ايه الحطب نشريه في غال الأسعار=نسوق فيه الألف كنه ريالي

بسم الله الرحمن الرحيم

ايه الحطب نشريه في غال الأسعار = نسوق فيه الألف كنه ريالي
أبي ليا جونا من البعد زوار = أقول حياكم عزيز الجلالي
في ليلتن ذعذاعها برد و إعصار = و استرسلت معها نفيض الشمالي
و الكل منهم مهتوي شبت النار = أقوم بالواجب و يرتاح بالي
أحط جرم الرمث و السمر بوجار = و أشعلتها و قلطت صفر الدلالي
و بيضن بغاديدن بها البن و بهار = جهزتها و صكوا عليها الرجالي
يا ما حلا الفنجال منها ليا دار = على النشاما مكرمين السبالي
و صينيتن يدعى لها الضيف و الجار = أما غدا و إلا عشن بالعجالي
و أتبعتها من طيب الهرج معذار = و أصغوا و قالوا لي كمال و جمالي
هذي طرات العمر و إلا الفنى مار = مره و مره و آخرتها الزوالي
ياللي تلم المال من كل الأقطار = و الطيب مالك في طريقه مجالي
أنته نسيت الموت قصاف الأعمار = يالله عسى ما للبخيلين تالي
ليا مت و ألفوا بك على تراب و غبار = ما يفقدك كود المره و العيالي
ليا صار ما يفقدك صلفين الأشوار = اللي لهم يوم الملاقى فعالي
ذكرك محى من يوم لفوك بوزار = آخر مصيرك وسط قبرن هيالي
أقولها و آخذ من الطيب و أختار = بالفعل ماهو بس هرجن يقالي
أفعل ولي عند الرياجيل مقدار = متورثن طيبي من أعز غالي
من الشايب اللي تعرفه قب الأمهار = إليا عدوا اللي يحتمون التوالي
الطيب شاخص قدم مذهب و دوار = ما أقول أنا اللي منفرد به لحالي
إليا حكوا لي فعل وافين الأشبار = أعدني معهم على قد حالي
ياما و ياما بالقبايل من أحرار = صيارمن ميقاعها بالعلالي
و إختامها يا عالمن خاف الأسرار = عطفك و لطفك يوم هول الهوالي
و صلوا عدد ما هل همال الأمطار = على النبي عد الشجر و الرمالي

أنته نسيت الموت قصاف الأعمار = يالله عسى ما للبخيلين تالي
ليا مت و ألفوا بك على تراب و غبار = ما يفقدك كود المره و العيالي
ليا صار ما يفقدك صلفين الأشوار = اللي لهم يوم الملاقى فعالي
ذكرك محى من يوم لفوك بوزار = آخر مصيرك وسط قبرن هيالي
أقولها و آخذ من الطيب و أختار = بالفعل ماهو بس هرجن يقالي
___________________________________________
شاعرنا المبدع / محمد بن سماح الغيداني
صح لسانك على هالقصيده التي كلها جميله حقيقه . وبيض الله وجهك .
قصيدة جزله من شاعر جزل .. تحياتي لكم ودمتم بخير وعافية ...

قول وفعل ياراع الطيب
صح لسانك وعتلا شانك
قصيده جزله من راس جزل

صح السانك
يازبون المخاسير

الشاعر القدير محمد سماح الغيداني صح لسانك مليون على هالجزالة والابداع الغير مستغربه
الله يعافيك ويطول عمرك

كفو كفو والف نعم يابومشعل

والله قصايدك جزله وتحث على الطيب والعلم الغانم

الله يعطيك الصحه والعافيه ويطول بعمرك

كفو كفو كفو قول وفعل يابو مشعل

صح السانك مليون على هذه القصيدة الجزلة يالجزل

صح الله لسانك
ولاهنت
وسلم فكرك وبنانك
دمت برعاية الله وحفظة

تسجيل تواجد في منبر الجزاله
صح لساانكـ
بيض الله وجهك

الشاعر الفاضل سند العريمه
أشكرك على المرور و المتابعه و التواجد الدائم معنا
و هذا الإطراء الجميل
شهاده اعتز بها
و اعتبرها تاج على راسي
من شاعر جزل
دمت بخير يحفظك الله