ديوان الشاكر ابو سامي / قسم القصائد

البارحه عيني قـزا نونهـا النـوم = وعيّا يجيها النوم من حـر مابـي
من سبّة اللي داخل القلب مرسـوم = حبـه وحـب الشامخيـن العذابـي
ويامجانب المعنى تريـح ومخـدوم = واحذر تتعـب سابقـات الركابـي
الله لايجـزاك بالخـيـر يالـبـوم = اللـي فعايلـك الخنـا والخرابـي
المسجد الاقصى ينـادي ومحـروم = وين الرجال ووين عـزم الشبابـي
اللي لهم عزم وعزيمة على الـدوم= عزمـاً تعـدا ناطحـات السحابـي
الله ياكـم واحـد بـات مظـلـوم = في القدس مابين العـرا والترابـي
وكم شايب بايت على الغبن مكلـوم = يشكي فراقٍ بين الاضـلاع ثابـي
وياكم من عذراء سقت كاس مسموم = كاس المرار وكـاس بالاغتصابـي
وياكم طفلاً يسكب الدمـع مهمـوم= مهمـوم مايقـدر يـرد الجوابـي
ومحمد الدرة نهـار امـس ياقـوم = شفته صريع من اليهـود الكلابـي
ضميرهم ضامر وسلبـي ومعـدوم = واقسمت مافيهـم ضميـر ايجابـي
إلاّ ضمير الشر والعنـف والشـؤم =مخالفيـن لشرعـة اهـل الكتابـي
صهيون فيهم جبن خواف ورخـوم =اليا احتمى الميقاف مثـل الهلابـي
وترى جميع العرب يغشاهم اللـوم =ان كـان ماهبـوا لصـد العذابـي
وياربعنا ماهـي سواليـف وحلـوم = الحاضريـن يبلـغـون الغيـابـي
نظمتها في العقد عشريـن منظـوم = وادرجتها حسب العدد في حسابـي
هذا وانا ماني من الذنـب معصـوم = وارجو من المولى العفو والثوابـي
وصلاة ربي عـد ماتزهـر نجـوم= واعداد ماتنبـت حقـول وجنابـي
على رسول جا وبه ختـم مختـوم =ختم النبـوه بيـن الاكتـاف نابـي

ياحسين الوصـوف القلـب ماطمنـه = الرسيل الـذي ودى رسالـه وجـاب
وعنك قـال الكـلام الزيـن ماثمنـه = كن خاطرك منا يابن الأجـواد طـاب
الحجر مايليـن وقلبـك أقسـى منـه = أنت سببت لقلوب الحيـارى عـذاب
من تعلق بحبـك تـاه مـن يظمنـه = مثل عطشان يطرد خلف وهج السراب
وقلبي اللي مولع فيـك كيـف آمنـه = لايغادر ضلوع الصدر قبـل الغيـاب
مثل طير كفخ غضبان مـن مكمنـه = لين غيب عن الصقار فوق السحـاب
والزمن به عجائب والعجيـب أزمنـه = وقلبه أسود سواده مثل ريش الغراب

ارتاح ياقلب كـان تـدور الراحـه = وباب الشقاء قفله واكسـر مفاتيحـه
مالك ومال العناء وتنبش اجراحـه = تراك لاطحت ماتسلـم مـن الطيحـه
وان كان جاك الهوا الغشاش برماحه = وهـددك مابيـن عشيـه وتصبيحـه
بهموم ياقلب ماهي عنـك منزاحـه = بالقلب راسـم كروكيـه وتصريحـه
ارم الهموم الكبار السـود بالباحـه = وبـدل همومـك بتهليلـه وتسبيحـه
حتى تلبس بنـوط العـز ووشاحـه = وتثمر عروقك مثل ماتثمـر الشيحـه
جوارح الجسم ماهي منك مرتاحـه = تهتز لاسمعـت الونـات والصيحـه
كبير دورك وحجمك نصف تفاحـه = ولابد بعد الشقاء ساعـات ترويحـه
وازيد واقول كـان تـدور الراحـه = الباب صكه إذا جاتـك منـه ريحـه

