قصيدة بن ثعلي ومجاراتي لها

السلام عليكم ورحمة الله وبركاته

يشرفني المشاركه مع ابناء العم في منتداهم الشامخ والله يقويهم

هذه قصيدة للشيخ / ناصر بن نهار بن ثعلي القاضي بمناسبة زيارته وجماعته من قبيلة عتيبه
لقبيلة حرب:


يقول ناصر:

ياجماعة كيف ابا اقول في حرب القصيد=وكيف ابذكر مجد والمجد هم صناعته
كيف اسويلي قصيدة وبالامجاد اشيد=والقصيد إهمه هله والوفاء زراعته
لو بغيت اكتب وأسولف واجيب إلهم جديد=تمتلي صحف ودوواين ياطباعته
لو أنا شاعر وللشعر متفهم وأجيد=الثقافه وأطمع الطيب مع طماعته
تنشف أقلامي قبل لاأجمع المجد التليد=مع جديد اليوم لو كان أريد إذاعته
عن رجالآ بالمواقف تفيد وتستفيد=والبحر ماكل سباح يلحق قاعته
حرب فرسان المواقف مطوعة العنيد=أنقلوا عني هذا القول ياسماعته
منهم اللي فك ذوده بدس الطير أكيد=ومنهم اللي في خويه حصد خداعته
ومنهم اللي كسر القفل وأبواب الحديد=وأعتق اللي داخل السور من مناعته
ومنهم اللي حط برجول من عاداه قيد=وصار خادم عقب عزه وفقد رباعته
ومنهم اللي فك الابواب قدام المديد=مانشد معسر القوم كم بضاعته
ومنهم اللي بالامارات ماجا له نديد=واستلم بيرق هل الشعر من رفاعته
وإن بغيت اذكر لكم واحداً ماهو رشيد=نتفت الاشناب من حرب جاءت قماعته
يوم زل به القدم بالسوالف والنشيد=مادرى إن اهل المواقف تراقب باعته
جبت نبذه عن هل العزم والرأي السديد=والجبل ياصعب قلعه على قلاعته
وقبل ختم القاف ربي على قولي شهيد=ماني اللي مدح كل البشر شماعته
مامدح الا واحدٍ يستحق وله رصيد=بالمكارم والمروات نفسه طاعته
عقب هذا ودي اورد لكم شيء جديد=لو تركته نقص تركه وهذي ساعته
دام جاء للمجد تضمين لبيوت القصيد=الحضيض اللي عتيبه تجي فزاعته
ينفرج كربه وترجع له الايام عيد=مايفكر في هموم الزمان وراعته
قومي الهيلا عتيبه منزحت الضديد=من هوازن ساسنا والخطر قطاعته
نلطم العايل ونزمي الياركاد المكيد=والصحن نملاه بالحيل لين فراعته
وإن عطينا نعطي الجزل مانعطي الزهيد=وإن بطشنا كل مودع يكب وداعته
ولقبونا الناس بالقاب من فعلا فريد=لقبونا اهل النقاء والكرم شراعته
ولقبونا أهل الحميه لياحصل الوعيد=ولقبونا اهل الثلاث ومن جهل رداعته
قال فينا ربنا قوم أهل باس شديبد=ذكرنا نزل على المصطفى وتباعته
نزله في محكم القول خلاق العبيد=الله اللي عزنا والفضيله طاعته
الولد منا لو انه رضيع فوق ديد=يجذبه عرق الندى والجزال طماعته
مايهاب وعن سواير جدوده مايحيد=راضع حب البطولات مع رضاعته
والسلام إختام من شاعرٍ طلعه بعيد=هامته عليا وقول الثمين ولاعته

وهذه مجاراتي للـــقصـــــيدة أقـــول:

أبتدي باسم الله اللي يدبر مايريد=واحمده وارجيه ربي وأدور طاعته
واطلبه رب المخاليق رزاق حميد=مغني الفقران ربي بعد مجاعته
لي يقود القاف واقنده معيه قنيد=يوم ناصر غلق القافيه بابداعته
ومن بعدها مرحبا عد منتوج القصيد=وعد ما التجار في سوق مكه باعته
مرحبا في مرحبا .مرحبا واثني واعيد=مرحبا بالضيف ومضيفه جماعته
مرحبا واليوم كلاٍ بجيتكم سعيد=والبلد بقدومكم ساطعه شعاعته
ياعتيبه ياعتيبه هل الفعل المجيد=الكرم والطيب والمجد ياجماعته
أنتم الهيلا ورجالكم حيدٍ محيد =والعتيبي للجزيلات دائم ناعته
تفتخر فيكم شبابه ليا حمي الوطيد=وانتخيتم بيعوا الروح يابياعته
في نهارٍ فيه فزعه وزايدها يزيد=موقفٍ ماتسمع الصوت من صعاعته
كل واحد من عتيبه سوات بن الوليد=لرتمتع بالمعركه كنها ارتماعته
والحميه بالعتيبي تسرب بالوريد=والحميه به شجاعه على شجاعته
قلتها ماني مجامل ولا عندي جحيد=ومن جحد فعل المناعير بقعا لاعته
والعتيبي عضدنا وكل حربي له عضيد=وكل حربي فالعدا كايده قطاعته
وحرب ماعندي على قول ناصر شيء أزيد=فعلهم بالمختصر موضحٍ نصاعته
واشكره شكراً يخلد بعدنا مايبيد=مثل صك الحكم وقضاتنا شراعته
والختام أثني التراحيب واكرر وأعيد=مرحبا بالضيف ومضيفه جماعته