصّه
يزيـد تصفـيـقه الجـر المواويل=وطلق السانك ومغطه بالمنصّه
واسكت اشوي وعاين وتلقا مهابيل=ناسٍ بعضهم حط دبله وقصّه
يهز وسطه بين جمع المشاكيل=كنّه يقلّد رقص نوره وحصّه
وترك زمانٍ فات لبخيت وجبيل=اللّي لهم بالمجد بصمه وقصّه
شطرٍ شقرته ماتجيه المداخيل=مفهوم للشّعار نظمه ونصّه
لو تمتغط ماتلحق الجدي وسهيل=ارجع على ديس المنيحه ومصّه
والشك مايدخل قلوب الرجاجيل=والشارب المفتول يعرف مقصّه
عندي علومك كامله باالتفاصيل=ان بنت غصّه ون تخفّيت غصّه
هذا الوكاد وخل عنك الطهابيل= ولادمي مخلوق من ترب جصّه

مساعد الجليدي