ابو زياد ولا تغطه غطاطه =أدلى بحرف وحط فوقه نقاطه
ولا هو من اللي لابدع جاب هين= تلقى هروجه خالطتها الصماطه
يبقى يحث اللي لهم قول يسمع=شعار كل ساير بانظباطه
وانا رصيدي فايضة به بنوكي =والاّ رصيد البعض فوق البلاطه
الصعب مايصعب ونحرق لجاجته=يالين حرف القاف تورح شواطه
ولا اقول مابعدي ومافيه قدّنا =كل على ماقيل يحمي بساطه
وكل بذنبه ماحمل ذنب غيره = ومااكثر خطأ ابن آدم ومااكثر لغاطه
ويالله تغفر زلتي وانت مسندي = حيث ان جسمي مثل عود الحماطه
وجاريت شاعر قال في قاف سجله = بلحن هلاليا وطاب ارتباطه
قاف صعيب القافية لو تمعنوا = صدره بلا ربط وعجزه على آطه
غنى به الشبان في قنص بالفلا = يوم كل زايد في نشاطه
ريح الخزاما والنفل والشمطري = وبن وهيل شوشوا باختلاطه

بديت في المرقاب والشمس غايبه =واهل دمع العين والراس شايبه
مما جرا لي حين فارقت حيهم =واظلم علي الليل وارخى ذوايبه
البعد فرقنا وشتت جموعنا =والقلب لوعاته مع الدهر صايبه
ريم رمى قلبي وهو غاية المنى =صعباً على الصياد مره مشاربه
ظليت افكر به ليالي طويلة =وبذلت فيه المال ماني بهايبه
لكن ماكل المطاليب بالمنى =ولاكل غطاس الى الماس جايبه
ولا كل بحار يوجه سفينته =نحو المسير اللي له النفس راغبه
وابو سعود يقول قد فات ماجرى =ماقدر الرحمن للعبد كاتبه
وأقول ماهو عذر ياطيب النبا =لامن بني عمه ولا من قرايبه
واختم بذكر الله كلامي وجابتي =عداد ماهل المطر من سحايبه

ياهاجس الشوق خذمعك القلم واخذ القراطيس = والمحبرة والدفاتر كلهاواخذالمراسم
خذها لشط البحر على ظهور الخيل والعيس = وابحر بها في البواخر لين تلقى الموج حاسم
عندي بدلها من الاقلام وانواع الكراريس = من جسمي اللي براه الشوق وبرته المياسم
الحبر من دم قلبي والضلوع اللي مقاويس = اقلام تكتب بها عن قصة احلام المواسم
قصة غريبة تبين حال مبعدة المراميس = فيها دموع العيون تغط ضحكات المباسم
اطرق بها كل باب وقفل ابواب الهواجيس = وداوي طعون الجروح العاجزة فيها البلاسم
جروح في وصط صدري تشتعل مثل المقابيس = من وهجها عطلت كل الخلايا والمناسم
لاهي بمن حب خود عيونها حور مناعيس = مياسة القد حورية عليها اللبس كاسم
الهم والضيم خيم لين سوى له متاريس = بالعين اشوفه على خد القدر جاثم وواسم
دور دواها المطابق والموافق للمقاييس = المشفي المبري الخالي من انواع الطلاسم
تلقاه عند الرجال اهل الشرف واهل النواميس= فكاكة العاني اللي عندهم حلو الدواسم
واسند لابو عادل الشكوى كريم الكف والكيس= عساه يعرف سبب شكواي انا واشرف وقاسم
وختامها بالصلاة وبالسلام ونخزي ابليس = على نبي بتوجيهه لدرب الخير راسم

الورق بيض الحنايا وحبره من دمي = والكتابه حفر ميسام غاير مايروح
اكتب الاحداث تاريخ سير الآدمي = المشيد فوق كل المسارح والصروح
وفي الكتابه ما تساوى وجودي وعدمي = ياسفينة نوح رسي وحطي قوم نوح
زلة الساني شنيعه وزلات اقدمي = احتسبها من صغار الخطايا والمزوح
اصنع المعروف من يصنعه مايندمي = يحفظه دايم وساع المدارك والشبوح
ان فعلت فعول شينه بفعلك تصدمي = وانتبه دم النشاما مع الفزعه يفوح
ناس تبني للمعالي وناس تهدمي = فرق بين الشرق والغرب شوح بعد شوح
والمعالي كل حر عليها يقدمي = ما نعود عن طريق المعالي والطموح
اجمحي يام السنام الردوم المردمي = لايعوقك شي ما دامت الطرقه سموح

