حمود الجابري//فهد المخلفي

حمود الجابري=
عند ربعي هل الطاله طوال الشبور=ياسلامي سلام الخير والطيب كله
بين حب الفضول وبين صدق الشعور=مانعرف العلوم اللي بوسط المجله
فهد المخلفي=
مرحبا مرحبا ويعم كل الحضور=عد مالاح برق بمزنتن مستهله
ويق للريع ولا دز يمه سبور=ثم تلقا الخبر ياشيخ دقه وجله
حمود الجابري=
البقاء يالمرحب والوفاء ومخبور=كل رجلن ينومس بالوفاء في محله
ودنا بالعلوم اللي تجيب السرور=مير لاحت بروق الخير في كل حله
فهد المخلفي=
وانت مايلحقك ياطير شلوى قصور=كمل الواجب اللي حمل فوقك تشله
ضلمت الليل ضلمه لاكن النور نور=وانت قدم التسنن واجب الفرض صله
حمود الجابري=
للنشامه يجي بالوقت وقفه ودور=ماجهلنا اللزوم وكل دربن ندله
بعد وقت العشاء من قبل وقت السحور=شفت كل العرب في دولةٍ مستقله
فهد المخلفي=
خوفتي له ميزاجك يابن الاجواد دور=نوب رايق ونوب يصيب حضرتك مله
وانت تشعب ذلولك مع وساع الصدور=وجيت في ضل قصر يستضلك بضله
حمود الجابري=
أنت جيت الطريق اللي يمر الجسور=ماجهلت الشعور اللي بصدر الأدله
ياوسيع البنايد للنشامه نزور=في محل الوفاء والمرجله مانزله
فهد المخلفي=
جعل رب الملا يكفيك كل الشرور=كل درب ينومس يالسنافي ندله
دايم يجاب بالملاس مابالقدور=اسمع اللغز مني ثم فكر وحله
حمود الجابري=
انت غايب وحاضر كل ماجيت ادور=الدروب الطويله ماتضيعك لله
مابتلش بالغدير اللي نزل بالبحور=مير من يعقد الحبل المعقد يحله
فهد المخلفي=
حزه مباركه ياصقر نسل الصقور=مير قول الذي فالبال ياشيخ كله
منت من بعد هذي ياجودي معذور=من معه سيف يارجال لازم يسله

صح لسان الشاعر حمود الجابري
والشاعر فهد المخلفي
وبيض الله وجهك على نقل هذه المحاورة ..

صحت السنتكم
والله يـعـطـيـكم الـعـافيـــــــــــة
بيض الله وجيهكم

صح لسان الشاعرين الامعين

حمود الجابري & فهد المخلفي

مشكور ياناقل الجزل

لاهنت يامحمد على النقل

صح الله لسانيهما وأدام عزهما وشعرهما وشاعريتهما

محاورة رائعة ومتميزة خاصة بين حمود الجابري وفهد عواضة

الحميدي سعدنا بك وبالمحاورة

نشكرك ولك ودنا واحترامنا

صحت السنتكم
ملعبه رائعه

لاهنت على النقل

والله يعطيك العافيه