يقول من هو ينظم الشعـر ياذعـار = من هاجس يطرق بهـا كـل بابـي
يقطف من الروض الندي طيب الاثمار= احلى من السكـر وعـذب الشرابـي
مااحتار فكره مع طويليـن الاشبـار = في ماقفه يبـدي حسيـن الجوابـي
يسري بها في الجو كبتـن وطيـار = علـى ترايستـار فـوق السحابـي
ويسلم المكتـوب حشمـه ومقـدار = للـي علـى زيـن القوانيـن ثابـي
في ظل من ظله على الضيف والجار = مطـوع العاصـي وعـوج الرقابـي
من عزوة من طبعها تحكـم الشـار = حلالـة العقـدة نـهـار النشـابـي
ياذعار فكر اللي معه فكـر مااحتـار = لو هي تجيـه كبـار ماقـال وابـي
ويكفيك ربي شـر عايـن وسحـار = الكل مثل السيـف وسـط القرابـي
والآله الحدباء اليـا جـات الأقـدار = واللـي يشيلوهـا سـوات الركابـي
والسانك احصانك وعقلـك اليـا دار = ماعـاد ينفعـك النـداء والطلابـي
والبن له مقـلا ولـه نجـر وبهـار = سوقه على الياسـر وربـع قرابـي
واقرأ الكتاب وكب من باح الاسـرار = وكـل علـى لـيـلاه ودا وجـابـي
وياكـم قاسينـا حلاهـا والامـرار = وياكم لبسنـا مـن جديـد الثيابـي
وابغى انشدك عن ذيب للناس غـدار = وصفه مخالف عن جميـع الذيابـي
يعدي على اهل الجود في سر واجهار = ويهـدد اهـل المصلحـه بالذهابـي
وعن بنت يارجـال مـع زايـر زار = واليا انتحى راحت سوات السرابـي
بنت جميله تسلـم العيـب والعـار = عهدي بهـا يـوم الكريـم التوابـي
وعن حر له صيته ومن ظمن الاحرار= له في الشجاعه دور ماهـو بغابـي
وله سمي مقاسمـه اسـم واشعـار = لكـن مـن بينـه وبينـه حجابـي
وعن ثـلاث مـن مجاهيـم وابكـار = وليفهـن ثلـب كبـيـر العـلابـي
اليا اقترب منهن ترى الثلـب هـدار = واليا ابتعد فال الـذي معـه طابـي
ومنا لاهـل جـده تحيـة ومسعـار = تضفي علـى حضارهـم والغيابـي
عداد ماشعت علـى الكـون الانـوار= من قـوم مكـه عـد دور الوجابـي
ونختم بذكر الخالق النافـع الضـار= والمصطفى اللـي سنتـه ماتعابـي

ألا واهني اللي معه جيب ولْه نياق = اذا ضاق صدره دق سلفه وراح الها
تحن وترازم كل ما شافت البراق = يعزل الجنب والخلف عنده معقلها
ثلاثة بيوت قلتها والله الرزاق = وباقي القصيدة للنشاما تكملها
وانا مثل اخو جوزا على لامها مشتاق =ولكن ماكل الاماني نحصلها
وحب البداوة عندنا داخل الاعماق =مورّث من الاجداد من عصر اوائلها
وانا متعتي في البر لامن صدري ضاق = وأعمد البدو لو كان تبعد منازلها
وأحب الطبيعة لاجلها صنعة الخلاق = وفيها الثلاث الحسن والله مجملها
وما احسن حياة البدو والضعن بالاشراق = ليا مد ضعن البدو عيني يكحلها
ولا ربّعت نجد المريفة نحث الساق = لمرباع قوم ما سلت عن مداهلها
ديارا عطاها الله من واسع الارزاق = وفيها الكلا والماء وعشب يظللها
وفيها النفل والرمث والحمض واللصاق = وفيها الخزاما مع زهور تبللها
قطار الندى للي نوى يعمد المشراق = يشاهد بها روضة كستها خمائلها
وانا ما شقاني غير هجن بوسط سباق = وسيعات زور وخصر ضامر منحلها
عن الماد ماترجع ويطرب لها العشاق = ليا صفت الاربع صعيبا تحولها
الا ليت عند عشر واربع وتسع لحاق = وابا قصّر الخطوة ولاني مطولها
وصلوا على المختار والخير له سبّاق = عداد أحرف القرآن واللي يرتلها

البارحه يوم كل النـاس هجاعـي=انا عيوني حربها النـوم ماجاهـا
ارقب نجوم السماء والبرق لماعي=واراقب المزنه اللي صابني ماهـا
لاني براعي طروش وغير زراعي=لكن احب الابل واحـب طرياهـا
وبخير والحمد لله ماقصر باعـي=وانا احمد الله بمبداهـا ومنهاهـا